ĨSOMO YA 49
Mũsyĩ Waku Ũtonya Kwĩthĩwa na Ũtanu Ata?—Kĩlungu kya 1
Andũ matwaana mekwatasya kana ũtanu ũla maĩ nawʼo mũthenya woo wa alũsi wĩendeea kwĩthĩwa vo ĩvinda yonthe. Na ti aĩ ũu ndũtonyeka. Aklĩsto ala methĩĩtwe mũtwaanonĩ kwa ĩvinda yĩasa na mekĩĩte kĩthito kũatĩĩa ũtao wa Mbivilia nĩmesĩ kana ũsu nĩ ũndũ ũtonyeka.
1. Nĩ ũtao wĩva Mbivilia ĩnengete aũme?
Yeova nũnyuvĩte mũũme ethĩwe mũtwe wa mũsyĩ wake. (Soma Aeveso 5:23.) Yeova endaa eke motwi matonya kũtethya mũsyĩ wake. Mbivilia ĩtavĩtye aũme atĩĩ: “Endeeai kũsyenda iveti syenyu.” (Aeveso 5:25) Ũu nĩ kwasya ata? Mũndũũme wendete kĩveti kyake nũkĩkaa maũndũ maseo, yĩla me mũsyĩ kana me andũnĩ. Nũkĩsũvĩaa kĩikaũmĩwʼe nĩ ũndũ o na wĩva, na ayĩka kyonthe kĩla ũtonya nĩ kana akĩanĩĩsye mavata makyo ma kĩ-mwĩĩ na ma ngoonĩ. (1 Timotheo 5:8) Na ũndũ ũla wa vata, nũkĩtetheeasya nĩ kana kĩthĩwe na ngwatanĩo nzeo vamwe na Yeova. (Mathayo 4:4) Kwa ngelekanyʼo, no masome Mbivilia na maivoya me vamwe. Yĩla mũũme wasũvĩa mũka kwa nzĩa ya wendo, nũendeeaa kwĩthĩwa na ngwatanĩo nzeo vamwe na Yeova.—Soma 1 Vetelo 3:7.
2. Nĩ ũtao wĩva Mbivilia ĩnengete iveti?
Ndeto ya Ngai yaĩtye kana kĩveti “kyaĩle kũmũnenga mũũme wakyo ndaĩa nene.” (Aeveso 5:33) Kĩtonya kwĩka ũu ata? No kĩsũanĩe ĩũlũ wa nguma nzeo ila mũũme wĩthĩawa nasyo na kĩthito kĩla wĩkĩaa nĩ kana akĩsũvĩe vamwe na syana syoo. O na ĩngĩ no kyonanyʼe kana nĩkĩmũnengete ndaĩa kwa kũkwataa mbau motwi ala ũkwĩka, kũmũneenasya nesa, na kũneenaa maũndũ maseo ĩũlũ wake, o na ethĩwa ndamũthaithaa Yeova.
3. Mũũme na mũka matonya kũlũlũmĩĩlya mũtwaano woo ata?
Mbivilia yaĩtye ũũ ĩũlũ wa mũũme na mũka: “Elĩ makeethĩwa mwĩĩ ũmwe.” (Mathayo 19:5) Ũu nĩ kwasya kana no nginya mokitane na ũndũ o na wĩva ũla ũtonya kũtuma wendo woo ũvoa. Mekaa ũu kwa kũtũmĩa ĩvinda vamwe, na kĩla ũmwe ayĩeleasya ũla ũngĩ ũndũ ũkwĩwʼa kuma ngoonĩ ate kũmũvitha kĩndũ. Mayaĩlĩte kwĩtĩkĩlya kĩndũ kana mũndũ o na wĩva ethĩwe e wa vata mũno kwĩ ũla ũtwaanĩte nake, ate o Yeova. Nĩmaĩlĩte kwĩthĩwa me metho mũno maikethĩwe na ndũũ ĩthonokete na mũndũ ũngĩ.
ĨMANYĨSYE MŨNANGO
Sisya wone nĩ myolooto yĩva ya Mbivilia ĩtonya kũlũlũmĩĩlya mũtwaano waku.
4. Aũme—endai na mũisũvĩa iveti syenyu
Mbivilia yaĩtye kana “aũme maĩle kũsyenda iveti syoo o ta mĩĩ yoo ene.” (Aeveso 5:28, 29) Ũu wĩonanyʼa ata? Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Nĩ maũndũ ta meva mũũme ũtonya kwĩka akonanyʼa kana nĩwendete mũka na nũmũsũvĩaa?
Somai Akolosai 3:12, na ĩndĩ mũineenea ĩkũlyo yĩĩ:
-
Mũndũũme atonya kwonanyʼa nguma isu ata mũtwaanonĩ wake?
5. Iveti—endai aũme menyu na mũimanenga ndaĩa
Mbivilia ĩtavĩtye kĩveti kĩnenge mũũme wakyo ndaĩa o na ethĩwa ndamũthaithaa Yeova. Somai 1 Vetelo 3:1, 2, na ĩndĩ mũineenea makũlyo aa:
-
Ethĩwa ũtwaĩtwe nĩ mũndũ ũtamũthaithaa Yeova, vate nzika nĩwendaa o nake ambĩĩe kũmũthaitha. We wĩona nĩ kyaũ kĩtonya ũkũtethya? Nĩ kũmũtavasya ĩũlũ wa kĩla ũĩkĩĩaa kĩla ĩvinda-ĩ, kana nĩkwĩthĩwa na mwĩkalĩle mũseo na ũimũnenga ndaĩa? Nĩkĩ wasũngĩa ũu?
Mũũme na mũka no meke motwi maseo me vamwe. Ĩndĩ o na vailye ũu, mavinda amwe kĩveti nĩkĩtonya kũlea kwĩtĩkĩlana na mũũme. Veethĩwa vailye ũu, nĩkyaĩle kwĩyĩelesya kĩ na ndaĩa na kĩuĩtye. Ĩndĩ no nginya kĩlilikane kana Yeova anengete mũũme ũkũmũ wa kũtwʼa kĩla ũkwona kĩ kĩseo vyũ kwondũ wa mũsyĩ wake. Kwoou nĩkyaĩle kwĩka kyonthe kĩla kĩtonya nĩ kana kĩkwate mbau ũtwi ũsu wa mũũme. Kyeeka ũu, kĩkatuma mũsyĩ wʼonthe wĩthĩwa na ũtanu. Somai 1 Vetelo 3:3-5, na ĩndĩ mũineenea ĩkũlyo yĩĩ:
-
Yeova ewʼaa ata yĩla kĩveti kyanenga mũũme ndaĩa?
6. Nũtonya kũsinda mathĩna mũtwaanonĩ waku
Vaiĩ mũtwaano ũte mathĩna. Kwoou, mũũme na mũka no nginya methĩwe me ngwatanĩo nĩ kana masinde mathĩna asu. Ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩ maũndũ meva moonanyʼa kana mũtwaano ũsu ũendeee naĩ?
-
Meeka ata nĩ kana malũlũmĩĩlye mũtwaano woo?
Somai 1 Akolintho 10:24 na Akolosai 3:13. Ĩtina wa kũsoma kĩla ĩandĩko, neeneai ĩkũlyo yĩĩ:
-
Kũatĩĩa mwolooto ũũ kũtonya kũlũlũmĩĩlya mũtwaano ata?
Mbivilia ĩtũtavĩtye kana nĩtwaĩle kũnengane ndaĩa. Na mũndũ onanasya kana nũnengete ũla ũngĩ ndaĩa yĩla wamwĩka maũndũ maseo na eethĩwa ate na kĩvũthya. Somai Alomi 12:10, na ĩndĩ mũineenea makũlyo aa:
-
Mũndũ nĩwaĩle kweteela ũla ũtwaanĩte nake ethĩwe e wa mbee kũmũnenga ndaĩa? Nĩkĩ wasũngĩa ũu?
ANDŨ AMWE MAASYA: “Ndyĩwʼaa nĩ vakuvĩ na ũla nĩtwaanĩte nake tondũ vailye mbeenĩ.”
-
Ũtonya kũmatetheesya ata mamanye kana Mbivilia no ĩmatethye?
KĨLA TWEEMANYĨSYA
Mũũme na mũka no methĩwe na ũtanu meethĩwa mendanĩte, manenganĩte ndaĩa, na maatĩĩa myolooto ya Mbivilia.
Makũlyo ma Kũsyokeleela
-
Mũũme atonya kwĩka ata nĩ kana mũtwaano wake wĩthĩwe na ũtanu?
-
Nakyo kĩveti kĩtonya kwĩka ata nĩ kana mũtwaano woo wĩthĩwe na ũtanu?
-
Ethĩwa wĩ mũtwae kana nũtwaanĩte, nĩ mwolooto wĩva wa Mbivilia ũtonya kũũtetheesya ũlũlũmĩĩlye mũtwaano waku?
MAŨNDŨ ANGĨ MA KWĨMANYĨSYA
Soma wone maũndũ amwe matonya kũũtethya wĩthĩwe na mũsyĩ mũtanu.
Ĩloele wathi ũũ wone ũndũ kũatĩĩa myolooto ya Ngai nthĩnĩ wa mũtwaano kũetae moathimo.
Soma wone nĩkĩ kĩveti kyaĩle kwĩnyivĩsya ũkũmũ wa mũũme.
“Iveti, Nĩkĩ Mwaĩle Kwĩnyivĩsya Ũkũmũ wa Aũme Menyu?” (Mũsyaĩĩsya, Matukũ 15, Mwei wa 5, 2010)
Mũndũũme ũmwe na mũka masindie ata mathĩna maito ma mũtwaano—o vamwe na thĩna wa kũthasya mũtwaano woo?
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
