Ĩtina wa Yesũ kũvosya mũndũũme ũla wawaĩte ũwau wa mwimbo, nĩwekalangile nyũmba kwa Mũvalisi ũla wamũthoketye. E vau, Yesũ nĩwoonie andũ ala mathoketw’e mayĩnyuvĩa kwĩkala kũndũ kũla kwa ndaĩa na ũu watuma atũmĩa mwanya ũsu kũmamanyĩsya ũndũ matonya kwĩthĩwa na wĩnyivyo.

Yesũ aisye atĩĩ: “Yĩla wathokw’a nĩ mũndũ mbokanĩ ya mũtwaano, ndũkekale kũndũ kũla kwa ndaĩa. No vethĩwe ve mũndũ ũngĩ wĩ ndaĩa kwĩ we ũthoketw’e. Na ĩndĩ ũla ũmũthoketye mwĩ elĩ ayũka na aikwĩa, ‘Eka ũũ ekale vau ũilyĩ.’ Na ĩndĩ ũyuma vau wĩw’ĩte nthoni ũithi kwĩkala ĩtina.”—Luka 14:8, 9.

Yesũ asyokie asya atĩĩ: “Yĩla wathokw’a, enda ũkekale ĩtina, nĩ kana ũla ũkũthoketye ooka akwĩe, ‘Mũnyanyawa, enda mbee.’ Na ĩndĩ ũkakwata ndaĩa methonĩ ma aeni ala angĩ.” Kwĩka maũndũ asu nĩkwavĩtũkĩte o kwĩthĩwa na mwĩkalĩle mũseo tũ. Yesũ aisye atĩĩ: “Nũndũ kĩla mũndũ wĩnenevasya akanyivw’a, na mũndũ o na wĩva ũla wĩnyivasya akanenevw’a.” (Luka 14:10, 11) Vate nzika, Yesũ eekĩaa vinya ala mamwĩthukĩĩsye methĩwe na wĩnyivyo.

Yesũ asyokie aumya ngelekany’o ĩngĩ ya kũmũmanyĩsya ũla Mũvalisi wamũthoketye. Ngelekany’onĩ ĩsu nĩwamũeleisye ĩũlũ wa andũ ala waĩle kũthokya kwake nĩ kana amwendeesye Ngai. Yesũ eeie Mũvalisi ũsu atĩĩ: “Yĩla wavanga kũseũvĩsya andũ lĩu wa mũthenya kana lĩu wa wĩoo, ndũkathokye anyanyau kana ana-a-au kana andũ ma mũsyĩ kana atũi maku ala athwii. Nũndũ o namo no mese kũũthokya, na mayĩthĩwa no ta meũkũĩva. Ĩndĩ yĩla wavangĩthya mboka, thokya ala ngya, syonze, ala au mamutha, na ilalinda; na ũkeethĩwa wĩ mũtanu, nũndũ mai na kĩndũ matonya kũkũĩva nakyo.”—Luka 14:12-14.

Vai mũndũ ũtendete kũthokya anyanyae, andũ ma mũsyĩ, kana atũi nĩ kenda maĩsanĩe, na Yesũ ndaaonany’a kana ve ũthũku kwĩka ũu. Ĩndĩ o na ũu wĩ o vo, Yesũ akindĩlĩĩle kana yĩla mũndũ waseũvya lĩu na athokya ngya, iema, na ala matonaa, no akwate moathimo maingĩ. Yesũ nĩwaendeeie kũelesya Mũvalisi ũla wamũthoketye amwĩa atĩĩ: “Ũkaĩvwa ĩvinda ya ũthayũũkyo wa ala alũngalu.” Mũndũ ũngĩ wathoketw’e nĩweetĩkĩlanile na ndeto sya Yesũ kwa kwasya atĩĩ: “Nĩ mũtanu mũndũ ũla ũĩsaa Ũsumbĩnĩ wa Ngai.” (Luka 14:15) Mũndũ ũsu nĩwamanyie kana nĩ kĩanda kya mwanya mũndũ kũlika Ũsumbĩnĩ wa Ngai. Ĩndĩ ti andũ onthe moonaa ũsu ne ũndũ wa mwanya o tondũ Yesũ waendeeie kwasya. Aisye atĩĩ:

“Mũndũ ũmwe nĩwaseũvisye lĩu wa wĩoo, na athokya andũ aingĩ. Na atũma ngombo yake . . . ĩkatavye ala mathoketw’e, ‘Ũkai, nũndũ kĩla kĩndũ nĩkyũmbany’e.’ Ĩndĩ onthe mambĩĩa kũnengane itumi sya kũlea kũthi. Wa mbee amwĩa, ‘Nĩnathooie mũũnda na nĩenda kũthi ngawone; nĩngũũkũlya ũndekee.’ Na ũngĩ asya, ‘Nĩnathooie ng’ombe ĩkũmi, na nĩendete kũisisya; nĩngũũkũlya ũndekee.’ Nake ũngĩ asya, ‘No ĩndĩ nĩnatwaanie, na nũndũ wa ũu nditonya kũka.’”—Luka 14:16-20.

Maũndũ ala andũ asu mawetaa maĩ o ma kwĩlingya! Mũndũ akothaa kũsisya mũũnda kana indo atanamba kũithooa, kwoou vayaĩ vata wa kũisisya aminĩte kũithooa. Nake mũndũ wa katatũ ndakwetye kwĩyũmbany’a nĩ kana atwaane. Aĩ aminĩte kũtwaana, na kwoou ũndũ ũsu ndwaĩ ũmũsiĩĩa kũthi vala wathoketw’e. Yĩla vwana weewie itumi isu ite vala siĩ, athatie mũno na eea ngombo yake atĩĩ:

“Umaala mĩtũkĩ ũthi nzĩanĩ ila nene na tũsĩlanĩ twa ndũa, na ũiete vaa ngya na syonze na ilalinda na ala au mamutha.” O na ĩtina wa ngombo ĩsu kũthokya andũ asu, vaĩ o na mwanya watialile. Nĩvo ĩndĩ vwana wayo wamĩtavisye atĩĩ: “Umaala ũthi nzĩanĩ na tũsĩlanĩ na ũimathing’ĩĩsya moke, nĩ kana nyũmba yakwa yusũe. Nũndũ nĩngũmwĩa, vaiĩ ũmwe wa ala nĩĩthoketye wĩsama lĩu wakwa wa wĩoo.”—Luka 14:21-24.

Maũndũ asu Yesũ waeleisye meonany’a nesa ũndũ Yeova Ngai wamũtũmĩie Yesũ Klĩsto nĩ kana athokye andũ ma kĩla mũthemba methĩwe matonya kũlika Ũsumbĩnĩ wa ĩtu. Ayuti, na mũno mũno atongoi ma ndĩni, nĩmo maĩ ma mbee kũthokw’a. Ĩndĩ aingĩ moo nĩmaleile kĩla Yesũ wamamanyĩasya. Ĩndĩ o na malea, Yesũ nĩwaendeeie kũthokya andũ angĩ. Vate nzika, ngelekany’o ĩsu ya Yesũ yoonanasya kana ĩvindanĩ yũkĩte aĩ athokye Ayuti ala moonekaa me ma kĩlasi kya nthĩ na angĩ ala maalyũkĩte makalika ũthaithinĩ wa Kĩyuti. Na ĩndĩ mũthya, Yesũ aĩ athokye andũ ala Ayuti moonaa ta mataĩle methonĩ ma Ngai.—Meko ma Atũmwa 10:28-48.

Vate nzika, maũndũ ala Yesũ waneeneaa maĩkĩĩthasya nesa vyũ ndeto ila syaneeniwe nĩ mũndũ ũmwe wathoketw’e nĩ ũla Mũvalisi. Mũndũ ũsu aisye atĩĩ: “Nĩ mũtanu mũndũ ũla ũĩsaa Ũsumbĩnĩ wa Ngai.”