Yeova akaveta vyũ ũthũku w’onthe ũla Satani wĩkĩte. Yeova atw’ĩte Yesũ Mũsumbĩ ĩũlũ wa nthĩ yonthe. Uungu wa ũsumbĩki wake, nthĩ ĩkatuwa valatiso.—Ndanieli 7:13, 14; Luka 23:43.

Yeova eathana maũndũ aa:

• LĨU MWINGĨ: “Nthĩ nĩyingĩvĩtye ũsyao wayo: Ngai, o Ngai waitũ, akatũathima.” “Kũkeethĩwa lĩu mwingĩ mũno wa mbaa ngetha nthĩ iĩmanĩ ĩũlũ.”—Savuli 67:6; 72:16.

• KŨIKETHĨWA KAŨ ĨNGĨ: “Ũkai, sisyai mawĩa ma Yeova, ũndũ ũtw’ĩkĩthĩtye nthĩ nthei. Nake nũtumaa makaũ mathela kũvika kĩtulu kya nthĩ.”—Savuli 46:8, 9.

• KŨIKETHĨWA ANDŨ ATHŨKU: “Nĩkwĩthĩwa eki ma naĩ makavetwa . . . Vatiele ĩvinda ĩnini, na mũthũku ndakethĩwa: ĩĩ, ũkaketeea mũno vandũ vake, na ndakethĩwa.”—Savuli 37:9, 10.

•  KŨIKETHĨWA ŨWAU, KYEVA, KANA KĨKW’Ũ: “Nĩvo metho ma ililinda mesalukw’a, na matũ ma ala au matũ melindũka. Nĩvo mũndũ ũthuaa wĩtũlĩla ta ndaatai nũme, na ũĩmĩ wa ũla ũtaneenaa wĩina.”—Isaia 35:5, 6.

  “Na Ngai mwene akeethĩwa vamwe nao, Ngai woo: na akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”—Ũvuany’o 21:3, 4.

Kĩvathũkany’o na Satani na ndaimoni, Yeova ndaneenaa ũvũngũ nongi. Kĩla ũndũ ũwetete ndwĩ ndĩi ya kũlea kwĩanĩa. (Luka 1:36, 37) Yeova nũkwendete na eenda wĩkale nthĩnĩ wa Valatiso ĩla wĩseũvya. Kwoou neena na Ngũsĩ sya Yeova wĩmanyĩsye ũvoo mwingangĩ ĩũlũ wa mow’o maseo mũno ala me nthĩnĩ wa Ndeto ya Ngai. Waatĩĩa ũw’o ũsu nthĩnĩ wa thayũ waku, nũũthaw’a kuma ũkombonĩ wa ũvũngũ, w’ĩa ũkonetye mĩĩkĩĩo ya mavuso mathũku, wumw’e nthĩnĩ wa kwaa ũmanyi. Ĩtina wa ĩvinda ĩna, o na ũkathaw’a kuma ũkombonĩ wa naĩ na kĩkw’ũ. Tondũ Yesũ waisye: “Mũkamanya ũla w’o, na ũla w’o ũkamũthasya.”—Yoana 8:32.