Ũvoo wa kana Yesũ nĩwumie Ndekavoli nĩwanyaĩĩkie katĩkatĩ wa Ayuti ala mekalaa ngalĩko ya ĩũlũ ya Ũkanga wa Kalilii. Nĩvatonyeka andũ aingĩ makethĩwa meewie kana Yesũ nĩwakanisye kĩseve na itulumo sya ũkanga, na amwe no kwĩthĩwa meesĩ kana nĩwavoisye andũ maĩ na ndaimoni. Kwoou, “ĩkomano ĩnene” nĩyoombanie ũtee wa ũkanga nĩ kana yĩmũthokye Yesũ, na nĩvatonyeka yĩkethĩwa yaĩ kĩsionĩ kya Kavelinaumi. (Maliko 5:21) Yĩla Yesũ wavikie ũtee wa ũkanga, andũ maĩ na mea maingĩ ma kwona maũndũ ala ũkwĩka.

Ũmwe wa andũ ala maĩ na mea maingĩ ma kũkomana na Yesũ nĩ Yailu, ũla waĩ ũmwe wa aũngamĩi ma ĩsinakoke yĩla yĩtonya kwĩthĩwa yaĩ Kavelinaumi. Yailu nĩwavalũkile maaũnĩ ma Yesũ na amwĩsũva ĩngĩ na ĩngĩ aimwĩa atĩĩ: “Kelĩtu kakwa nĩ kawau mũno. Mwa! Ũka ũkakailĩĩle moko nĩ kana kavoe na kayĩkala thayũ.” (Maliko 5:23) We Yesũ esaa kwĩka ata ĩtina wa kwĩsũvwa mũno nĩ Yailu akatetheesye kelĩtu kake kala kaĩ na myaka 12 na wakendete mũno?—Luka 8:42.

Yesũ nĩweetĩkĩlile kũthi kwa Yailu. E nzĩanĩ, ve ũndũ ũngĩ wa kũkiita ngoo mũno weekĩkie. Andũ aingĩ ala Yesũ waendanĩtye namo maĩ na mea ma kwona ayĩka kyama kĩngĩ. Ĩndĩ andũnĩ asu vaĩ mũndũ mũka ũmwe wasũanĩaa o ĩũlũ wa ũwau mũthũku ũla waĩ naw’o.

Kwa myaka 12, mũndũ mũka ũsu Mũyuti nĩweethĩĩtwe na ũwau wa kumwa nĩ nthakame. Nĩwamanthĩte ũtethyo kuma kwa aiiti aingĩ na akatũmĩa mbesa syonthe ila waĩ nasyo akwate ũiiti. Ĩndĩ ndaĩ aatetheka. Vandũ va ũu, “aendeee o na kũwaĩĩa.”—Maliko 5:26.

Ũwau wa mũndũ mũka ũsu nĩwatumaa ethĩwa e mwonzu, na nĩwamwĩkĩĩthasya nthoni. O na ndwaĩ ũndũ wĩ laisi mũndũ kũwetea andũnĩ kana awaĩte ũwau ũsu. Ũndũ ũngĩ nĩ kana kwosana na Mĩao ya Mose, mũndũ mũka ũkumwa nĩ nthakame eethĩawa e mũvuku. Mũndũ ũla wakiita mũndũ mũka ũkumwa nĩ nthakame kana akiita ngũa syake aaĩle kũthamba na eethĩawa e mũvuku kũvika wĩoo.—Alivai 15:25-27.

Yĩla mũndũ mũka ũsu “weewie ũvoo ĩũlũ wa Yesũ,” nĩwavangie kũmũmantha. Nũndũ aĩ mũvuku, nĩwalikĩile ĩkomanonĩ evithanĩtye nĩ kana ndakamanyĩke nĩ andũ. Aasya ũũ ngoonĩ yake: “Nakiita, o na ethĩwa nĩ ngũa yake ya ĩũlũ, nĩngũvoa.” Yĩla wakwatie mũthya wa ngũa ya Yesũ, o vau kwa vau nĩwaekie kumwa nĩ nthakame! Mũndũ mũka ũsu ‘nĩwavoiw’e ũwau ũsu mũthũku.’—Maliko 5:27-29.

Ĩtina wa ũu, Yesũ akũlilye: “Nũũ ũla wangiita?” We wĩona mũndũ mũka ũsu ta weewie ata yĩla weewie ĩkũlyo yĩu? Vetelo nĩwambĩĩie kũneena ta ũkwenda kũmũkany’a Yesũ kwa kũmwĩa, “Ĩkomano nĩyĩkũtindĩkĩte na yĩkakũvivinya.” Kwoou nĩkĩ Yesũ wakũlilye, “Nũũ ũla wangiita?” Aeleisye asya atĩĩ: “Ve mũndũ wangiita, nũndũ nĩneew’a vinya wauma nthĩnĩ wakwa.” (Luka 8:45, 46) Vate nzika, kũvow’a kwa mũndũ mũka ũsu nĩkwatumie vinya wa Yesũ ũoleka.

Yĩla mũndũ mũka ũsu wamanyie kana nĩwamanyĩka,  ookie atetemete na atulya ndu mbee wa Yesũ. E vau mbee wa andũ onthe, nĩwawetie ĩũlũ wa ũwau wake na asya nĩwavow’a. Yesũ nĩwamũkiakĩisye kwa kũmwĩa atĩĩ: “Mwĩĩtu wakwa, mũĩkĩĩo waku nĩwakũvosya. Enda na mũuo, na ũivoa ũwau waku mũthũku.”—Maliko 5:34.

Kwa w’o, Ũla Yeova ũnyuvĩte esumbĩka andũ ĩũlũ wa nthĩ e wendo, e tei, nũthĩnĩkĩaa mavata ma andũ, na e ũtonyi wa kũtetheesya andũ!