VAIĨ mũndũ ũtakwatawa nĩ mathĩna, o na athũkũmi ma Ngai. Mũandĩki wa Savuli aisye atĩĩ: ‘Mosũanĩo makwa maĩ maingĩ nthĩnĩ wakwa.’ (Savuli 94:19) Nake Yesũ aisye kana ĩvindanĩ ya mũminũkĩlyo “mawĩmakĩo ma thayũ” maĩ matume wĩthĩwa ũte ũndũ wĩ laisi kũmũthũkũma Yeova. (Luka 21:34) Nao nata ĩũlũ waku? Nĩwĩw’aa ũvinyĩĩwe nĩ mathĩna ma mbesa, mũsyĩ, kana mowau? Yeova atonya kũũtetheesya ata kũmĩĩsya mathĩna asu?

Tũyĩsa kũmina mathĩna kwa vinya witũ. Mũtũmwa Vaulo aisye atĩĩ: “Nĩtũlĩlĩĩlawa ngalĩ syonthe.” Ongeleeile kwasya: ‘Nĩtũsũanĩawa, na tũkavalũkw’a nthĩ.’ Ĩndĩ o na ũu wĩ o vo, aisye kana maũndũ asu maitumaa twĩw’a ta twĩ ‘athyũlũlũke’ na makatuma ‘twĩyĩtũka’ na ‘kwanangwa.’ Nĩ kyaũ kĩtũtetheeasya kũmĩĩsya? Tũtetheeaw’a nĩ ‘vinya mũnene ũvĩtũkĩte.’ Vinya ũsu tũnengawe nĩ Ngai mwene vinya w’onthe, Yeova.—2 Akolintho 4:7-9.

Kwalilikana ũndũ ĩvinda yĩmwe wakwatie “vinya ũsu mũnene ũvĩtũkĩte.” Nũlilikene ũndũ ũvoo mũna wakwĩkĩie vinya ũendeee kwona wendo mũnene wa Yeova? Nao nata ĩla watavasya angĩ ĩũlũ wa wĩkwatyo wa Nthĩ Nzaũ, nĩweew’aa mũĩkĩĩo waku kwa mawatho ma Yeova walũlũmĩĩlw’a? Ĩla twathi maũmbanonĩ ma Kĩklĩsto na twatavya angĩ ũvoo mũseo, nĩtũkwataa vinya wa kũmĩĩsya mawĩmakĩo ma thayũ, na tũikwata mũuo wa kĩlĩko nĩ kana tũmũthũkũme Yeova twĩ atanu.

Kwa w’o nũtonya kwĩw’a ũvinyĩĩwe mũno nũndũ wa maũndũ kwingĩva. Kwa ngelekany’o, Yeova atwĩĩte tũmanthe Ũsumbĩ mbee, na tũyĩthĩwa na mĩvango mĩseo ya maũndũ ma kĩ-veva. (Mathayo 6:33; Luka 13:24) Nao nata ũvĩnganĩsya, ũwau, kana mathĩna ma mũsyĩ makethĩwa maũsiĩĩe kwĩanĩsya maũndũ maingĩ ũndũ ũkwenda? Nao nata ethĩwa wĩa waku nũkuaa masaa maingĩ na ũkatũmĩa vinya mwingĩ waĩle kũtũmĩa kĩkundinĩ? Maũndũ asu nĩmatonya kũtuma wĩw’a ũte na ĩvinda kana vinya wĩanĩtye wa kũmeanĩsya, na ũndũ ũsu nũtonya kũtuma ũkw’a ngoo. O na nũtonya kwona Yeova ta ũkwenda wĩanĩsye maũndũ maingĩ ũtatonya.

Yeova nũtũeleawa vyũ. Ndendaa twĩanĩsye maũndũ tũtatonya. O na nĩwĩsĩ kana nĩtwendaa ĩvinda nĩ kana tũkwate ĩngĩ vinya ĩla twakwatwa nĩ mathĩna ma mwĩĩ na ma ngoo.—Savuli 103:13, 14.

Kwa ngelekany’o, sũanĩa ũndũ Yeova wamũsũvĩie mwathani Eliya. Ĩla Eliya wakwie ngoo na akwatwa nĩ wia nginya athi kwĩvitha weũnĩ, yo Yeova nĩwamũsomeie mwathani ũsu na amwĩa asyoke wĩanĩ ũla wamũnengete? Aiee. Mavinda elĩ, Yeova nĩwatũmie mũlaĩka akamũamũkye Eliya o kavola, na aimũnenga lĩu. Ĩndĩ o na ũu wĩ o vo, mĩthenya 40 ĩtina wa ũu, Eliya no weemakĩe  na aĩ na wia. Nĩ ũndũ ũngĩ mwaũ Yeova weekie nĩ kana amũtetheesye Eliya? Mbee, Yeova nĩwamwonisye Eliya kana e na ũtonyi wa kũmũsũvĩa. Ũndũ wa kelĩ, Yeova nĩwamũkiakĩisye Eliya na “wasya mũnini mũuu.” Na ĩndĩ ĩtina Yeova amũtavya Eliya kana ve andũ angĩ ngili mbingĩ ala maĩ athaithi make aĩkĩĩku. Ĩtina wa ĩvinda ĩkuvĩ, Eliya nĩwasyokie wĩanĩ wake wa kwathana e mũthangaau. (1 Asumbĩ 19:1-19) Ũndũ ũsu wĩtũmanyĩsya kyaũ? Yĩla Eliya waemeewe nĩ mawĩmakĩo maingĩ, Yeova nĩwamwonisye tei na wũmĩĩsyo. Yeova ndaavĩndũka. Nũtũthĩnĩkĩaa o ũndũ wathĩnĩkĩie Eliya.

Ĩla ũũsũanĩa kĩla ũtonya kwĩka ũthũkũminĩ wa Yeova, ndũkavangĩĩe kwĩka maũndũ ũtatonya. Ndũkaelekany’e maũndũ ala weekaa tene na ala ũtonya kwĩka ũmũnthĩ. Kwasũanĩa ngelekany’o ya mũndũ waĩ mũsembi, na aeka kũsemba kwa ĩvinda ya myei kauta, kana myaka. We wĩona mũsembi ũsu ta ũtonya kũsyoka kĩwanzanĩ na aisemba o ta tene? Aiee, ĩndĩ vandũ va ũu ambĩĩaa o kavola nginya akesa kũkwata vinya ũkethĩa no asembe ũndũ wasembaa tene. Aklĩsto methĩawa mailyĩ o ta asembi. Masembaa me na kĩeleelo. (1 Akolintho 9:24-27) Tyo ũvange kwĩanĩsya o ũndũ ũmwe wa kĩ-veva ũla ũkwona ũtonya kwĩanĩsya na mĩtũkĩ? Kwa ngelekany’o, no wĩke mũvango wa kũthi ũmbanonĩ ũmwe wa Kĩklĩsto. Mũkũlye Yeova akũtetheesye kwĩanĩsya mũvango ũsu. O ũndũ ũendeee kũkwata vinya wa kĩ-veva, now’o ũkethĩwa ũtonya ‘kũsama na kũsisya kana Yeova nĩ mũseo.’ (Savuli 34:8) Lilikana kana ũndũ w’onthe ũkwĩka nĩ kana wonany’e wendo waku kwa Yeova, o na ethĩwa wĩana ata, Yeova nũwonaa wĩ wa vata mũno.—Luka 21:1-4.

Yeova amwĩkĩie June vinya ata amũsyokee? Aĩtye atĩĩ: “Namũvoyaa Yeova na kĩthito nĩ kana andetheesye. Mũthenya ũmwe mũka wa mwanawa nĩwandavisye ĩũlũ wa ũmbano mũnene waĩ taoninĩ ĩla nekalaa. Navangie nĩthi ũmbanonĩ ũsu mũthenya ũmwe tũ. Neewie mũyo mũno nũndũ wa kwĩthĩwa na andũ ma Yeova ĩngĩ! Ũmbano ũsu nĩw’o wambĩkĩie vinya ũla nendaa. Na yu nĩnĩmũthũkũmaa Yeova nĩ mũtanu. Yu nĩ na kĩtumi kĩseo kya kwĩthĩwa nĩ thayũ. Na nĩnĩsĩ kana naĩle kwĩthĩwa na ana-a-asa na eĩtu-a-asa makwa na ndyĩtĩkĩla ũtethyo woo. Nĩnĩtũngaa mũvea mũno nũndũ naĩ na ĩvinda ya kũmũsyokea Yeova.”