Ĩvinda nĩyavikie ya Yosevu na andũ make, vamwe na anyanyae, na andũ ma mũsyĩ woo kũthi Yelusaleme o tondũ meekaa kĩla mwaka. Maendete kũu kũtanĩa Vasaka o tondũ Mĩao yaĩtye. (Kũtũngĩlĩlwa Kwa Mĩao 16:16) Kuma Nasaleti nginya Yelusaleme waĩ ũasa wa kĩlomita ta 120. Na andũ nĩmeekaa maũndũ maingĩ meyũmbanĩsye savalĩ ĩsu, na nĩmendaa mũno kũthi ku. Yesũ, ũla yu waĩ na myaka 12, eeteele na mea mũno ĩvinda yĩĩ ya kũtanĩa Vasaka na kũthi ĩkalũnĩ ĩngĩ.

Vasaka ndyaĩ ũndũ wa mũthenya o ũmwe kwa Yesũ na andũ ma mũsyĩ woo. Mũthenya ũla waatĩĩe Vasaka nĩw’o waĩ wa mbee wa mĩthenya mũonza ya Mboka ya Mũkate Ũte Ĩlawa. (Maliko 14:1) Mboka ĩsu yoonekaa ta kĩlungu kĩmwe kya Vasaka. Kyalo kya kuma mũsyĩ kwoo Nasaleti, vamwe na mĩthenya ĩla mesaa kwĩkala Yelusaleme, na ĩndĩ kwĩsa kũsyoka ĩngĩ Nasaleti kyaĩ kya syumwa ta ilĩ. Ĩndĩ ĩvindanĩ yĩĩ, ve ũndũ Yesũ weekie watuma mekalanga mbee wa syumwa isu. Ũndũ ũsu weekie wesie kũmanyĩka nĩ asyai make me savalĩnĩ masyokete Nasaleti.

Me nzĩanĩ menũkĩte, Yosevu na Meli moonaa Yesũ ta wĩ o vamwe na andũ moo ma mũsyĩ na anyanya. Ĩndĩ, yĩla ũtukũ wavikie me nzĩanĩ na mavanga kũthyũmũa, mayaamwona. Kwoou, nĩmambĩĩie kũmũmantha kũla kwĩ anyanyae na andũ moo ma mũsyĩ, ĩndĩ ndaĩ vamwe namo. Yĩla maemie kũmwona, Yosevu na Meli nĩmasyokie Yelusaleme makamũmanthe.

Mamũmanthie mĩthenya ĩlĩ mate kũmwona. Ĩndĩ ĩtina wa mĩthenya ĩtatũ, mamwĩthĩie ĩkalũnĩ. Meethĩie Yesũ ekalĩte katĩkatĩ wa amwe ma amanyĩsya ma Mĩao amethukĩĩsye na aimakũlya makũlyo. O na nĩwaseng’isye amanyĩsya asu nũndũ wa ũmanyi wake.

Yĩla Meli wamwonie amũkũlilye atĩĩ: “Mwana wakwa, ũtwĩkie ũu nĩkĩ? Nyie na ĩthe waku tũthĩnĩkie mũno tũikũmantha.”—Luka 2:48.

Yesũ nĩwaseng’ie mũno amanya kana asyai make mayeesĩ vala waĩle kwĩthĩwa aĩ. Amakũlilye atĩĩ: “Nĩkĩ mũũmanthaa? No mwĩĩsĩ kana no nginya nĩthĩwe nyũmbanĩ ya Asa wakwa?”—Luka 2:49.

7Yĩla Yosevu na Meli mamwonie Yesũ, nĩmenũkie nake Nasaleti, na aendeea kũmenyivĩsya. Nĩwaendeeie akyũĩva na akĩana. O na  kau aĩ o mũndũ wa mũika, nĩwendeeasya Ngai na andũ. Kuma Yesũ e o mũnini, aĩ ngelekany’o nzeo kwa kwĩthĩwa na kĩthito maũndũnĩ ma kĩ-veva na kũnenga asyai ndaĩa.