Ĩtina wa mũlaĩka Kavilieli kũmũtavya Meli akasyaa mwana na aimwĩta Yesũ, na kana Yesũ akeethĩwa e Mũsumbĩ tene na tene, Meli amũkũlilye atĩĩ: “Ũu ũtonyeka ata, nũndũ ndyaamanyana kĩ-mwĩĩ na mũndũũme?”—Luka 1:34.

Mũlaĩka Kavilieli amũsũngĩie amwĩa atĩĩ: “Veva mũtheu ũkooka ĩũlũ waku na vinya wa Ũla wĩ Ĩũlũ wa Onthe ũkeethĩwa ĩũlũ waku. Na nũndũ wa kĩtumi kĩu ũla wĩsyawa akeetwa mũtheu, Mwana wa Ngai.”—Luka 1:35.

Nĩ kana mũlaĩka Kavilieli atetheesye Meli aelewe ũndũ ũsu, noĩthwa nokyo kĩtumi wongelile kũmũtavya ndeto ii: “Sisya! o nake Elisavethi mũndũ wa mũsyĩ wenyu nũitavĩte kavĩsĩ, e o mũkũũ, na ũũ nĩw’o mwei wa thanthatũ kuma ũla weetawa ngũngũ aitava; nũndũ vaiĩ ũndũ Ngai ũneenete ũtatonya kwĩanĩsya.”—Luka 1:36, 37.

Ũsungĩo wa Meli nĩwonanasya kana nĩweetĩkĩlile ndeto sya mũlaĩka Kavilieli. Aisye atĩĩ: “Sisya! nyie nĩ ngombo ya Yeova! Nĩkwĩthĩwe kwakwa o tondũ waneena.”—Luka 1:38.

Ĩtina wa mũlaĩka Kavilieli kũthi, Meli nĩweeyũmbanisye nĩ kana akamũthokee Elisavethi na mũũme wake Nzekalia, ala mekalaa nthĩ ya Yutia, ĩla yaĩ vakuvĩ na Yelusaleme. Nĩ kana Meli athi kuma Nasaleti vala wekalaa nginya kwa Elisavethi, aĩ atonya kũkua mĩthenya ĩtatũ kana ĩna.

Ĩtina wa savalĩ ĩsu yonthe, Meli nĩwesie kũvika mũsyĩ kwa Nzekalia. Avika, nĩwamũkethisye Elisavethi, ũla waĩ wa mũsyĩ woo. Saanĩ o isu, Elisavethi nĩwausũiwe nĩ veva mũtheu, na nũndũ wa ũu, amũtavya Meli ndeto ii: “We wĩ mũathime katĩ wa aka, na ũsyao wa ĩvu yaku nĩmũathime! Kwoou, vatonyeka ata nakwata ndaĩa ĩno ya kũthokewa nĩ inyia wa Mwĩaĩi wakwa? Nũndũ sisya! yĩla neew’a ngethi yaku oou, kana kala ke ĩvunĩ yakwa nĩkathaka nũndũ wa ũtanu.”—Luka 1:42-44.

Ĩtina wa kũtavw’a ndeto isu nĩ Elisavethi, Meli amũsũngĩie amwĩa: “Thayũ wakwa nũũmũtaĩa Yeova, na veva wakwa nũũmũtanĩa mũno Ngai, Mũtangĩĩi wakwa, nĩkwĩthĩwa nũmĩlilikanĩte ngombo yake ĩte nguma. Na sisya! kuma yu nzyawa syonthe ikaasya nyie nĩ mũtanu, nũndũ Ũla wĩ vinya nũmbĩkĩte maũndũ manene.” Ndeto isu Meli waneenie syĩonany’a kana o na kau nĩwakwatie kĩanda kĩseo mũno, vandũ va kwĩkathĩĩa, amũnengie Ngai nguma syonthe. Aisye atĩĩ: “Ĩsyĩtwa yake nĩ ĩtheu, na kuma nzyawa kũthi nzyawa ĩla ĩngĩ nũmew’ĩaa tei ala mamũkĩaa.”—Luka 1:46-50.

O na ĩngĩ, Meli nĩwaendeeie kũtaĩa Ngai yĩla waisye: “Nĩwĩkĩte maũndũ manene na kw’oko kwake; nũnyaĩĩkĩtye ala me mĩng’athĩlĩĩlyo ngoonĩ syoo. Nũmaumĩtye ala me vinya ivĩlanĩ sya ũsumbĩ na kũmanenevya ala mate nguma; nũtumĩte ala me na nzaa meanĩwa nĩ syĩndũ nzeo na ala athwii akamalũngya mate na kĩndũ. Nũmũtethetye Isilaeli mũthũkũmi wake aililikana tei wake tene na tene kwa Avalaamu na ũsyao wake, o tondũ waneenie na aa-ũmae maitũ.”—Luka 1:51-55.

Kwa ĩvinda ya myei ta ĩtatũ, Meli nĩwaendeeie kwĩkalany’a na Elisavethi, na nĩvatonyeka akethĩwa amũtetheeasya Elisavethi nũndũ akilĩlye kũsyaa. Nĩ ũndũ wa kwendeesya kũmanya kana aka asu elĩ aĩkĩĩku maĩ vamwe ĩvindanĩ yĩu yaĩ ya vata mũno thayũnĩ woo!

Nĩ ũndũ wa vata tũmanye kana Yesũ nĩwataĩiwe o na ataaĩsa kũsyawa. Elisavethi amwĩtie ‘Mwĩaĩi wake,’ o na kana kala kaĩ ĩvunĩ yake ‘nĩkathakie nũndũ wa ũtanu’ yĩla Elisavethi woonie Meli. Ũndũ ũsu waĩ kĩvathũkany’o mũno na  ũndũ andũ angĩ mesie kwĩka maũndũ mekwonany’a kana maiũmũnenga ndaĩa Meli na kana kala waĩ vakuvĩ kũsyaa, o tondũ tũkasoma ilungunĩ ila syĩ mbee.