ŨVOO WA KWONGELEELA
We Yesũ Asyaiwe Mwei wa 12?
MBIVILIA ndĩwetete yĩla Yesũ wasyaiwe. Ĩndĩ, nĩyonanĩtye kĩtumi kĩseo kya kwasya kana ndaasyawa Mwei wa 12.
Sũanĩa ũndũ Mbethi-leemu kũla Yesũ wasyaĩwe kwĩthĩawa kũilye Mwei wa 12. Mwei wa 9 wa kalenda ka Ayuti wĩtawa Kyiselevu (ũla waĩle kwĩthĩwa katĩ wa Mwei wa 11 na 12 nthĩnĩ wa kalenda kaitũ), weethĩawa wĩ mbua na mbevo. Mwei ũla waatĩĩe weetawa Tevethi (katĩ wa Mwei wa 12 na wa Mwei wa 1). Ĩvinda yĩu nĩw’o kweethĩawa kwĩ mbevo mbingĩ vyũ, o na mavinda angĩ nĩkweethĩawa ĩa kũndũ kũla kũtũlu. Eka twone ũndũ nzeve yaku yĩthĩawa ĩilyĩ kwĩanana na ũndũ Mbivilia ĩtũtavĩtye.
Esala mũandĩki wa Mbivilia oonanisye mwei wa Kyiselevu weethĩawa mbua na mbevo. Ĩtina wa kũweta andũ makomanĩte Yelusaleme “mwei wa kenda [Kyiselevu] mũthenya wa mĩongo ĩlĩ wa mwei,” Esala aisye kana andũ asu ‘nĩmatetemaa nũndũ wa mbua nene.’ Nũndũ kwaĩ ĩvinda ya mbua, andũ asu moombanĩte maisye: “Nĩ ĩvinda ya mbua nyingĩ na tũitonya kũũngama nza.” (Esala 10:9, 13; Yelemia 36:22) Nĩkyo kĩtumi aĩthi ma ku mavingĩaa indo syoo ũtukũ Mwei wa ĩkũmi na ilĩ wavika!
Ĩndĩ Mbivilia ĩwetete kana ũtukũ ũla Yesũ wasyaiwe aĩthi maĩ kĩthekanĩ maiĩthya indo syoo. Luka mũandĩki wa Mbivilia onanĩtye kana ĩvinda yĩu Yesũ wasyaiwe, aĩthi “mekalaa weũnĩ maisyaĩĩsya indo syoo ũtukũ” vakuvĩ na Mbethi-leemu. (Luka 2:8-12) Aĩthi metw’ĩka mekalaa nza ũtukũ na mũthenya, ĩndĩ ti mũthenya w’oka. Meethĩawa na indo syoo kĩthekanĩ ũtukũ. Wĩona aĩthi asu ta maĩ mekala kĩthekanĩ ũtukũ na mũthenya kwĩ mbua na mbevo ũndũ Mbethi-leemu kwĩthĩawa kũilye Mwei wa ĩkũmi na ilĩ? Vaitonyeka. Kwoou maũndũ ala twĩsĩ ĩũlũ wa yĩla Yesũ wasyaiwe monanasya kana ndaasyawa Mwei wa 12. *
Ndeto ya Ngai nĩtũtavĩtye nesa vyũ yĩla Yesũ wakwie, ĩndĩ ndĩwetete maũndũ maingĩ ĩũlũ wa yĩla wasyaiwe. Ũu ũtũlilikanasya ndeto ii sya Mũsumbĩ Solomoni: “Syĩtwa ĩseo yĩ kavaa kwĩ mauta me vata mũno; na mũthenya wa kũkw’a wĩ kavaa kwĩ mũthenya wa kũsyawa kwa mũndũ.” (Mũtavan’ya 7:1) Kwoou ti ũndũ wa ũsengy’a kwĩthĩwa Mbivilia nĩtũtavĩtye ũvoo mwingĩ ĩũlũ wa ũtavany’a wa Yesũ na kĩkw’ũ kyake, na kũtũtavya ũvoo o mũnini ĩũlũ wa kũsyawa kwake.
Yĩla Yesũ wasyaiwe, aĩthi maĩ kĩthekanĩ na indo syoo ũtukũ
^ kal. 1 Soma ũvoo mwingangĩ nthĩnĩ wa ĩvuku ya Kutoa Sababu Kwa Kutumia Maandiko, ĩthangũ ya 275-279 Ĩvuku yĩu yĩkyavĩthĩtw’e nĩ Ngũsĩ sya Yeova.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Nĩkĩ Ngũsĩ sya Yeova Itatanĩaa Kĩlisimasi?
Andũ aingĩ nĩmatanĩaa Kĩlisimasi o na kau nĩmesĩ kana ndyumanĩte na Mbivilia. Soma ũmanye nĩkĩ Ngũsĩ sya Yeova itatanĩaa Kĩlisimasi.
MOSŨNGĨO MA MAKŨLYO MA MBIVILIA
We Yesũ Asyaiwe Ĩndĩĩ?
Sisya ũmanye nĩkĩ Kĩlisimasi yeekĩiwe matukũ 25, Mwei wa 12.
