Yesũ aminĩĩie maũndũ ala wamanyĩasya atũmwa make ana e Kĩĩmanĩ kya Mĩthata kwa kũsũngĩa ĩkũlyo mamũkũlĩtye. Ĩkũlyo yoo yakonetye kwĩthĩwa vo kwake ĩvinda yũkĩte, na mũminũkĩlyo wa ĩvinda yĩĩ.

Matukũ 11, mwei wa Nisani nĩ mũthenya waĩ na maũndũ maingĩ mũno. Nĩvatonyeka ũkethĩa mũthenya ũsu nĩw’o Yesũ wamatavisye atũmwa ndeto ii masyokete Vethania makakome: “Nĩmwĩsĩ kana Vasaka yĩĩthĩwa mĩthenya ĩlĩ yũkĩte, na Mwana wa mũndũ akanenganwe oaĩwe mũtĩnĩ.”—Mathayo 26:2.

Veonekana kana mũthenya ũla waatĩĩe (Wakatatũ) Yesũ atindie e na atũmwa make me oka. Wakelĩ, aĩ anamakanisye atongoi ma ndĩni na amavuany’a ũtheinĩ. Nũndũ wa ũu, nĩmendaa kũmũaa. Na kwoou Yesũ ndaaĩyumĩlya ũtheinĩ matukũ 12, mwei wa Nisani nĩ kana vaikethĩwe kĩndũ kĩtonya kũmũsiĩĩa aitanĩa Vasaka na atũmwa make. Aĩ atanĩe Vasaka syũa yathũa mawĩoo mũthenya ũla waatĩĩe, naw’o nĩ matukũ 14, mwei wa Nisani.

Ĩndĩ anene ma athembi na atumĩa mayaaĩkala mana Vasaka ĩtanamba kũvika. Nĩmoombanĩie nza kwa mũthembi mũnene Kaiava. Nĩkĩ? Maĩ na woo mwingĩ nĩkwĩthĩwa Yesũ aĩ amavuanĩtye. Na kwoou nĩmavangie “mamũkwate Yesũ matũmĩĩte maũĩ na maimũaa.” Mesaa kwĩka ũu ata na ĩndĩĩ? Maisye: “Tũimũkwata ĩvinda ya mboka, nĩ kana andũ maikambĩĩsye ithokoo.” (Mathayo 26:4, 5) Nĩmakĩaa nũndũ Yesũ nĩwendetwe nĩ andũ aingĩ.

Atongoi asu ma ndĩni me vau nĩmakwatie mũeni. Ũndũ wa kũsengy’a nĩ kana mũeni ũsu aĩ ũmwe wa atũmwa ma Yesũ, ũla weetawa Yutasi Isikalioti. Satani aĩ ekĩĩte ĩsũanĩo ĩthũku nthĩnĩ wake nĩ kana avũnyanĩe Vwana wake!  Yutasi amakũlilye: “Mwĩnenga kyaũ nĩ kana nĩmũvũnyanĩe kũla mũĩ?” (Mathayo 26:15) Ũndũ ũsu nĩwamatanĩthisye mũno, na kwoou “meetĩkĩla kũmũnenga mbesa.” (Luka 22:5) Mamũnengie mbesa siana ata? Meetĩkĩlanile kũmũnenga ilungu 30 sya vetha. Ilungu isu nitonya kwĩthĩwa syaĩ sekeli 30, na ũsu nĩw’o waĩ thooa wa ngombo. (Kuma 21:32) Kwa kwĩka ũu atongoi asu ma ndĩni nĩmamũvũthisye Yesũ, nũndũ moonanisye nĩ mũndũ ũte va ũĩ. Kwoou Yutasi nĩwambĩĩie “kũmantha mwanya mũseo wa kũmũvũnyanĩa kũla maĩ ĩkomano yĩte vakuvĩ.”—Luka 22:6.

Mũthenya wa matukũ 13, mwei wa Nisani wambĩĩie syũa yathũa Wakatatũ, na ũsu nĩw’o waĩ ũtukũ wa thanthatũ na wa mũthya ũla Yesũ wakomeile Vethania. Mũthenya ũla waatĩĩe nĩmaaĩle kwĩka mĩvango yoo ya mũthya kwondũ wa Vasaka. Yaĩ no nginya kalondu kamanthwe nĩ kana kathĩnzwe na kaivĩvw’a ke kaima mũthenya wa matukũ 14, mwei wa Nisani wambĩĩa. Ĩndĩ maĩ maĩĩye kyaũya kya Vasaka va, na nũũ ũla waaĩle kwĩka mĩvango ĩsu? Yesũ ndaamatavya maũndũ asu. Kwoou Yutasi ndaĩ atonya kũtavya anene ma athembi mĩvango ĩsu.

Yesũ e o Vethania, nĩvatonyeka akethĩwa atũmie Vetelo na Yoana Wakana mũthenya, akĩmea: “Endai mũkaseũvye Vasaka nĩ kana tũye.” Namo mamũkũlya: “Wĩenda tũkamĩseũvĩsye va?” Nake Yesũ amea: “Yĩla mũũlika ndũanĩ nĩmũũkomana na mũndũ akuĩte mbisũ ya yũmba ya kwĩkĩa kĩw’ũ. Mũatĩĩei nyũmbanĩ ĩla ũkũlika. Na mũimũtavya mwene wa nyũmba, ‘Mũmanyĩsya ekũlya atĩĩ: “Yĩ va nyũmba ya aeni vala ndonya kũĩĩa Vasaka vamwe na amanyĩw’a makwa?”’ Na mũndũ ũsu nũkũmwony’a nyũmba nene ya ĩũlũ, yũmbanĩtw’e na yĩ na mĩio. Mĩseũvĩsyei vau.”—Luka 22:8-12.

Vate nzika mwene wa nyũmba ĩsu aĩ mũmanyĩw’a wa Yesũ. Na nũtonya kwĩthĩwa eesĩ kana Yesũ akamũkũlya atũmĩe nyũmba ĩsu kwondũ wa Vasaka. Yĩla atũmwa asu elĩ mavikie Yelusaleme, meethĩie maũndũ onthe mailye o ũndũ Yesũ wamatavĩtye. Kwoou nĩmaĩkĩĩthisye kana kala kalondu nĩkaseũvye na kyaũya kya Vasaka o nakyo nĩkĩseũvye kwondũ wa andũ 13, namo nĩ Yesũ na atũmwa make 12.