Yesũ nĩwaumie Velea na avika vakuvĩ na ũtũi wĩtawa Vethania ũla wĩ maili elĩ ngalĩko ya wumĩlonĩ wa syũa ya Yelusaleme. Ĩvinda yĩu Meli na Matha, eĩtu-a-inyia ma Lasalo, maĩ na kyeva nũndũ wa kũkw’ĩĩwa nĩ mwana-a-inyia woo. Na ve andũ aingĩ mookĩte kũmakiakisya.

Mũndũ ũmwe nĩwatavisye Matha kana Yesũ aĩ nzĩanĩ okĩte, na kwoou Matha athi kũkomana nake. Matha nĩwamũtavisye Yesũ maũndũ ala ũtonya kwĩthĩwa asũanĩaa e na mwĩĩtu-a-inyia vandũ va mĩthenya ĩna. Amwĩie: “Mwĩaĩi, ta kethĩwa ũnaĩ vaa, mwana-a-ia ndethĩwa anakwie.” Ĩndĩ ũu ti kwasya ndaĩ na wĩkwatyo. Ongelile kwasya: “Nĩnĩsĩ kana ũndũ o na wĩva ũla wamũvoya Ngai, Ngai akaũnenga.” (Yoana 11:21, 22) Nĩweesĩ kana Yesũ no atetheesye mwana-a-inyia.

Yesũ amwĩie: “Mwana-a-inyia waku nũkũthayũũka.” Yĩla Yesũ waisye ũu Matha asũanĩie kana eweta ĩũlũ wa ũthayũũkyo wa ĩvinda yũkĩte ũla ũkethĩwa ĩũlũ wa nthĩ, na wĩkwatyo ũsu nĩw’o Avalaamu na angĩ maĩ naw’o. Oonanisye ũu yĩla waisye: “Nĩnĩsĩ kana akathayũũka mũthenya wa mũminũkĩlyo.”—Yoana 11:23, 24.

Ĩndĩ ve ũndũ Yesũ waĩ atonya kwĩka akamavetangĩa kyeva kyoo o na vavikiwe vau? Nĩwamũlilikanilye Matha kana Ngai nũmũnengete ũkũmũ ĩũlũ wa kĩkw’ũ. Amwĩie: “Ũla ũndĩkĩĩaa, o na akw’a, akeethĩwa thayũ ĩngĩ; na mũndũ o na wĩva ũla wĩ thayũ na ũndĩkĩĩaa nyie, ndakakw’a nongi.”—Yoana 11:25, 26.

Yesũ ndoonanasya kana amanyĩw’a make ala maĩ thayũ ĩvinda yĩu maikakw’a. O na nĩwatavĩtye atũmwa make kana o nake no nginya akw’e. (Mathayo 16:21; 17:22, 23) Kĩla Yesũ wakindĩlĩĩlaa nĩ kana kũmũĩkĩĩa kwaĩ kũtonya kũtuma mũndũ akwata thayũ wa tene na tene. Aingĩ ala makakwata thayũ wa tene na tene makeeka kũthayũũkw’a. Ĩndĩ andũ aĩkĩĩku ala mekalĩte ĩvindanĩ ya mũminũkĩlyo nĩmatonya kũlea kwĩsa kũkw’a o na ĩmwe. O na ũu wĩ o vo, mũndũ o na wĩva ũla ũmũĩkĩĩaa no ekale esĩ kana o na akesa kũkw’a, ndakekala e mũkw’ũ myaka yonthe.

Ĩndĩ Yesũ ũla waisye, “Nyie ninyie ũthayũũkyo na ninyie thayũ,” aĩ atonya kũtetheesya Lasalo, ũla waĩ mũkw’ũ vandũ va mĩthenya kauta? Yesũ akũlilye Matha atĩĩ: “We nũkũĩkĩĩa ũndũ ũsu?” Nake Matha amwĩa: “Ĩĩ, Mwĩaĩi, nĩ na mũĩkĩĩo kana nue Klĩsto Mwana wa Ngai, ũla waĩ oke ĩũlũ wa nthĩ.” Nũndũ Matha aĩ na mũĩkĩĩo kana Yesũ no eke ũndũ mũthenya ũsu, nĩwasembie mũsyĩ eeta mwĩĩtu-a-inyia nzama na amwĩa: “Mũmanyĩsya e vaa na nũkũkwĩta.” (Yoana 11:25-28) Yĩla Meli weewie ũu, nĩwaumie nyũmba na aatĩĩwa nĩ andũ aingĩ nũndũ moonaa aendete vala ve mbũa ya Lasalo.

Vandũ va ũu, Meli aendie kũla kwĩ Yesũ na  avalũka maaũnĩ make aĩĩte na atũngĩlĩĩla ndeto ila mwĩĩtu-a-inyia waneenie. Aisye: “Mwĩaĩi, ta kethĩwa ũnaĩ vaa, mwana-a-ia ndethĩwa anakwie.” Yĩla Yesũ woonie Meli aiĩa na ala angĩ ĩkomanonĩ maiĩa, eewie aũmĩa ngoonĩ na athĩnĩka mũno nginya aĩa. Ala mamwonie nĩmakiitiwe mũno nĩ ũndũ ũsu. Ĩndĩ amwe katĩ woo makũlya: “We mũndũ ũũ ũnasalukilye metho ma ũla mũndũ ũnaĩ kĩlalinda ndeĩ atonya kũsiĩĩa mũndũ ũũ ndakakw’e?”—Yoana 11:32, 37.