O na kau Yesũ nĩwanengete Yoana Mũvatisi ndaĩa nene, mo andũ ala angĩ mamwonaa Yoana ata? Yesũ aineena ĩũlũ wa andũ asu aisye atĩĩ: “Nzyawa ĩno . . . No ta syana nini ila syĩkalaa nthĩ sokonĩ na kwĩta ila ingĩ ithaũkaa nasyo, ikyasya: ‘Nĩtwamũvuvĩie mũtũlilũ, ĩndĩ mũyaasũnga; nĩtwaĩie na wasya mũnene, ĩndĩ mũyaaĩkũnanga nũndũ wa kyeva.’”—Mathayo 11:16, 17.

Yesũ oonanasya ata aineena ndeto isu? Aeleisye ngelekany’o ĩsu asya atĩĩ: “Yoana ookie ate kũya na ate kũnyw’a, ĩndĩ andũ masya, ‘E na ndaimoni.’ Nake Mwana wa mũndũ ookie akĩya na akĩnyw’a, ĩndĩ andũ masya, ‘Sisya! Mũndũ wĩ ĩtomo na ũnyusaa mbinyu mbingĩ, mũnyanyae wa aumĩthya ma koti na eki ma naĩ.’” (Mathayo 11:18, 19) Yoana ndaĩ na syĩndũ mbingĩ sya kĩ-mwĩĩ nũndũ aĩ Mũnasali, o na ndanyusaa mbinyu, na kwoou andũ asu mambĩĩa kwasya e na ndaimoni. (Motalo 6:2, 3; Luka 1:15) Nake Yesũ ekalaa o ta andũ ala angĩ. Nĩwaĩsaa na akanyw’a, ĩndĩ andũ maasya kana e ĩtomo. Kwoou, waĩ ũndũ wĩ vinya mũno kwĩka ũndũ ũtonya kwendeesya andũ asu.

Yesũ aisye kana andũ asu mailyĩ ta twana tũnini tũla twĩkalaa sokonĩ na twavuvĩwa mũtũlilũ nĩ twana tũngĩ tũilea kũsũnga, kana tũilea kwĩkũnanga nũndũ wa kyeva yĩla twana tũla tũngĩ tũkũĩa. Aminĩĩie ngelekany’o yake kwa kwasya atĩĩ: “O na vailye ũu, ũĩ nũtalĩlawa ũlũngalu nĩ mawĩa maw’o.” (Mathayo 11:16, 19) “Mawĩa” ala mawetetwe ĩandĩkonĩ yĩĩ nĩ maũndũ ala Yoana na Yesũ meekie, na maĩkĩĩthisye kana maũndũ mathũku ala maneeneawa nĩ ma ũvũngũ.

Ĩtina wa Yesũ kwonany’a kana andũ asu mayaĩ ewi, nĩwamatavisye ũtheinĩ maũndũ ala maĩ makwate ndũa syoo nũndũ wa kũlea kwĩlila. Ndũa ila wawetie nĩ Kolasini, Vethisaita, na Kavelinaumi, vala weekĩte syama mbingĩ. Yesũ aisye kana keka eekie syama isu ndũanĩ sya Tile na Sitoni ila syaĩ kĩsionĩ kya Voenike, andũ ma ndũa isu methĩwa meelilile. Yesũ nĩwasyokie aweta ndũa ya Kavelinaumi, vala wekalĩte kwa ĩvinda yĩana ũndũ mũna. O na ndũanĩ ĩsu, andũ aingĩ mayaaĩlila. Aineena ĩũlũ wa ndũa ĩsu aisye atĩĩ: “Mũthenya wa Sila, ũsilĩlo wa Sotomo ũkeethĩwa wĩ kavaa kwĩ waku we Kavelinaumi.”—Mathayo 11:24.

Ĩtina wa ũu, Yesũ nĩwamũkumisye Ĩthe wake ũla ũvithaa ũw’o wa vata wa kĩ-veva “ala oĩ na me na ũmanyi,” ĩndĩ aimavuanĩsya ala menyivĩtye na mailyĩ ta syana nini. (Mathayo 11:25) O na nĩwamathokisye asu mailyĩ ta syana nini kwa kũmea atĩĩ: “Ũkai kwakwa inyw’onthe ala mũnoete na mwĩ na mĩio mĩito nakwa ngamũthũmũsya. Ĩyaĩkyei ĩsoki yakwa na mũyĩmanyĩsya kuma vala nĩĩ nũndũ nyie nĩ mũuu na nĩ wĩnyivyo ngoonĩ, nenyu mũkakwata ũthũmũo. Nũndũ ĩsoki yakwa yĩi vinya kũkua, na mũio wakwa nĩ mũvũthũ.”—Mathayo 11:28-30.

Nĩ kwa nzĩa syĩva Yesũ wathũmũasya andũ? Atongoi ma ndĩni nĩmakuĩthĩtye andũ mĩio mĩito ya syĩthĩo itatonyeka. Kĩthĩo kĩmwe nĩ ta kũtavya andũ maatĩĩae mĩao ĩvĩtũkĩte mĩvaka ĩũlũ wa Savato. Ĩndĩ Yesũ nĩwathũmũisye andũ kwa kũmamanyĩsya ũw’o kuma kwa Ngai, na ũw’o ũsu ndwavulanĩtw’e na syĩthĩo sya andũ. O na ĩngĩ nĩwamonisye nzĩa ĩla  ĩkatũmĩwa kũthũmũsya ala mekwĩw’a mavinyĩĩwe nĩ silikalĩ sya andũ na ala mekwĩw’a matũlĩkĩte ngoo nũndũ wa naĩ syoo. Yesũ nĩwamavuanĩsye andũ asu ũndũ matonya kũekewa naĩ syoo na ũndũ matonya kwĩthĩwa na mũuo na Ngai.

Onthe ala metĩkĩlaa ĩsoki ya Yesũ no meyumye kwa Ngai na maimũthũkũma Ĩthe witũ wa ĩtunĩ ũla wĩ tei mwingĩ. Kwĩka ũu ti mũio mũito nĩkwĩthĩwa mĩao ya Ngai ti mĩito o na vanini.—1 Yoana 5:3.