Kwasũanĩa ngelekany’o ĩno: Mwĩĩtu wĩtawa Karen nĩwavika vandũ ve andũ ma mũika mekwĩtanĩthya, na ataminĩte ndatĩka ĩkũmi, ayĩw’a eetwa nĩ mũndũ mesene na aimũkũlya atĩĩ:

Karen aivĩndũka na ayĩthĩa nĩ mũnyanyae Jessica akwete sũva ilĩ ngunũe. Asisya sũva isu iilyĩ ta sya ũkĩ. Jessica atekwananga saa aimũnenga Karen sũva ũmwe wa ũkĩ na aimwĩa, “Naku nĩweanie, kwata kasũva kamwe wĩtanĩthye, kana kookĩa?”

Karen eenda kũlea, ĩndĩ thĩna nĩ kana Jessica nĩ mũnyanyae na Karen ndekwenda Jessica aisũanĩa ta mũsuvau. O na ĩngĩ, Karen nĩwĩsĩ kana Jessica nĩ ũmwe katĩ wa eĩtu ala aseo. Kwoou aisũanĩa kana ti ũthũku kũnyw’a ethĩwa Jessica nũtonya kwĩka ũu. Ũu ũituma Karen asũanĩa, ‘Ũũ no ũkĩ, ti ũndũ ũmwe na kũtũmĩa ndawa sya kũmila.’

We wĩka ata keka nue Karen?

Nĩ kana wĩke ũtwi waĩle wakwatwa nĩ ũndũ ta ũsu, no nginya wĩthĩwe wĩsĩ nesa wĩ mũndũ ũilyĩ ata. Ũu nĩ kwasya kana ve kĩndũ kĩ nthĩnĩ waku kĩla kĩũtetheeasya kũmanya we nue ũũ. Weethĩwa na ũmanyi ũsu, ũkeethĩawa na vinya wa kwĩyĩkĩa motwi, vandũ va kwĩtĩkĩla andũ angĩ makwĩkĩe.—1 Akolintho 9:26, 27.

Ũtonya ata kũkwata vinya ũsu? Kũkwata ũsũngĩo wa ĩkũlyo yĩla yĩatĩĩe nĩyo ĩtambya ya mbee.

Kwĩthĩwa wĩsĩ maũndũ ala ũtonya kwĩanĩsya kũkaũtetheeasya wĩthĩwe ũte na nzika na maũndũ ala ũkwĩka.

NGELEKANY’O YĨ MBIVILIANĨ: Mũtũmwa Vaulo aandĩkie atĩĩ: ‘O na ngethĩwa nĩ mũndũ ũtesĩ ũneena, ũmanyinĩ ti w’o nĩilyĩ.’ (2 Akolintho 11:6) Nũndũ Vaulo nĩweesĩ Maandĩko nesa, nĩweethĩawa e mũlũmu o na ĩla andũ ala angĩ mamũneenea naĩ. Ndaĩ esa kwĩtĩkĩlya mawoni mataĩle ma andũ asu matume mũĩkĩĩo wake wonza.—2 Akolintho 10:10; 11:5.

ĨYĨOSYE MWENE: Andĩka vaa ĩtheo kĩnengo wĩ nakyo kana ũndũ mũna mũseo ũtonya kwĩanĩsya.

Elesya ndaĩa ĩmwe nzeo wĩsĩ wĩ nayo. (Kwa ngelekany’o, nũthĩnĩkĩaa andũ? wĩ mũlau? wĩ wa kwĩkwatw’a? nũatĩĩaa saa nesa?)

O na kau no wĩthĩwe wĩ na ũtonyi wa kwĩanĩsya maũndũ maseo, kawonzu o kanini no katume ũvalũka.

NGELEKANY’O YĨ MBIVILIANĨ: Vaulo nĩweesĩ mawonzu make. Aisye atĩĩ: “Nũndũ nĩtanĩaa ĩla mĩao ya Ngai mũndũnĩ wa nthĩnĩ: ĩndĩ nĩona mwĩao wa mũthemba ũngĩ mamuthanĩ makwa, ũla wũkitaa na ũla mwĩao wĩ kĩlilikanonĩ kyakwa, na nũndavĩte ũkambĩkĩa mwĩaonĩ wa naĩ.”—Alomi 7:22, 23.

ĨYĨOSYE MWENE: Nĩ mawonzu meva wĩ namo waĩle kwĩkĩa kĩthito ũmasinde?

We no ũlĩse ngalĩnĩ na ũyĩa ndeleva aũthiũũkasye o vandũ vamwe nginya ngalĩ ĩsu ĩkesa kũthela mauta? Ku ti kũtũmĩa kĩlĩko, o na ĩngĩ, kũu nĩkwananga mbesa!

Twĩĩmanyĩsya kyaũ? Kwĩthĩwa na mũvango mũseo nĩkũũtetheeasya ũkeanĩsya maũndũ ala ũkwenda kwĩka. Ũu nĩ kwasya kana wĩthĩawa wĩsĩ kĩla ũkwenda kwĩanĩsya na ũndũ ũkwĩka nĩ kana ũkĩanĩsye.

NGELEKANY’O YĨ MBIVILIANĨ: Vaulo aandĩkie atĩĩ: “Nyie nĩsembaa, nde na nzika.” (1 Akolintho 9:26) Vandũ va kũkũna maũndũ oou kĩtumbo, Vaulo aĩ na mĩvango mĩseo na nĩwamĩanĩasya.—Avilivi 3:12-14.

ĨYĨOSYE MWENE. Andĩka vaa ĩtheo maũndũ atatũ ala ũkwenda kwĩanĩsya mwaka ũũ ũatĩĩe.

Weethĩwa ũte na mũĩkĩĩo, ũkeethĩawa na nzika ĩla ũkwĩka motwi. Ũkaalyũkaa ta kĩmbu nĩ kana wĩw’ane na andũ ma mũika waku, na ũu nĩkwonany’a kana ndwĩyĩsĩ nesa.

Kĩvathũkany’o na ũu, weethĩwa na mũĩkĩĩo na maũndũ ala ũkwĩka, ũkeethĩawa wĩyĩsĩ nesa na ũtekwelelũkw’a, o na andũ ala angĩ meeka maũndũ mataĩle.

NGELEKANY’O YĨ MBIVILIANĨ: O na kau nĩvatonyeka mwathani Ndanieli akethĩwa aĩ wa mũika, “nĩwetw’ĩĩe ngoonĩ yake” kana akakwataa mĩao ya Ngai, o na kau aĩ vaasa na andũ ma mũsyĩ. (Ndanieli 1:8) Kwa kwĩka ũu, Ndanieli ndaaelelũkw’a nĩ kĩndũ o na kĩva. Ndanieli eekaa maũndũ kwosana na mũĩkĩĩo wake.

ĨYĨOSYE MWENE. Nĩ maũndũ meva ũĩkĩĩaa? Kwa ngelekany’o: Nũĩkĩĩaa kana kwĩ Ngai? Ũĩkĩĩaa ũu nĩkĩ? Nĩ maũndũ meva makũĩkĩĩthasya kana kwĩ Ngai?

Nũĩkĩĩaa kana Ngai atũnengete myolooto yake nĩ kana ĩtũtethye? Ũĩkĩĩaa ũu nĩkĩ?

Katĩ wa syĩndũ ii ilĩ, wenda kwĩthĩwa ũilyĩ ta kyaũ? Ĩtũ yĩkũũlũkw’a kũũ na kũũ nĩ kĩseve kana mũtĩ ũtesa kũvalũka o na wakimwa nĩ kĩuutani kĩnene? Ĩkĩa kĩthito wĩthĩwe wĩyĩsĩ nesa na ũkeethĩwa ũilyĩ ta mũtĩ ũsu. Na weeka ũu, ũkeethĩwa ũtonya kũsũngĩa ĩkũlyo yĩĩ, Nyie nĩ mũndũ ũilyĩ ata?