ĨSOMO YA 15
We Yesũ Nũũ?
Yesũ nĩ ũmwe katĩ wa andũ ala mesĩkĩe mũno maaĩthĩwa vaa ĩũlũ wa nthĩ. Ĩndĩ o na vailye ũu, andũ aingĩ mayĩsĩ maũndũ maingĩ ĩũlũ wake, mesĩ o yĩsyĩtwa tũ. Namo angĩ methĩawa na mawoni me kĩvathũkanyʼo ĩũlũ wake. Mbivilia yaasya ata ĩũlũ wa Yesũ?
1. We Yesũ nũũ?
Yesũ nĩ kyũmbe kya veva kĩ vinya, na ekalaa ĩtunĩ. Yeova Ngai amũmbie mbee wa syĩndũ ila ingĩ syonthe. Na nũndũ wa kĩtumi kĩu, “nĩwe wa mbee katĩ wa syĩndũ syonthe ila syoombiwe.” (Akolosai 1:15) Mbivilia ĩmwĩtĩte “Mwana wake e ũmwe,” nĩkwĩthĩwa nowe e weka woombiwe nĩ Yeova ĩmwe kwa ĩmwe. (Yoana 3:16) Yesũ nĩwathũkũmie e vakuvĩ na Ĩthe wake, Yeova, aimũtetheesya kũmba syĩndũ ila ingĩ syonthe. (Soma Nthimo 8:30.) O na ũmũnthĩ, Yesũ nĩwĩthĩawa na ngwatanĩo ya vakuvĩ vamwe na Yeova. O na ĩngĩ etĩtwe “ĩla Ndeto,” nĩkwĩthĩwa aneenaa vandũ va Ngai, aitavya syũmbe ila ingĩ ũtũmani wa Ngai na myolooto yake.—Yoana 1:14.
2. Nĩkĩ Yesũ wookie ĩũlũ wa nthĩ?
Vakuvĩ myaka 2,000 mĩvĩtu, Yeova nĩwathamisye thayũ wa Yesũ kuma ĩtunĩ kwa nzĩa ya kyama, atũmĩĩte veva wake mũtheu, na awĩkĩa ĩvunĩ ya mũndũ mũka ũteesĩ mũndũũme ũla weetawa Meli. Na nũndũ wa kĩtumi kĩu, Yesũ asyawa kũũ ĩũlũ wa nthĩ ta mũndũ. (Soma Luka 1:34, 35.) Yesũ ookie ĩũlũ wa nthĩ nĩ kana atwʼĩke ũla Masia waathanĩtwe, kana Klĩsto, na aitangĩĩa andũ. a Yesũ nĩweanĩisye mawathani onthe ala makonetye Masia, na kĩu kyatetheesya andũ kũmanya kana nĩwe “Klĩsto, Mwana wa Ngai ũla wĩ thayũ.”—Mathayo 16:16.
3. Yesũ e va yu?
Ĩtina wa Yesũ kũkwʼa, Yeova nĩwamũthayũũkisye e kyũmbe kya veva na asyoka ĩtunĩ. Ĩtina wa ũu, “Ngai nĩwamũnenevisye mũno.” (Avilivi 2:9) Oyu Yesũ e na ũkũmũ mũnene mũno, nũndũ nĩwe wa kelĩ kuma vala ve Yeova.
ĨMANYĨSYE MŨNANGO
Ĩmanyĩsye mũnango nĩ kana ũmũmanye Yesũ nesanga, na ũimanya nĩkĩ nĩ ũndũ wa vata kwĩmanyĩsya ĩũlũ wake.
4. Yesũ ti Ngai Mwene Vinya Wʼonthe
Mbivilia ĩmanyĩasya kana o na kau Yesũ nĩ kyũmbe kya veva kĩ vinya ĩtunĩ, nũmwĩwʼaa Ngai wake na Ĩthe wake, ũla nĩ Yeova. Nĩkĩ tũtonya kwasya ũu? Ĩloelei VITIO nĩ kana mũmanye ũndũ mbivilia ĩmanyĩasya ĩũlũ wa kĩanda kya Yesũ, aelekanwʼa na Ngai Mwene Vinya Wʼonthe.
Maandĩko aa maatĩĩe nĩmeũtũtetheesya kũelewa kĩvathũkanyʼo kĩla kĩ vo katĩ wa Yeova na Yesũ. Somai maandĩko onthe na ĩndĩ mũineenea makũlyo ala me ĩtheo wa kĩla ĩandĩko.
Somai Luka 1:30-32.
-
Mũlaĩka oonanisye ata kĩvathũkanyʼo kĩla kĩ vo katĩ wa Yesũ, na Yeova Ngai, “Ũla wĩ Ĩũlũ wa Onthe”?
Somai Mathayo 3:16, 17.
-
Yĩla Yesũ wavatisawa, wasya ũla weewʼĩkie kuma ĩtunĩ waisye ata?
-
We wĩona wasya ũsu ta waĩ waũ?
Somai Yoana 14:28.
-
Nũũ wĩthĩawa e mũkũangũ na e na ũkũmũ mũnenange? Nĩ ĩthe kana nĩ mwana?
-
Yĩla Yesũ waisye kana Yeova nĩ Ĩthe wake, we oonanasya ata?
Somai Yoana 12:49.
-
We Yesũ asũanĩaa kana e na Ĩthe wake nĩmeanene? We wĩona ata?
5. Nĩ kyaũ kyaĩkĩĩthisye kana Yesũ nĩwe Masia?
Mbivilia yĩ na mawathani maingĩ ala maĩ matetheesye andũ kũmanya Masia ũla wathanĩtwe, ũla Ngai wamũnyuvĩte nĩ kana atangĩĩe andũ. Ĩloelei VITIO nĩ kana mwone o kwa ũkuvĩ ĩũlũ wa mawathani amwe ala Yesũ weanĩisye yĩla wookie ĩũlũ wa nthĩ.
Somai mawathani aa ma Mbivilia na ĩndĩ mũineenea makũlyo ala me ĩtheo wa kĩla ĩandĩko:
Somai Mika 5:2 nĩ kana mwone vala Masia wesaa kũsyaĩwa. b
-
Wathani ũsu nĩweanĩie twasũanĩa vala Yesũ wasyaĩwe?—Mathayo 2:1.
Somai Savuli 34:20 na Nzekalia 12:10 mwone maũndũ amwe maathanĩtwe ĩũlũ wa kĩkwʼũ kya Masia.
-
Mo mawathani asu nĩmeanĩiwʼe? —Yoana 19:33-37.
-
We nũkwona Yesũ tawe wavangĩthisye maũndũ tene nĩ kana mawathani asu makonetye Masia meanĩe?
-
Ũndũ ũsu wĩkũĩkĩĩthya kyaũ ĩũlũ wa Yesũ?
6. Nĩtũtethekaa tweemanyĩsya ĩũlũ wa Yesũ
Mbivilia nĩyonanĩtye vata wa kwĩmanyĩsya ĩũlũ wa Yesũ na kĩanda kyake. Somai Yoana 14:6 na 17:3, na ĩndĩ mũineenea ĩkũlyo yĩĩ:
-
Nĩkĩ nĩ ũndũ wa vata kwĩmanyĩsya ĩũlũ wa Yesũ?
Yesũ nĩwatũvingũĩe nzĩa nĩ kana tũtwʼĩke anyanya ma Ngai. Nĩwamanyĩisye ũwʼo ĩũlũ wa Yeova, na tũkakwata thayũ wa tene na tene kwĩsĩla kwake
ANDŨ AMWE MAASYA: “Ngũsĩ sya Yeova iimũĩkĩĩaa Yesũ.”
-
We ũtonya kwasya ata?
KĨLA TWEEMANYĨSYA
Yesũ nĩ kyũmbe kya veva kĩ vinya. O na ĩngĩ nĩ Mwana wa Ngai, na nĩwe Masia.
Makũlyo ma Kũsyokeleela
-
Nĩkĩ Mbivilia yaĩtye kana Yesũ “nĩwe wa mbee katĩ wa syĩndũ syonthe ila syoombiwe”?
-
Yesũ eekaa ata atanamba kũka ĩũlũ wa nthĩ?
-
Twĩsĩ ata kana Yesũ nĩwe Masia?
MAŨNDŨ ANGĨ MA KWĨMANYĨSYA
Ĩmanyĩsye wone nĩkĩ tũte na nzika kana Yesũ nĩwe Masia.
“Mo Mawathani Ala Mawetete Ĩũlũ wa Masia Nĩmaĩkĩĩthĩtye Kana Yesũ Nĩwe Masia?” (Ũvoo wĩ kĩsesenĩ)
Ĩmanyĩsye wone ethĩwa Mbivilia ĩmanyĩasya kana Ngai asyaie Yesũ o tondũ syana sya andũ isyaawa.
Ĩmanyĩsye wone nĩkĩ ũmanyĩsyo wa Ũtatũ ũte Mbivilianĩ.
Soma wone ũndũ mũndũ mũka ũmwe wavĩndũkie ĩtina wa kũmanya kĩla Mbivilia ĩmanyĩasya ĩũlũ wa Yesũ.
a Ĩsomonĩ ya 26 na 27 tũkoona nĩkĩ andũ maĩ na vata wa kũtangĩĩwa, na ũndũ Yesũ ũkatũtangĩĩa vyũ.
b Sisya Maelesyo ma Mũthya Namba 2 ala maneeneete wathani ũla wonanĩtye ĩvinda yĩla Yesũ waĩ oke ĩũlũ wa nthĩ.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
