Satani na ndaimoni iiendeea kũkenga mũvaĩ-wa-andũ kavinda kaasanga kũvĩtũka vau. Yeova nũminĩte kũsyĩkya kuma ĩtunĩ. (Ũvuany’o 12:9) Ĩvindanĩ yĩla yĩthengeee, Ngai nũkwosa ĩngĩ ĩtambya kwelekela Satani na ndaimoni syake. Nthĩnĩ wa wono ũmwe kuma kwa Ngai, mũtũmwa Yoana awetie atĩĩ: “Na noona mũlaĩka aitheea kuma ĩtunĩ, e na ũvungũo wa yĩla ĩima yĩte kĩtulu na mũnyololo mũnene kw’okonĩ kwake. Nake akwata ũla mũkũnga, nzoka ngũũ, nayo nĩ Ndevili na nĩwe Satani, na amwova myaka ngili, na amwĩkya ĩimanĩ yĩte kĩtulu na ayĩvinga, na ayĩsiĩla ĩũlũ wake, nĩ kana ndakakenge mbaĩ ĩngĩ, mũvaka ĩla myaka ngili ĩthele.” (Ũvuany’o 20:1-3) Ĩtina wa ũu, Ndevili na ndaimoni syake ikaanangwa tene na tene.—Ũvuany’o 20:10.

 Andũ athũku ĩũlũ wa nthĩ makaanangwa vyũ.—Savuli 37:9, 10; Luka 13:5.

Satani na ndaimoni mavetwa, Yeova akaetee mũvaĩ-wa-andũ moathimo maingĩ. Lilikana kana akw’ũ maiĩ thayũ, maiĩ vo. Yesũ aelekanilye kĩkw’ũ na too—too mũliku, ũte ndoto. (Yoana 11:11-14) Eekie ũu nĩkwĩthĩwa nĩweesĩ ĩvinda yĩkooka yĩla ala makomete kĩkw’ũnĩ meũkĩlw’a moke thayũnĩ. Aisye atĩĩ: “Saa nĩwũkĩte, yĩla onthe ala me mbũanĩ [“mbũa sya kĩlilikano,” ũalyũũlo wa New World] . . . makauma.”—Yoana 5:28, 29; elekany’a na Meko 24:15.

Makaetwe thayũnĩ vaa ĩũlũ wa nthĩ. Vandũ va imanyĩthya sya kwĩthĩwa andũ nĩmakwie, movoo ma ũtanu mwingĩ makaweta kana andũ nĩmathayũũkw’a! Asi, ũkeethĩwa wĩ ũtanu ũilyĩ ata kũthokya endwa-ma-mũndũ kuma mbũanĩ!