Yĩla Yesũ wamanyie kana Avalisi na aatĩĩi ma Elote nĩmavangĩte kũmũaa, nĩwaendie e na amanyĩw’a make Ũkanganĩ wa Kalilii. Andũ aingĩ nĩmookie vala ve Yesũ maumĩte kũndũ kwĩ kĩvathũkany’o ta Kalilii, isio syĩ ũtee wa ũkanga wa Tile na Sitoni, ngalĩko ya wumĩlonĩ wa syũa wa Ũsĩ wa Yolotani, Yelusaleme, na ngalĩko ya ĩtheo ya Itumea. Yesũ nĩwavoisye andũ aingĩ. Na nũndũ wa ũu, aingĩ ala maĩ na mowau mathũku mayaaeteela Yesũ amakiite, ĩndĩ vandũ va ũu nĩmavivinyanie mayenda mũno kũmũkiita Yesũ.—Maliko 3:9, 10.

Andũ asu maĩ aingĩ mũno nginya Yesũ eea amanyĩw’a make mamũmanthĩe kasiwa nĩ kana ĩkomano yĩeke kũmũvivinya. O na aĩ atonya kũmanyĩsya andũ asu e o vau kasiwanĩ kana akathi kũndũ kũngĩ ũtee wa ũkanga akatetheesye andũ angĩ aingĩ.

Mathayo, ũla waĩ mũmanyĩw’a wa Yesũ, nĩwawetie kana maũndũ asu Yesũ weekie nĩmeanĩisye ‘ndeto syaneeniwe kwĩsĩla mwathani Isaia.’ (Mathayo 12:17) Nĩ wathani wĩva Yesũ weanĩisye?

Wathani ũsu waĩtye: “Sisya! Mũthũkũmi wakwa mwendwa ũla nĩnyuvĩte na nendeeaw’a nĩwe! Ngeekĩa veva wakwa nthĩnĩ wake, na akamanyĩsya nesa andũ ma mbaĩ ingĩ ĩũlũ wa ũsili wa katĩ. Ndakateta na mũndũ, o na ndakokĩlya wasya wake, na vaiĩ mũndũ ũkew’a wasya wake nzĩanĩ nene. Ndakatumbanga mũangi mũkonze, na vaiĩ kaũtambi keũtoa ũkavosya, nginya yĩla ũkaete ũsili wa katĩ vyũ. Kwa w’o ki, mbaĩ ikeekwatya ĩsyĩtwa yake.”—Mathayo 12:18-21; Isaia 42:1-4.

Kwa w’o, Yesũ nĩwe mũthũkũmi ũla Ngai wanyuvĩte na wendeeaw’a nĩwe. Yesũ nĩwoonanasya nesa ũsili wa katĩ, kĩvathũkany’o na ũndũ ndĩni ya ũvũngũ yeekaa. Nũndũ Avalisi nĩmavĩndũaa Mĩao ya Ngai kwa ũseleke yosane na mawoni moo, mayaĩ mesa kũtetheesya mũndũ mũwau mũthenya wa Savato! Ĩndĩ nĩ kana Yesũ onany’e kana nũatĩĩaa ũsili wa katĩ wa Ngai na kana e na veva wa Ngai, nĩwathũmũisye andũ kumana na syĩthĩo itaĩle ila syaatĩĩawa ĩvinda yĩu. Nũndũ wa ũu, atongoi ma ndĩni mendaa kũmũaa. Ũsu waĩ ũndũ wa kũmakya mũno!

Ndeto “ndakateta na mũndũ, o na ndakokĩlya wasya wake, na vaiĩ mũndũ ũkew’a wasya wake nzĩanĩ nene” syoonanasya kyaũ? Ĩvinda yĩla Yesũ wavoasya andũ ndametĩkĩlasya  ‘mawete we nĩwe ũũ.’ O na ndeetĩkĩlasya ndaimoni kwĩka ũu. (Maliko 3:12) Ndendaa andũ mamũmanye kwĩsĩla maũndũ ala andũ maendaa maiweta ĩũlũ wake nzĩanĩ, kana kwĩsĩla ngewa ite sya w’o na syongeleelwe mautĩĩo ila andũ maneenaa.

O na ĩngĩ, ũvoo ũla Yesũ watavanasya nĩwakiakiasya ala mailyĩ ta mũangi mũkonze, ũkatũlwa na ũkavalũkw’a. Andũ asu mailyĩ ta ũtambi ũtoaa syũki ũla kasinga kala katiele kakilyĩ kũthela. Kwoou Yesũ ndaĩ etĩkĩla kũmatumbanga ta mũangi mũkonze kana akeka ũndũ akatuma mekala ta kaũtambi keũtoaa na kavow’a. Ĩndĩ vandũ va ũu, nũndũ aĩ na wendo na tei, nĩwatũmĩaa nzĩa nzeo kũtetheesya andũ ala maĩ auu. Kwa w’o, Yesũ e weka nĩwe mbaĩ syaaĩle kũmwĩkwatya!