NGEWA YA 5
Mbua ya Kĩw’ũ Kingĩ—Ala Meethukĩĩisye, Ala Mataaĩthukĩĩsya
Aingĩ ĩvinda ya Noa meekaa mothũku. Mwambĩlĩlyo 6:5
Atamu na Eva nĩmasyaie, kwoou andũ mongeleka ĩũlũ wa nthĩ. Ĩtina wa ĩvinda, alaĩka amwe nĩmeekwatanisye na ũlei wa Satani.
Nĩmookie kũũ nthĩ na meekĩa mĩĩ ya andũ nĩ kana matwae aka. Aka asu nĩmasyaie mamũndũ manene ma ũkĩwa na me vinya.
Nthĩ nĩyausũiwe nĩ andũ athũku. Mbivilia yaĩtye: “Ũthũku wa mũndũ waĩ mũnene kũũ nthĩ, na kĩla kĩsũanĩo kya malilikano ma ngoo yake kyaĩ kyathe vyũ mavinda onthe.”
Noa nĩweethukĩĩisye Ngai na aaka ngalawa. Mwambĩlĩlyo 6:13, 14, 18, 19, 22
Noa aĩ mũndũ mũseo. Yeova atavisye Noa kana avangĩte kwananga andũ athũku na mbua ya kĩw’ũ kingĩ.
Ĩngĩ Ngai nĩwatavisye Noa ake ĩsiwa ĩnene, yĩtawa ngalawa, na ailikya andũ make na nyamũ sya mĩthemba yonthe.
Noa nĩwakanisye andũ ĩũlũ wa Mbua ya Kĩw’ũ Kingĩ ĩla yookĩte, ĩndĩ mayaaĩthukĩĩsya. Amwe nĩmamũthekeeie Noa; na angĩ mamũmena.
Ngalawa yamina kwakwa, Noa nĩwalikilye nyamũ nthĩnĩ.
