Lilikana kana myei ya mbee Meli e mũito aĩ kwa Elisavethi ũla wekalaa nthĩ yĩ ĩima ndũanĩ ĩmwe ya Yutia. Yu Meli aĩ na ĩvu ya myei ĩna na aĩ anasyoka mũsyĩ kwoo Nasaleti. Ĩtina wa ĩvinda ĩkuvĩ, ĩvu yake yaĩ yĩneneve na andũ maimanya kana nĩ mũito. Kwasũanĩa ũndũ Meli wathĩnĩkaa nũndũ wa ũndũ ũsu!

Na kũthũkya ũvoo, Meli nĩwevaaĩtw’e nĩ vundi wa mbwaũ weetawa Yosevu. O na nĩweesĩ kana mĩao ĩla Ngai wanengete Aisilaeli yoonanĩtye kana mũndũ mũka ũla wĩvaĩtw’e na ayĩka ũlaalai aĩle kũkimangwa na mavia nginya akw’e. (Kũtũngĩlĩlwa Kwa Mĩao 22:23, 24) Ĩndĩ, o na kau Meli ndeekĩte ũlaalai, nũtonya kwĩthĩwa athĩnĩkaa ĩũlũ wa ũndũ ũkũelesya Yosevu kana nĩ mũito, na ũndũ kũkwĩthĩwa amũtavya ũndũ ũsu.

No nginya Yosevu ethĩwe endaa mũno kũmwona Meli nĩkwĩthĩwa aminĩte myei ĩtatũ ũtamwona. Ĩvinda yĩla makomanie, nĩvatonyeka Meli akethĩwa amũtavisye Yosevu kana nĩ mũito, na amũelesya nesa kana ĩvu yake nĩ ya veva mũtheu wa Ngai. Ĩndĩ ndwaĩ ũndũ wĩ laisi kwa Yosevu kũelewa na kũĩkĩĩa maũndũ ala Meli wamũtavisye.

Yosevu nĩweesĩ kana Meli nĩ mũndũ mũka mũseo na wĩ mwĩkalĩle mũseo. Na nĩwamwendete mũno. Ĩndĩ, o na kaũ Meli nĩwaeleisye kana ĩvu yake nĩ ya veva mũtheu, Yosevu oonaa kana Meli akomie na mũndũũme ũngĩ. Na nũndũ Yosevu ndendaa Meli aikimangwa na mavia nginya akw’e, kana ekĩĩthw’e nthoni, nĩwavangie kũekana nake kwa kĩmbithĩ. Mĩthenyanĩ ĩsu, andũ ala mekwĩvaany’a matalawa ta andũ matwaanĩte, kwoou ethĩwa nĩmaeka kwĩvaany’a nĩmaaĩle kwosa valũa wa kũthasya mũtwaano.

Ĩtina, Yosevu o aendeee kũsũanĩa maũndũ  asu, nĩwakwatiwe nĩ too na akoma. E too, mũlaĩka wa Yeova nĩwamumĩlĩĩile ndotonĩ na amwĩa atĩĩ: “Ndũkakĩe kũtwaa Meli, nũndũ ĩvu yake yumanĩte na veva mũtheu. Akasyaa kavĩsĩ, na no nginya ũkete Yesũ, nũndũ akatangĩĩa andũ kuma naĩnĩ syoo.”—Mathayo 1:20, 21.

Yĩla Yosevu waamũkie, aĩ mũtanu mũno nũndũ wa kwĩthĩwa mũlaĩka nĩwamũeleisye nesa ũndũ Meli waitavie. Na nĩweekie na mĩtũkĩ ũndũ mũlaĩka wamũtavisye kwa kwosa Meli na kũmũtwaa mũsyĩ kwake. Ũndũ ũsu Yosevu weekie woonanisye ũtheinĩ kana e na Meli nĩmatwaana. Ĩndĩ, Yosevu ndaakoma na Meli ĩvinda yĩu waĩ mũito.

Ĩtina wa myei yĩana ũndũ mũna, Yosevu na Meli maĩ meyũmbanĩsye savalĩ ya kũthi vaasa mũno na mũsyĩ kwoo Nasaleti. Mendaa kũthi va Meli e mũito na akilĩlye kũsyaa?