Kwenyu, ala mũmwendete Yeova Ngai na Ndeto yake, Mbivilia:

Yesũ aisye atĩĩ: “Mũkamanya ũla w’o, na ũla w’o ũkamũthasya.” (Yoana 8:32) Kwasũanĩa ũndũ weewie yĩla wamanyie ũla w’o ya mbee! Vaiĩ nzika kana nĩwatanie mũno wamanya kana o na kau nthĩ ĩno yusĩe maũndũ ma ũvũngũ, nĩ ũndũ ũtonyeka andũ makamanya ũla w’o.​—2 Timotheo 3:1.

Yeova Ngai endaa kĩla ũmwe witũ amanye ũla w’o. Na nũndũ nĩtwendete andũ, nĩtwendaa kũmamanyĩsya ũw’o ũsu. Ĩndĩ ve maũndũ angĩ mũndũ ũla ũmũthũkũmaa Ngai waĩle kwĩka. Nĩtwaĩle kũtata ũndũ tũtonya twĩkale ũndũ Ngai wendaa Aklĩsto mekale. Na twĩkaa ũu nũndũ nĩtũnengete myolooto ya Yeova ndaĩa mũno. Yesũ nĩwawetie kĩla twaĩle kwĩka nĩ kana twonany’e kana nĩtũmwendete Ngai. Aisye atĩĩ: “Ethĩwa mũkakwataa mĩao yakwa, mũkekalaa wendonĩ wakwa, o tondũ nyie nĩkwataa mĩao ya Asa wakwa na kwĩkala wendonĩ wake.”​—Yoana 15:10.

Yesũ nũmwendete Ĩthe wake mũno, na onanasya ũu kwa kwĩka kyonthe kĩla Ĩthe wake wamwĩaĩa. Kĩla mũthenya, yĩla tweeka maũndũ tũatĩĩe ngelekany’o ya Yesũ, Yeova nĩwendeeaw’a nithyĩ na ũu nũtumaa tũkwata ũtanu. Ũu nĩ w’o ki nũndũ o nake Yesũ aisye atĩĩ: “Ethĩwa nĩmwĩsĩ maũndũ aa, mwĩ atanu ethĩwa mũkameka.”​—Yoana 13:17.

Twĩĩkwatya kana ĩvuku yĩĩ nĩyĩũmũtetheesya kwĩmanyĩsya ũndũ mũtonya kwĩkala kwosana na ũw’o ũla wĩ Mbivilianĩ, na ũu ũituma mwĩthĩwa anyanya ma Ngai. Na twĩĩkwatya kana mweeka ũu, mũkaendeea kũmwenda Ngai mũno na mũyĩkala “wendonĩ wa Ngai, mweteele . . . thayũ wa tene na tene.”​—Yuta 21.