Nũndũ Yesũ nĩwendete atũmwa make mũno, nĩwamombanisye nĩkwĩthĩwa nĩweesĩ ĩtina wa ĩvinda ĩnini nũkũmatia. Amina kũmombany’a, nĩwookĩlilye metho make asisya ĩtunĩ na avoya Ĩthe wake akyasya: “Mũkumye mwana waku nĩ kana o nake mwana waku aũkumye, kwosana na ũndũ ũmũnengete ũkũmũ ĩũlũ wa mĩĩ yonthe, nĩ kana o nake amanenge thayũ wa tene na tene onthe ala ũmũnengete.”—Yoana 17:1, 2.

Vate nzika, Yesũ nĩweesĩ kana ũndũ ũla waĩ wa vata vyũ nĩ kũmũtaĩa Ngai. Ĩndĩ o na ũu wĩ o vo, Yesũ nĩwawetie ĩũlũ wa wĩkwatyo ũla andũ me na w’o wa kwĩsa kũkwata thayũ wa tene na tene! Yesũ aĩ atonya kumya wovosyo nĩ kana andũ onthe matetheke, nũndũ nĩwanengetwe “ũkũmũ ĩũlũ wa mĩĩ yonthe.” Ĩndĩ no andũ avũthũ maĩ matetheke nĩ wovosyo ũsu. Nĩkĩ? Nũndũ no ala maĩ meke kwosana na ndeto ii Yesũ wawetie: “Na thayũ wa tene na tene nĩw’o ũũ, maendeee kũkwata ũmanyi ĩũlũ waku, Ngai ũla wa w’o weka, na ĩũlũ wa ũla wamũtũmie, nake nĩ Yesũ Klĩsto.”—Yoana 17:3.

Kwosana na ndeto isu sya Yesũ, no nginya mũndũ amũmanye Ngai na Mwana wake nesa vyũ, na ũu wĩonany’a kana aĩle kwĩthĩwa na ngwatanĩo ndũmu mũno namo. Aĩle kwĩthĩwa na woni ta woo. O na nĩwaĩle kũtata mũno ethĩwe na ndaĩa nzeo tamo. No nginya amanye kana ũndũ ũla wa vata mũno nĩ kũmũtaĩa Ngai ĩndĩ ti o andũ kũkwata thayũ wa tene na tene. Yesũ nĩwasyokie ĩngĩ kũweta ũndũ ũla wa vata vyũ mboyanĩ yake. Aisye atĩĩ:

“Nĩngũkumĩtye ĩũlũ wa nthĩ, nũndũ nĩnĩminĩte wĩa ũla wanengie nĩtethye. Kwoou, Asa, eka nĩthĩwe vakuvĩ naku nĩ na ndaĩa ĩla naĩ nayo yĩla naĩ vamwe naku mbee wa nthĩ ĩtanethĩwa.” (Yoana 17:4, 5) Kwĩanana na ndeto isu, Yesũ avoyaa nĩ kana ĩtina wa kũawa athayũũkw’e na aitũngĩwa ndaĩa ĩla waĩ nayo ĩtunĩ.

Ĩndĩ ũu ndwoonanasya kana Yesũ nĩwoolĩtwe nĩ maũndũ ala weanĩĩtye ũtavany’anĩ wake. Avoyie asya atĩĩ: “Nĩnĩmanyĩthĩtye ĩsyĩtwa yaku kwa andũ ala wanengie kuma kwa ala ma nthĩ. Maĩ maku na wanenga mo, na nĩmakwatĩte ndeto yaku.” (Yoana 17:6) Yesũ ndaaĩka o kũweta ĩsyĩtwa ya Ngai, Yeova, nthĩnĩ wa ũtavany’a wake. Ĩndĩ nĩwatetheeisye atũmwa make mamũmanye Yeova na ndaĩa syake, na ũndũ Yeova wonanasya kana nĩwendete andũ na e tei.

Atũmwa maĩ na ũmanyi ĩũlũ wa Yeova, kĩanda kya Mwana wake, na maũndũ ala Yesũ wamanyĩasya. Nĩkyo kĩtumi Yesũ waisye atĩĩ: “Nĩnĩmatavĩtye maũndũ ala wandavisye na nĩmametĩkĩlĩte, na vate nzika nĩmamanyĩte na makaĩkĩĩa kana nue wandũmie.”—Yoana 17:8.

Ĩtina wa ũu, Yesũ nĩwoonanisye kĩvathũkany’o kĩla kyaĩ vo katĩ wa aatĩĩi make na andũ ala angĩ ĩũlũ wa nthĩ. Aisye atĩĩ: “Nĩvoya kwondũ woo; ndiũvoya kwondũ wa nthĩ, ĩndĩ nĩvoya kwondũ wa ala wanengie, nũndũ nĩ maku . . . Asa Mũtheu, masũvĩe kwondũ wa ĩsyĩtwa yaku, yĩla ũnengete, nĩ kana methĩwe kĩndũ kĩmwe o tondũ ithyĩ twĩ kĩndũ kĩmwe. . . . Nĩnĩmasũvĩĩte, na vaiĩ ũmwe woo waanangwa ate o mwana wa wanangĩko,” nake nĩ Yutasi Isikalioti, ũla waendeee kũvangĩthya ũndũ ũkũmũvũnyanĩa Yesũ.—Yoana 17:9-12.

Yesũ aendeeie kũvoya akyasya: “Nthĩ nĩmamenete . . . Ndiũvoya nĩ kana ũmaumye kũũ nthĩ, ĩndĩ nĩvoya nĩ kana ũmasũvĩe nũndũ wa ũla mũthũku. Mo ti ma nthĩ o tondũ nyie nde wa nthĩ.” (Yoana 17:14-16) O na kau atũmwa na amanyĩw’a angĩ ma Yesũ maĩ ĩũlũ wa nthĩ ĩsumbĩkĩtwe nĩ Satani, maaĩle kwĩvathana nayo na mothũku mayo. Ĩndĩ mesaa kwĩka ũu ata?

 Atũmwa maaĩle kwĩthĩwa me atheu, kana mavathĩtwe mamũthũkũme Ngai kwa kũtũmĩa ũw’o ũla waĩ Maandĩkonĩ ma Kĩevelania na ũw’o ũla Yesũ mwene wamanyĩisye. Yesũ avoyie asya: “Mathesye kwĩsĩla ũla w’o; ndeto yaku nĩyo w’o.” (Yoana 17:17) Ĩtina wa ĩvinda, atũmwa amwe maĩ maandĩke mavuku maveveee, ala maĩ methĩwe katĩ wa mavuku ala me na “w’o” ũla ũtonya kũtetheesya mũndũ ethĩwe e mũtheu.

O na ĩngĩ, ve andũ angĩ maĩ metĩkĩle “w’o.” Nĩkyo kĩtumi Yesũ waisye: “Ndiũvoya kwondũ wa aa me oka [atũmwa 11], ĩndĩ o na kwondũ wa ala makandĩkĩĩa kwĩsĩla ndeto syoo.” Yesũ avoyaa kyaũ kwondũ wa andũ asu onthe? Avoyie asya atĩĩ: “Nĩ kana onthe methĩwe kĩndũ kĩmwe o tondũ we, Asa, wĩ ngwatanĩo vamwe nakwa, nakwa nĩ ngwatanĩo vamwe naku, nĩ kana o namo methĩwe me ngwatanĩo vamwe naitũ, nĩ kana nthĩ ĩtonye kũĩkĩĩa kana nĩwandũmie.” (Yoana 17:20, 21) Yĩla Yesũ waisye kana we na Ĩthe nĩ kĩndũ kĩmwe ndoonanasya kana we na Ĩthe wake nĩ mũndũ ũmwe, ĩndĩ oonanasya kana nĩmetĩkĩlanaa maũndũnĩ onthe ala mekaa. Kwoou Yesũ avoyaa nĩ kana aatĩĩi make matanĩe kwĩthĩwa na ngwatanĩo ta ĩla waĩ nayo na Ĩthe wake.

Ĩvinda ĩnini ĩvĩtu, Yesũ nĩwamũtavĩtye Vetelo na atũmwa ala angĩ kana nũkũthi kũmaseũvĩsya vandũ, na vandũ vau nĩ ĩtunĩ. (Yoana 14:2, 3) Yesũ nĩwasyokie kũweta ũndũ ũsu mboyanĩ. Aisye atĩĩ: “Asa, nĩngwenda ala wanengie meĩthĩwa vamwe nakwa vala nĩĩ, nĩ kana matonye kwona ndaĩa ĩla ũnengete, nũndũ nĩwambendie mbee wa mwambĩlĩlyo wa nthĩ.” (Yoana 17:24) Kwĩsĩla ndeto isu, Yesũ nĩwoonanisye kana kuma tene vyũ, o na Atamu na Eva mataaĩthĩwa na syana, Ngai nĩwamwendete mũno Mwana wake e ũmwe, ũla wesie kũtw’ĩka Yesũ Klĩsto.

Aiminĩĩa mboya yake, Yesũ nĩwatũngĩlĩĩile kũweta ĩũlũ wa ĩsyĩtwa ya Ngai na wendo ũla Ngai waĩ naw’o kwelekela atũmwa na ala onthe mesaa kwĩtĩkĩla ũla w’o. Aisye-ĩ: “Nĩnĩmamanyĩthĩtye ĩsyĩtwa yaku na ngaendeea kũtuma yĩmanyĩka, nĩ kana wendo ũla ũmbendete naw’o wĩthĩwe nthĩnĩ woo nakwa nĩthĩwe na ngwatanĩo vamwe namo.”—Yoana 17:26.