ĨSOMO YA 20
Ũndũ Kĩkundi kya Kĩklĩsto Kĩvangĩtwe
Yeova ti Ngai wa kĩthokoanyʼo. (1 Akolintho 14:33) Kwoou o namo ala mamũthaithaa maĩlĩte kwĩthĩwa mavangĩtwe nesa. Kyo kĩkundi kya Kĩklĩsto kĩvangĩtwe ata? Na tũtonya kwĩka ata nĩ kana kĩendeee nesa?
1. Kĩkundi kya Kĩklĩsto kĩtongoewʼe nũũ?
“Klĩsto [nĩwe] mũtwe wa kĩkundi.” (Aeveso 5:23) O na kau e ĩtunĩ, nĩwe ũtongoesye maũndũ ala mekawa nĩ athũkũmi ma Yeova nthĩ yonthe. Yesũ nũnyuvĩte “ngombo ndĩkĩĩku na mbũĩ,” ĩla nĩ kakundi kanini ka atumĩa aimu kĩ-veva, na nomo metawa Nzama Ĩla Ĩtongoesye. (Soma Mathayo 24:45-47.) O ta atũmwa na atumĩa ala maĩ Yelusaleme, ũmũnthĩ Nzama Ĩla Ĩtongoesye nĩnengae ikundi syonthe ĩũlũ wa nthĩ myolooto. (Meko ma Atũmwa 15:2) Ĩndĩ atumĩa asu ti mo atongoi ma ũseũvyo witũ. Nĩmekwatasya Yeova amatongoesye kwa kũsoma Ndeto yake, na nĩmenyivĩasya ũkũmũ wa Yesũ.
2. Atumĩa ma kĩkundi naaũ na methĩawa na kĩanda kĩva?
Atumĩa nĩ aũme Aklĩsto, ala methĩawa me aimu kĩ-veva, mamanyĩasya kuma Maandĩkonĩ, na nĩmasũvĩaa andũ ma Yeova kwa kũmatetheesya na kũmekĩa vinya. Mayĩĩvawa nĩ kana matethye wĩa woo. Vandũ va ũu, meyumasya ‘na ngenda methonĩ ma Ngai; mate kwenda kwĩyĩuna ene, ĩndĩ mekaa ũu na mea.’ (1 Vetelo 5:1, 2) Atumĩa matetheeawʼa nĩ atetheesya ma kĩkundi, ala ĩtina o namo methĩawa matonya kũtwʼĩka atũmĩa ma kĩkundi.
Nzama Ĩla Ĩtongoesye nĩnyuvaa atumĩa amwe methĩwe asyaĩĩsya ma mũthyũlũlũko. Asyaĩĩsya asu nĩmathokeaa ikundi syĩ kĩvathũkanyʼo nĩ kana masyĩkĩe vinya na mayĩinenga myolooto ya Mbivilia. O na nĩmanyuvaa ana-a-asa amwe matwʼĩke atumĩa na atetheesya ma kĩkundi, ethĩwa nĩmeanĩĩtye maũndũ ala mawetetwe Maandĩkonĩ.—1 Timotheo 3:1-10, 12; Tito 1:5-9.
3. Kĩla ũmwe wa Ngũsĩ sya Yeova ethĩawa na kĩanda kĩva?
Onthe nthĩnĩ wa kĩkundi ‘nĩmataĩaa ĩsyĩtwa ya Yeova’ kwa kũmwinĩa, kumya maelesyo yĩla me maũmbanonĩ, na maũndũ angĩ ta asu. O na nĩmakwataa ũtavanyʼa mbau kwosana na ũtonyi wa kĩla ũmwe.—Soma Savuli 148:12, 13.
ĨMANYĨSYE MŨNANGO
Ĩmanyĩsye ũmanye Yesũ nĩ mũtongoi ũilye ata, ũndũ atumĩa matataa kũatĩĩa ngelekanyʼo yake, na ũndũ twaĩle kwĩwʼaa Yesũ vamwe na atumĩa ma kĩkundi.
4. Yesũ nĩ mũtongoi wĩ tei
Ve ũndũ wa vata mũno Yesũ ũtũthoketye twĩke. Somai Mathayo 11:28-30, na ĩndĩ mũineenea ĩkũlyo yĩĩ:
-
Yesũ endaa twĩwʼe ata yĩla ũtũtongoesye?
Atumĩa maatĩĩaa ngelekanyʼo ya Yesũ ata? Ĩloelei VITIO.
Mbivilia nĩyonanĩtye ũtheinĩ ũndũ atumĩa maĩle kũtethya wĩa woo.
Somai Isaia 32:2 na 1 Vetelo 5:1-3, na ĩndĩ mũineenea makũlyo aa:
-
We weewʼa ata wamanya kana atumĩa nĩmatataa kũatĩĩa ngelekanyʼo ya Yesũ kwa kũtũtetheesya twĩwʼe twĩ eanĩe?
-
Atumĩa matataa kũatĩĩa ngelekanyʼo ya Yesũ kwa nzĩa ingĩ ta syĩva?
5. Atumĩa mamanyĩasya kwĩsĩla ngelekanyʼo yoo
Yesũ endaa atumĩa mone kĩanda kyoo ata? Ĩloelei VITIO.
Yesũ nĩwanengie ala matongoetye nthĩnĩ wa kĩkundi myolooto ya kũatĩĩa. Somai Mathayo 23:8-12, na ĩndĩ mũineenea ĩkũlyo yĩĩ:
-
Waelekanyʼa ũndũ atumĩa mekaa maũndũ maatĩĩe myolooto ya Mbivilia, na maũndũ ala wĩyoneete atongoi ma ndĩni mayĩka, nĩ kyaũ kĩũkwendeesya mũno?
-
Atumĩa nĩmaĩkĩĩthasya kana mo vamwe na mĩsyĩ yoo, nĩ alũmu kĩ-veva
-
Atumĩa nĩmasũvĩaa kĩla ũmwe nthĩnĩ wa kĩkundi
-
Atumĩa nĩmatavanasya na kĩthito
-
Atumĩa nĩmamanyĩasya. O na nĩmatetheeasya kũthesya Nyũmba ya Ũsumbĩ na maũndũ angĩ ta asu
6. Nĩtũtonya kũkwata atumĩa mbau
Mbivilia nĩtũtavĩtye nĩkĩ twaĩle kũmewʼaa atumĩa. Somai Aevelania 13:17, na ĩndĩ mũineenea makũlyo aa:
-
Nĩkĩ Mbivilia ĩtwĩĩte tũmewʼae ala matongoetye na tũimenyivĩsya? We nũkwona ũndũ ũsu wosanĩte na kĩlĩko?
Somai Luka 16:10, na ĩndĩ mũineenea ĩkũlyo yĩĩ:
-
Nĩkĩ nĩ ũndũ wa vata tũkamewʼaa atumĩa o na tũmaũndũnĩ tũla tũnini?
ANDŨ AMWE MAASYA: “Ti nginya wĩthĩwe wĩ wa ndĩni na.”
-
We wĩona nĩ moathimo meva mũndũ ũtonya kũkwata amũthaitha Ngai e vamwe na ala angĩ kĩkundinĩ?
KĨLA TWEEMANYĨSYA
Yesũ nĩwe mũtwe wa kĩkundi kya Kĩklĩsto. Nĩtũtanĩaa kũkwata atumĩa mbau nũndũ nĩmatumaa twĩkala twĩ eanĩe, na matũmanyĩasya kwĩsĩla ngelekanyʼo yoo.
Makũlyo ma Kũsyokeleela
-
Nũũ ũla ũtongoesye kĩkundi kya Kĩklĩsto?
-
Atumĩa matethasya kĩkundi ata?
-
Kĩla ũmwe wa athũkũmi ma Yeova e na kĩanda kĩva?
MAŨNDŨ ANGĨ MA KWĨMANYĨSYA
Ĩloele vitio wone maũndũ meũkũĩkĩĩthya kana Nzama Ĩla Ĩtongoesye, na atumĩa, nĩmathĩnĩkĩaa kĩkundi.
Ĩloele vitio wone wĩa ũla ũtethawʼa nĩ asyaĩĩsya ma mũthyũlũlũko.
Soma ũmanye kĩanda kya mwanya kĩla aka methĩawa nakyo kĩkundinĩ.
“Aka ma Ngũsĩ sya Yeova Nĩmamanyĩasya?” (Mũsyaĩĩsya, Ĩtukũ 1, Mwei wa 9, 2012)
Soma wone ũndũ atumĩa mekĩaa kĩthito kingĩ nĩ kana mekĩe ana-a-asa na eĩtu-a-asa vinya.
“Atumĩa Aklĩsto ‘Atethya ma Wĩa Kwondũ wa Ũtanu Witũ’” (Mũsyaĩĩsya, Ĩtukũ 1, Mwei wa 1, 2013)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
