Mbivilia ĩwetaa kana Satani nĩ “mũkengani wa nthĩ yonthe.” (Ũvuany’o 12:9) Satani na ndaimoni syake maikwenda ithyĩ tũĩkĩĩe Ndeto ya Ngai, Mbivilia. Matataa kũtuma andũ maĩkĩĩa kana akw’ũ me thayũ vandũ vana nthĩnĩ wa wĩkalo wa maveva. Ekai twone ũndũ mekaa ũu.

Ndĩni mbingĩ imanyĩasya kana kĩla mũndũ e thayũ wumaa ũkainga ũendete wĩkalonĩ wa maveva ĩvinda yĩla yũmba ya mwĩĩ yamina kũkw’a. Iwetaa kana mwĩĩ nĩw’o ũkusaa ĩndĩ thayũ ndũkusaa. Mbeange wa vau, nilũmasya mũno woni wa kwĩthĩwa thayũ ndũtonya kũkw’a, kwĩthĩwa nĩ kyuu kĩtatonya kũkw’a.

Ĩndĩ Ndeto ya Ngai ndĩmanyĩasya ũu. Mbivilia yonanasya kana thayũ nĩ mũndũ mwene, ti kĩndũ kĩ nthĩnĩ wa mũndũ. Kwa ngelekany’o, Mbivilia ĩwetaa ũũ ĩimanyĩthya ũvoo wa kũmbwa kwa Atamu: “Na Yeova Ngai oomba mũndũ na kĩtoo kya nthĩ, na amũvevea mĩthũmũ ya thayũ manyiũũnĩ make; na mũndũ atw’ĩka kyuu kĩ thayũ [“atw’ĩka nevusi yĩ thayũ,” ũalyũũlo wa New World].” (Mwambĩlĩlyo 2:7) Kwoou Atamu ndaanengwa thayũ; atw’ĩkie thayũ newe.

 Nyamũ o na syo syĩtawa mathayũ.—Mwambĩlĩlyo 1:20, 21, 24, 30.

Kwoondũ ndeto ya Mbivilia “thayũ” yonanasya mũndũ we mwene, tũyaĩlwe nĩ kũseng’a kũmanya kana mathayũ nĩmatonya kũkw’a na nĩmakusaa. Maandĩko maasya atĩĩ:

• “Nũvonoketye thayũ wakwa kuma kĩkw’ũnĩ.”—Savuli 56:13.

• “Nĩwaseũvĩsye ũthatu wake nzĩa; ndaasũvĩa mathayũ moo matikakw’e, ĩndĩ anengane thayũ woo mũimũnĩ.”—Savuli 78:50.

• “Nĩ ũndũ wosene na mĩao kwĩka kĩko kĩseo kana kwĩka kĩko kĩthũku, kũvonokya kana kũaa thayũ?”—Maliko 3:4.

Maandĩko angĩ monanasya kana mathayũ nĩmatonya kwanangwa (Savuli 63:9), kũthĩnzwa na ũvanga (Savuli 22:20), kũvingwa mĩthũmũ (Yovu 7:15, ũalyũũlo wa New World), na kũlikw’a vandũ makathelekela. (Yelemia 18:20) Kwoou, thayũ nũkusaa.

Ũkasoma Mbivilia kuma mwambĩĩo kũvika mũthya, ndwĩsa kwona nongi ndeto ĩnĩũweta “kyuu kĩ thayũ kĩtatonya kũkw’a.” Thayũ wa mũndũ ti veva. Ĩmanyĩsyo ya thayũ  ũtatonya kũkw’a ti ĩmanyĩsyo ya Mbivilia. Nĩ ĩmanyĩsyo ya Satani na ndaimoni syake. Yeova nũmenete movũngũ monthe ma kĩndĩni.—Nthimo 6:16-19; 1 Timotheo 4:1, 2.

Nzĩa ĩngĩ ĩla Satani waasya andũ nayo nĩ kwĩsĩla andũ maneenanasya na maveva. Mũndũ ũneenanasya na maveva nĩ mũndũ ũla ũtonya kũkwata movoo ĩmwe kwa ĩmwe kuma wĩkalo wa maveva mathũku. Andũ kauta kanene, vamwe na andũ asu maneenanasya na maveva, maĩkĩaa kana movoo asu maumaa kũla kwĩ maveva ma akw’ũ. Ĩndĩ kwĩanana na ũndũ twamina kwona nthĩnĩ wa Mbivilia, vaitonyeka kwĩthĩwa ũu.—Mũtavany’a 9:5, 6, 10.

Kwoou-ĩ, movoo asu maumaa kwaũ? Maumaa kwa ndaimoni mbene! Ndaimoni nitonya kũlyaĩĩlya mũndũ yĩla wĩ thayũ; nĩsyĩsĩ ũndũ mũndũ ũsu waneenaa, ũndũ wailyĩ, ũndũ weekaa, na ũndũ weesĩ. Kwoou nĩ ũndũ mũvũthũ kwa ndaimoni kwĩyĩelekany’a na andũ ala makw’ĩte.—1 Samweli 28:3-19.

Nzĩa ĩngĩ ĩla Satani ũendeeasya ũvũngũ ĩũlũ wa akw’ũ nĩ kwĩsĩla ngewa sya ũvũngũ. Mavinda maingĩ ngewa isu syathũkasya andũ  ũw’onĩ wa Mbivilia.—2 Timotheo 4:4.

Nthĩnĩ wa Avilika kwĩ mbano mbingĩ ĩũlũ wa andũ moonekie me thayũ ĩtina wa kũkw’a. Mũno-mũno, mawono ma mũthemba ũsu monekaa kũasa mũno na vandũ vala mũndũ ũsu wekalaa. Ĩndĩ kweekũlye atĩĩ: ‘Wĩoneka wĩ ũndũ wa kĩlĩko kĩseo kwĩthĩwa kana ethĩwa mũndũ e na ũtonyi wa kũsyoka kuma kwa akw’ũ, no asyoke vandũ vaasa na andũ ma mũsyĩ wake na anyanyae?’

Na ĩngĩ-ĩ, vaitonyeka kwĩthĩwa kana mũndũ ũsu wonekete no mavw’anana na mũndũ ũla waminie ũkw’a? Kwa ngelekany’o, athũkũmi elĩ Aklĩsto maitavany’a kĩvalonĩ kĩmwe kya mĩũndanĩ nĩmoonie mũtumĩa amaumĩte ĩtina kwa masaa meana ũndũ mũna. Yĩla mamũkũlilye mokũlyo, meethĩie kana mũtumĩa ũsu eesilasya kana ũmwe wa athũkũmi asu aĩ mwana-a-inyia wakw’ie myaka mĩna mĩthelu. Kwa w’o, ndeesilasya ũndũ wa w’o, ĩndĩ nĩwaleile kwĩtĩkĩla kana yĩsilya yake yaĩ na mavĩtyo. Kwatata kũsũanĩa mũtumĩa ũsu esie kũtavya anyanyae na atũi make ngewa ya mũthemba mwaũ!

Vate nzika nĩwĩsĩ moseng’yo ala andũ monete, makew’a, kana makaota. Mawono asu ma vinya ũkĩlĩte ũla wa mũndũ mavinda maingĩ nĩmew’ĩthasya w’ĩa andũ ala mamonaa. Maleinĩ, ũla wekalaa Avilika ya Ũthũĩlonĩ wa Syũa, atindaa akĩw’a wasya wa ũsũe mũkw’ũ ũkĩmwĩta ũtukũ. E na w’ĩa mwingĩ mũno, Maleinĩ nĩwakayaa, akĩamũkya andũ ma mũsyĩ wake w’onthe. Ĩtina, nĩwesie kũthũka mũtwe.

Yuyu-ĩ, ethĩwa kwa w’o akw’ũ me thayũ, nĩ yĩsilya ya kĩlĩko kĩseo kwĩthĩwa no matelemye endwa moo? Ai, aiee. Kyumo kya movoo asu ma kwĩka andũ naĩ nĩ ndaimoni.

Ĩndĩ kũilyĩ ata ĩũlũ wa movoo ala monekaa ta ma kũtethya na ma kũkiakisya? Kwa ngelekany’o, Ngivasai, wa kuma Siela Lĩonĩ, aĩ mũwau. Mũndũ mũka ũsu nĩweethĩiwe na ndoto na nthĩnĩ wayo aumĩlĩĩlwa nĩ ĩthe wake mũkw’ũ. Ĩthe amwĩie nĩ athi mũtĩnĩ mũna, ose ĩtũ, ayĩvulany’e na kĩw’ũ, na aiyĩnyw’a. Mũndũ mũka ũsu ndaaĩlwe nĩ kũneena na mũndũ o na wĩva atekĩte ũu. Ũu nĩw’o weekie na avoa.

Mũndũ mũka ũngĩ awetie kana mũũme amumĩlĩĩle ĩtina wa ũtukũ ũmwe amina kũkw’a. Mũndũ mũka ũsu awetie kana mũũme oonekie e mũseo mũno na eekĩĩte ngũa mbanake.

Movoo na mawono ma mũthemba ũsu monekaa ta maseo na  ta me ũtethyo. Atĩĩ, maumaa kwa Ngai? Eka. Yeova nĩwe “Ngai wa w’o.” (Savuli 31:5) Ndatonya kwĩtĩkĩla kũtwĩkĩa ithyĩ kĩvw’ĩki kya metho kana kũtũkenga. Ndaimoni syĩ syoka nĩ syo syĩkaa ũu.

Ĩndĩ-ĩ, syo ndaimoni nzeo syĩ kw’o? Aiee. O na ethĩwa nitonya kwonekana ta syĩ na ũtethyo mavinda amwe, syonthe nĩ nthũku. Yĩla Ndevili waneenie na Eva, oonekie ta wĩ ũnyanya. (Mwambĩlĩlyo 3:1) Ĩndĩ mũndũ mũka ũsu aumĩlĩĩlwe nĩ ũndũ mwaũ amina kũmwĩthukĩĩsya na kwĩka ũndũ wawetie? Nĩwakwie.

Nĩwĩsĩ kana nĩ ũndũ wĩthĩawa mũno mũndũ mũthũku kũtuma ndũũ na andũ ala ũkwenda kũmakenga na kũmoĩvĩa. “Maeo nĩ meũ, ĩndĩ ngoo nĩ nziũ,” nĩw’o nthimo ĩmwe ya Kĩavilika ĩwetaa. Nayo Ndeto ya Ngai ĩwetaa atĩĩ: “Satani nake nĩwĩalyũlaa mwene ethĩwe ta mũlaĩka wa kyeni.”—2 Akolintho 11:14.

Ngai nĩwaekie kũvikĩsya andũ ũvoo kũũ nthĩ kwa nzĩa ya ndoto, mawono, kana mawasya kuma ũtũonĩ wa maveva. Amatongoeasya na kũmamanyĩsya kwĩsĩla nthĩnĩ wa Mbivilia, nayo nĩtonya kũtuma mũndũ “eanĩe kũtethya kĩla wĩa mũseo.”—2 Timotheo 3:17.

Kwoou, yĩla Yeova ũkũtũkany’a ĩũlũ wa ivw’ĩki sya metho sya Ndevili, we ekaa ũu nũndũ nũtwendete. Nĩwĩsĩ kana ndaimoni nĩ amaitha me mũisyo.