Yesũ nĩwaendie ĩsinakokenĩ yĩngĩ yĩtonya kwĩthĩwa yaĩ Kalilii. Aendie ĩsinakokenĩ yĩu mũthenya wa Savato. E vau ĩsinakokenĩ, nĩwoonie mũndũ wonzete kw’oko kwake kwa aũme. (Luka 6:6) Aandĩki na Avalisi nĩmamũsyaĩĩsye Yesũ nesa. Nĩkĩ mamũsyaĩĩsye? Kĩtumi kya kũmũsyaĩĩsya nĩkyamanyĩkie nesa yĩla mamũkũlilye Yesũ atĩĩ: “Nĩ ũndũ wosanĩte na mĩao kũvosya mũndũ mũthenya wa Savato?”—Mathayo 12:10.

Atongoi ma ndĩni ya Kĩyuti maĩkĩĩaa kana mũndũ aĩle kũvow’a mũthenya wa Savato ethĩwa tũ thayũ wake wĩ mũisyonĩ. Kwoou kwosana na woni woo, ti ũndũ woosanĩte na mĩao kwova mũndũ kana nyamũ ĩtũlĩkĩte ĩvĩndĩ mũthenya wa Savato, nũndũ maũndũ asu mayoonekaa matonya kũlikya thayũ mũisyonĩ. Kwa w’o, aandĩki na Avalisi mayamũkũlasya Yesũ ĩkũlyo yĩu nĩkwĩthĩwa nĩmathĩnĩkĩaa mũndũ ũsu waĩ mwonzu kw’oko. Ĩndĩ mamanthaa kĩtumi kya kũmũsikata Yesũ.

Ĩndĩ Yesũ nĩwamanyie mosũanĩo moo mataĩle. Nĩweesĩ kana atongoi asu ma ndĩni maĩ na mawoni mathũku na matoosanĩte na Maandĩko. Mawoni asu makonetye kĩla mũndũ waĩ atonya kwĩka akonany’a kana ndekũatĩĩa mwĩao wa kũlea kũtethya wĩa mũthenya wa Savato. (Kuma 20:8-10) Yĩu ti yo yaĩ ĩvinda ya mbee Yesũ kũneenewa naĩ nĩ atongoi asu nũndũ wa kwĩka maũndũ maseo. Yesũ eekie ũndũ watumie aneenany’a mũno na atongoi asu ma ndĩni nginya maemanwa nake. Ũndũ ũsu weethĩiwe yĩla weeie ũla mũndũ waĩ mwonzu kw’oko atĩĩ: “Ũkĩla wũke vaa katĩ.”—Maliko 3:3.

Ĩtina wa ũu, Yesũ nĩwasyaisye aandĩki na Avalisi na amakũlya: “Twasye wĩ na ĩlondu yĩmwe na yĩivalũka ĩimanĩ mũthenya wa Savato, nũũ katĩ wenyu ũtayĩkwata na kũyumya?” (Mathayo 12:11) Ĩlondu yaĩ yĩtonya kũtuma mũndũ akwata mbesa, na kwoou mayaĩ maeka yĩkale ĩimanĩ nginya mũthenya ũla waatĩĩe nũndũ yaĩ yĩtonya kũkw’a na maikwata wasyo. O na Maandĩko nĩmaĩtye kana “mũndũ mũlũngalu nũsiasya thayũ wa nyamũ yake.”—Nthimo 12:10.

Nĩ kana Yesũ aelesye ũndũ maũndũ asu makonanĩtye, aendeeie kwasya atĩĩ: “Mũndũ nĩ wa vata mũno kũvĩtũka ĩlondu. Kwoou nĩ ũndũ wosanĩte na mĩao kwĩka ũndũ mũseo mũthenya wa Savato.” (Mathayo 12:12) Ũu wĩonany’a kana Yesũ ndesaa kwĩthĩwa aitũla mwĩao wa Savato kwa kũvosya mũndũ ũsu waĩ mũwau. Atongoi ma ndĩni nĩmaemiwe nĩ kũmũvĩnga Yesũ nũndũ ndeto syake syoonanasya kana aĩ na tei na nĩwatũmĩaa kĩlĩko. Mayaĩ na ũndũ maweta.

Yesũ nĩwasyaisye andũ asu onthe ew’ĩte woo na e na kyeva nũndũ wa mosũanĩo moo mataĩle. Na ĩndĩ eea mũndũ ũsu atĩĩ: “Tambũũkya kw’oko kwaku.” (Mathayo 12:13) Yĩla mũndũ ũsu watambũũkisye kw’oko kwake, nĩkwavoie. Mũndũ ũsu nĩweewie mũyo mũno nũndũ wa kũvow’a. Ĩndĩ kweethĩiwe ata kwa andũ ala mamũvĩngaa Yesũ?

 Vandũ va kũtana nũndũ mũndũ ũsu nĩwavow’a kw’oko, Avalisi nĩmaumaalile na mĩtũkĩ na mathi nzama na “aatĩĩi ma kyama kya Elote, nĩ kana mamũae [Yesũ].” (Maliko 3:6) Nĩvatonyeka amwe ma kyama kĩu kya siasa makethĩwa maĩ ma kĩkundi kya ndĩni kya Asatukai. Ĩvindanĩ yĩu, Asatukai na Avalisi mayeew’anaa, ĩndĩ nĩmakwatanie mamũvĩnge Yesũ.