Yesũ nĩweethĩĩtwe aitavany’a na kĩthito kingĩ vandũ va myaka ĩlĩ. Ĩndĩ ĩkũlyo nĩ, Yo ĩvinda yaĩ yĩnavika ya kũola kĩthito kyake wĩanĩ ũsu? Aiee, vandũ va ũu, Yesũ nĩwongelile kĩthito wĩanĩ wa kũtavany’a kwa kũlika “ndũanĩ syonthe na motũinĩ [ma Kalilii], aimanyĩsya masinakokenĩ na kũtavany’a ũvoo mũseo wa Ũsumbĩ, o vamwe na kũvosya mĩthemba yonthe ya ũwau na mĩthemba yonthe ya mawonzu.” (Mathayo 9:35) Maũndũ ala weeyoneie aitavany’a nĩmatumie ona vata wa kwongela kĩthito wĩanĩ wa kũtavany’a. Ĩndĩ esaa kwĩanĩsya wĩa ũsu ata?

Yesũ e nzĩanĩ, nĩwoonie andũ mendaa kũtetheew’a kĩ-veva o vamwe na kũkiakiw’a. Andũ asu Yesũ woonie mailyĩ ta malondu mate na mũĩthi, manyamaĩtw’e na makekw’a kũũ na kũũ. Nĩwamew’ĩie tei na kwoou eea amanyĩw’a make atĩĩ: “Ngetha nĩ nene, ĩndĩ atethya ma wĩa nĩ anini. Kwoou, voyai Mũnene wa ngetha atũme atethya ma wĩa ngethanĩ yake.”—Mathayo 9:37, 38.

Yesũ nĩweesĩ kĩla kĩtonya kũtetheesya andũ asu. Nũndũ wa ũu, nĩwoombanisye atũmwa make 12 na amaany’a ikundi thanthatũ sya atavany’a, kĩla kĩkundi kĩ na andũ elĩ. Ĩtina wa ũu, nĩwameyĩaĩe ũndũ mekwĩka kwa kũmea atĩĩ: “Mũikathi kwa andũ ma mbaĩ ingĩ, na mũikalike ndũanĩ o na yĩva ya Asamalia; vandũ va ũu, endai o kwa malondu ala mau ma nyũmba ya Isilaeli. Na mũendete tavany’ai, mũkyasya: ‘Ũsumbĩ wa ĩtu nĩ mũthengeeu.’”—Mathayo 10:5-7.

Ũsumbĩ ũla amanyĩw’a maĩ matavany’e ĩũlũ waw’o nĩ ũla Yesũ wawetie mboyanĩ ĩla ya ngelekany’o. Ndeto ‘Ũsumbĩ wa ĩtu nĩ mũthengeeu’ syoonanasya kana ũla Ngai wanyuvĩte eĩthĩwa Mũsumbĩ, nake nĩ Yesũ Klĩsto, e vo.  Ĩndĩ nĩ kyaũ kyesaa kũĩkĩĩthya kana amanyĩw’a nĩmo matũmĩtwe matavanasye ĩũlũ wa Ũsumbĩ ũsu? Yesũ nĩwamanengie vinya wa kũvosya awau na kũthayũũkya akw’ũ, na maaĩle kwĩka ũu mate kũĩvĩthya kĩndũ. Ĩndĩ mo atũmwa mesaa kwĩka ata nĩ kana meanĩsye mavata moo, ta kũkwata lĩu wa kĩla mũthenya?

Yesũ nĩwatavisye amanyĩw’a make maikamanthe syĩndũ sya kĩ-mwĩĩ ila makatũmĩaa me wĩanĩ ũsu wa kũtavany’a. Mayaaĩle kũkua syĩndũ ta thaavu, vetha, kana ũthuku mĩvukonĩ yoo. O na mayaaĩle kwĩthĩwa na mĩvuko ya lĩu kwondũ wa savalĩ ĩsu, kana ngũa ilĩ kana iatũ. Nĩkĩ mataaĩle kũkua syĩndũ isu? Yesũ amaĩkĩĩthisye kana “mũtethya wa wĩa nĩwaĩle kũnengwa lĩu.” (Mathayo 10:10) Andũ ala amanyĩw’a mesaa kwĩthĩa na mayĩtĩkĩla ũvoo ũla meũtavw’a nĩmo mesaa kũmeanĩsya mavata moo ma lasima. Yesũ ameie atĩĩ: “Mũsyĩ o na wĩva ũla mwĩlika, ĩkalai vau nginya yĩla mwĩuma kũu.”—Maliko 6:10.

Yesũ nĩwasyokie kũtavya amanyĩw’a ũndũ makekaa yĩla meũtavany’a ũvoo wa Ũsumbĩ, ameie: “Mwalika nyũmba, kethyai andũ ma nyũmba ĩsu. Ethĩwa nyũmba ĩsu nĩyaĩle, mũuo wenyu nĩwĩthĩwe ĩũlũ wayo; ĩndĩ ethĩwa ndyaĩle, mũuo wenyu nũmũsyokee. Na vandũ o na va vala mũtethokw’a nĩ mũndũ kana ndeto syenyu kwĩthukĩĩw’a, mumĩte vo tuangai kĩtoo maaũnĩ menyu.”—Mathayo 10:12-14.

Ndũa nima kana ũtũi w’onthe waĩ ũtonya kũlea kwĩthukĩĩsya ũvoo ũla amanyĩw’a matavanasya. Ndũa ya mũthemba ũsu yesaa kũkwatwa nĩ kyaũ? Yesũ nĩwaeleisye kana andũ asu makakwata ũsilĩlo mũnene. Aielesya aisye atĩĩ: “Nĩ w’o nĩngũmwĩa, kũkeethĩwa kavaa kwa nthĩ ya Sotomo na Ngomola Mũthenya wa Sila, kwĩ ndũa ĩsu.”—Mathayo 10:15.