Yesũ aendeee na kũmanyĩsya andũ kĩsionĩ kya Kaisalea ya Vilivu kĩla kyaĩ ta kĩlomita 25 kuma Kĩĩmanĩ kya Elimoni, nĩwatavisye atũmwa make ũndũ ũmwe watumie maseng’a mũno. Ameie atĩĩ: “Nĩ w’o nĩngũmwĩa kana ve amwe maũngamĩte vaa matakasama kĩkw’ũ nongi nginya mambe kwona Mwana wa mũndũ ayũka Ũsumbĩnĩ wake.”—Mathayo 16:28.

No nginya amanyĩw’a ma Yesũ methĩwe mataamanya kĩla woonanasya kwa kũmatavya ndeto isu. Ĩtina wa mĩthenya mĩvũthũ, Yesũ nĩwoosie Vetelo, Yakovo, na Yoana, na mathi kĩĩmanĩ kĩtũlu. Kwĩoneka kwaĩ ũtukũ nũndũ aũme asu atatũ Yesũ waendie namo kĩĩmanĩ kĩu maĩ na too mwingĩ mũno. Me o vau, Yesũ nĩwambĩĩie kũvoya, na mũvw’ano wake waalyũka mene. Atũmwa asu moonie ũthyũ wa Yesũ ũitisa ta syũa na ngũa syake syeeũva na syakena mũno.

Ĩtina wa ndatĩka nini, andũ elĩ, ala Mbivilia ĩmetĩte “Mose na Eliya” nĩmaumĩlile na mambĩĩa kũneena na Yesũ. Maneeneaa ĩũlũ wa ‘kũthi kwake kũla kwaĩ kwĩanĩe athi Yelusaleme.’ (Luka 9:30, 31) Kũthi kũu kwoonanasya kũkw’a kwa Yesũ na kũthayũũkw’a kwake, o tondũ waĩ anaweta mbeenĩ. (Mathayo 16:21) Ũneenany’a ũla waendeee katĩ wa Yesũ na aũme asu elĩ waĩkĩĩthisye kana kĩvathũkany’o na ũndũ Vetelo weeaa Yesũ, vayaĩ vatonyeka Yesũ akaema kũkw’a kĩkw’ũ kĩ woo na kĩ nthoni.

Aũme asu maĩ manathelwa nĩ too na yu nĩmeene maũndũ nesa na nĩmeethukĩĩsye maseng’ete kĩla kyaendeee. Ũsu waĩ o woni, ĩndĩ woonekaa wĩ ũndũ wa w’o vyũ nginya Vetelo alika ngewanĩ ĩsu na asya: “Lavai, nũseo kwitũ kwĩthĩwa vaa. Kwoou eka twambe maeema atatũ, yĩmwe yaku, yĩngĩ ya Mose, na yĩngĩ ya Eliya.” (Maliko 9:5) Ĩkũlyo nĩ, Noĩthwa Vetelo endaa maeema asu mambwe nũndũ endaa woni ũsu ũendeee kwa ĩvinda yĩasanga?

O Vetelo aendeee kũneena, ĩtu ĩkenu nĩyamavw’ĩkie na wasya wauma ĩtunĩ yĩu ũyasya: “Ũũ nĩwe Mwana wakwa mwendwa, ũla nendeeaw’a nĩwe. Mwĩw’ei we.” Yĩla atũmwa asu meewie wasya wa Ngai, nĩmatelemile mũno na mavalũka nthĩ na mothyũ moo, ĩndĩ Yesũ amea atĩĩ: “Ũkĩlai. Mũikethĩwe na wia.” (Mathayo 17:5-7) Yĩla mookĩlile, mayaaona mũndũ ũngĩ ateo Yesũ. Woni ũsu waĩ ũnathela. Yĩla kwakee, matheeete kuma kĩĩmanĩ Yesũ ameaĩe atũmwa asu amea: “Mũikatavye mũndũ o na ũmwe ĩũlũ wa maũndũ ala mwoona nginya yĩla Mwana wa mũndũ ũkathayũũkw’a.”—Mathayo 17:9.

Nũndũ wa kwona Eliya woninĩ ũsu, atũmwa nĩmakũlilye Yesũ ĩkũlyo ĩna. Mamũkũlilye-ĩ, “Nĩkĩ ĩndĩ aandĩki maasya kana no nginya Eliya ambe kũka?” Yesũ amasũngĩie amea atĩĩ: “Eliya nĩwookie na mayaamũmanya.” (Mathayo 17:10-12) Yesũ aneeneaa ĩũlũ wa Yoana Mũvatisi, ũla weanĩisye kĩanda o ta kĩla Eliya weanĩisye. Eliya nĩwaseũvisye nzĩa kwondũ wa Elisa, nake Yoana nĩwaseũvisye nzĩa kwondũ wa Klĩsto.

Yesũ na atũmwa asu make nĩmeekĩiwe vinya mũno nĩ woni ũsu! Woonanasya ũndũ Klĩsto ũkethĩwa na ũtheu mũtisu e Mũsumbĩ Ũsumbĩnĩ wa Ngai. Kwoou no twasye kana amanyĩw’a nĩmoonie “Mwana wa mũndũ ayũka Ũsumbĩnĩ wake,” o tondũ Yesũ waĩ anathana. (Mathayo 16:28) Yĩla maĩ kĩĩmanĩ, atũmwa asu ma Yesũ ‘nĩmeeyoneie ũtheu wake mũtisu.’ O na kau  Avalisi mendaa Yesũ eke kyama kĩkũĩkĩĩthya kana nĩwe Mũsumbĩ ũla ũnyuvĩtwe nĩ Ngai, ndaamony’a o na kĩmwe. Ĩndĩ atũmwa ala Yesũ waĩ ndũũ namo mũno nĩmakwatie kĩanda kĩseo kya kwona mũvw’ano wake ũialyũka, na woni ũsu nĩwaĩkĩĩthisye mawathani ala makonetye Ũsumbĩ. Nĩkyo kĩtumi Vetelo wesie kũandĩka asya atĩĩ: “Twĩ na wathani ũĩkĩĩthĩtw’e mũno.”—2 Vetelo 1:16-19.