Ĩtina wa Yesũ kũsyawa, Yosevu na Meli nĩmaendeeie kwĩkala Mbetheleemu vandũ va kũsyoka Nasaleti. Na yĩla Yesũ wavikisye mĩthenya nyanya nĩwaĩkiwe o tondũ Ngai weaĩe Aisilaeli. (Alivai 12:2, 3) O na ĩngĩ kwosana na kĩthĩo kyoo, yĩla kana kavĩsĩ kasyawa, kaaĩle kũnewa ĩsyĩtwa o mũthenya ũla kaĩkwa. Kwoou nĩmeetie kana kau Yesũ, o tondũ mũlaĩka Kavilieli wawetete.

Ĩtina wa Yesũ kũnengwa ĩsyĩtwa asyai make meekie ata? Yĩla wavikisye mĩthenya 40 nĩmamwosie na mamũtwaa ĩkalũnĩ yĩla yaĩ Yelusaleme. Ĩkalũ yĩu yĩyaĩ vaasa mũno na vala mekalaa. Mwĩao waĩtye kana mĩthenya 40 yavĩta kuma kana kavĩsĩ kasyawa, inyia wako nĩwaĩle kũete nthembo ĩkalũnĩ nĩ kana athew’e.—Alivai 12:4-8.

Meli nĩweekie o tondũ mwĩao ũsu waĩtye yĩla waumisye mavũĩ elĩ kwondũ wa kwĩthesya. Ũndũ ũsu Meli weekie wonanasya kana me na Yosevu maĩ ngya. Kwosana na mĩao, mũndũ aaĩle kũthemba katena ka ĩlondu na ĩvũĩ. Ĩndĩ ethĩwa inyia wa kana ndatonya ũkwata katena ka ĩlondu, nĩwaĩ atonya kũthemba mavũĩ elĩ kana ndumbũ ilĩ. Kwoou nũndũ Meli ndaĩ na ũkwati mũnene, aumisye mavũĩ elĩ.

Ĩvindanĩ yĩu maĩ ĩkalũnĩ maithemba, Yosevu na Meli nĩmoonie mũtumĩa mũkũũ weetawa Simeoni ooka vala maĩ. Ngai aĩ amũvuanĩisye Simeoni kana atanamba kũkw’a akoona Klĩsto, kana Masia ũla wathanĩtwe nĩ Yeova. Mũthenya ũsu Simeoni nĩwatongoew’e nĩ veva mũtheu ooka ĩkalũnĩ, vala weethĩie Yosevu na Meli vamwe na kana koo. Simeoni nĩwoosie kana kaũ akakwata na moko make.

Simeoni akwete Yesũ, nĩwamũtũngĩie Ngai mũvea ayasya: “Yu, Mwĩaĩi Mũsumbĩ Mũnene, eka ngombo yaku ĩthi na mũuo kwosana na ũndũ waneenie, nũndũ metho makwa nĩmoona nzĩa yaku ya ũtangĩĩo ĩla ũseũvĩtye mbee wa metho ma andũ onthe, kyeni kya kũveta kĩndũ kĩla kĩvw’ĩkĩte metho ma andũ ma mbaĩ ingĩ, na ũtheu mũtisu kwa andũ maku Isilaeli.”—Luka 2:29-32.

Ndeto isu Simeoni waneenie nĩsyaseng’isye Yosevu na Meli. Nĩwamaathimie na atavya Meli kana Yesũ nũnyuvĩtwe “kwondũ wa kũvalũka na kũkĩla ĩngĩ kwa andũ aingĩ ma Isilaeli.” O na nĩwamwĩie Meli kana kĩmako kingĩ, kĩla kĩkethĩwa kĩilyĩ ta ũvyũ mũasa ũmũtonyete, kĩkamũkwata.—Luka 2:34.

Mũndũ ũngĩ waĩ ĩkalũnĩ mũthenya ũsu nĩ mwathani mũndũ mũka weetawa Ana. Aĩ na  myaka 84 na ndaumaa ĩkalũnĩ. Ĩvindanĩ o yĩu Simeoni waĩ vamwe na Yosevu, Meli, na Yesũ, Ana nĩwookie vala maĩ. Ana nĩwambĩĩe kũmũtũngĩa Ngai mũvea na aneena na onthe ala mamwĩthukĩĩsye ĩũlũ wa Yesũ.

Kwasũanĩa ũndũ Yosevu na Meli matanĩe nũndũ wa maũndũ asu meewie na moona me ĩkalũnĩ! Maũndũ asu onthe maĩkĩĩthisye kana Yesũ aĩ Ũla Wathanĩtwe Nĩ Ngai.