Ĩtina wa Yesũ kũnengane ngelekany’o ĩkwonany’a kĩthing’ĩĩsyo kya kũvoya, nĩwanenganie ĩngĩ ĩkwonany’a nĩkĩ mũndũ waĩle kwĩka ũu ate kũeka. (Luka 11:5-13) Ainengane ngelekany’o ĩsu nũtonya kwĩthĩwa aĩ Samalia kana Kalilii. Ngelekany’o yake nĩyo ĩĩ:

“Ndũanĩ ĩmwe kwaĩ mũsili ũtakĩaa Ngai na ũtanengete mũndũ o na ũmwe ndaĩa. O na ĩngĩ, kwaĩ mũndũ mũka ũmwe ndiwa ũla watindĩaa kũthi kũla ũĩ na aimwĩa, ‘Ĩkĩĩthya kana ũsili wa katĩ nĩwaatĩĩwa katĩ wakwa na ũla ũnzikatĩte.’ Kwa ĩvinda yĩasa, mũsili ũsu ndendaa kwĩka ũu, ĩndĩ ĩtina asya ngoonĩ, ‘Nyie ndikĩaa Ngai na ndinengete mũndũ o na ũmwe ndaĩa, ĩndĩ nũndũ mũndũ mũka ũũ ndiwa aendeee kũnthĩny’a, nĩngũĩkĩĩthya kana nĩwakwata ũsili wa katĩ nĩ kana ndakaendeee kũka na kũnosya ayenda nĩmũtetheesye.’”—Luka 18:2-5.

Yesũ aielesya ngelekany’o ĩsu aisye: “Nĩasya nĩmweew’a ũndũ mũsili ũsu waisye, o na kau ndaĩ mũlũngalu! Kwa w’o, we Ngai nũemwa nĩ kũĩkĩĩthya kana anyuve make ala mamwĩkaĩlaa ũtukũ na mũthenya nĩmakwata ũsili wa katĩ?” (Luka 18:6, 7) Yesũ endaa kũweta kyaũ ĩũlũ wa Ĩthe wake?

Yesũ ndesa kwĩthĩwa oonanasya kana Yeova Ngai ailye ta mũsili ũsu ũtaĩ mũlũngalu. Endaa kwonany’a atĩĩ: Ethĩwa o na mũsili ũte mũlũngalu no eanĩsye mavata ma mũndũ wĩ na kĩthing’ĩĩsyo, vate nzika Ngai ndesa kũemwa nĩ kwĩka ũu. Ngai nĩ mũlũngalu na nĩ mũseo. Kwoou ndaema kũsũngĩa andũ make maendeea kũmũvoya mate kũeka. Nĩ kana akindĩlĩĩle ũndũ ũsu, Yesũ aisye: “Nĩngũmũtavya, [Ngai] akaĩkĩĩthya kana nĩmakwata ũsili wa katĩ mĩtũkĩ.”—Luka 18:8.

Mavinda maingĩ, andũ ala ngya na ma kĩlasi kya nthĩ maikwataa sila wa katĩ. O na vailye ũu, ala athwii na me na ivĩla nĩmonaw’a kyende. Ĩndĩ Ngai ekaa maũndũ kwa nzĩa yĩ kĩvathũkany’o. Ĩvinda yake yavika akaĩkĩĩthya kana andũ ala athũku nĩmasilĩlwa, na athũkũmi make nĩmakwata thayũ wa tene na tene.

Naaũ ala mesaa kwĩthĩwa me na mũĩkĩĩo ta wa mũndũ mũka ũsu ndiwa? Nĩ meana maĩkĩĩaa kana Ngai “akaĩkĩĩthya kana nĩmakwata ũsili wa katĩ mĩtũkĩ”? Yesũ amina kũnengane ngelekany’o ĩsu ĩkwonany’a vata wa kũvoya na kĩthing’ĩĩsyo nĩwasyokie akũlya ĩkũlyo yĩngĩ yĩkwonany’a vata wa mboya. Akũlilye atĩĩ: “Yĩla Mwana wa mũndũ ũkavika, kwa w’o akeethĩa mũĩkĩĩo ũsu ĩũlũ wa nthĩ?” (Luka 18:8) Ĩkũlyo yĩu yoonanasya kana ti aingĩ maĩ methĩwe na mũĩkĩĩo ũsu Klĩsto ayũka.

Amwe meethukĩĩsye Yesũ ĩvinda yĩu meew’aa me na mũĩkĩĩo mũlũmu vyũ. Meeyonaa me alũngalu na mayona andũ ala angĩ tate kĩndũ. Yesũ nĩwanenganie ngelekany’o ĩngĩ ĩkonetye andũ ma mũthemba ũsu.

 Aisye: “Aũme elĩ nĩmambatie ĩkalũnĩ makavoye, ũmwe aĩ Mũvalisi na ũla ũngĩ aĩ mumĩthya wa koti. Mũvalisi ũsu nĩwaũngamie na ambĩĩa kũvoya maũndũ aa na ngoo, ‘Ame Ngai, nĩngũũtũngĩa mũvea nũndũ nyie ndiilye andũ ala angĩ—avenani, ala mate alũngalu, ilaalai—kana o na mumĩthya ũya wa koti. Nĩndĩĩaa kũya kelĩ kwa kyumwa; na nĩnumasya kĩlungu kya ĩkũmi kya syĩndũ syonthe ila nĩkwataa.’”—Luka 18:10-12.

Avalisi mendete mũno kwĩyonany’a ũndũ methĩawa me alũngalu mbee wa andũ. Meekaa ũu nĩ kana moneke nĩ andũ. Meeyĩkĩĩaa mwĩao wa kũtĩĩa kũya Wakwambĩlĩlya na Wakana. Mĩthenya ĩsu kweethĩawa andũ aingĩ mũno ndũnyũ na nĩmeesĩ mailea kwoneka. O na ĩngĩ, nĩmatataa vyũ kumya kĩlungu kya ĩkũmi o na kya mboka sya mũũndanĩ. (Luka 11:42) Myei yĩ navu ĩtinanga maĩ mananeena ndeto ikwonany’a ũndũ mavũthĩĩasya andũ ala angĩ. Maisye: “Ĩkomano yĩĩ yĩtesĩ Mĩao [kwosana na woni wa Avalisi] nĩ andũ aumanĩe.”—Yoana 7:49.

Yesũ aendeeie kwasya atĩĩ: “Ĩndĩ mumĩthya ũsu wa koti aũngamĩte vaasa, o na ndendaa kũkĩlya metho make asisye ĩtunĩ, ĩndĩ aendeee kwĩkũnanga kĩthũi akyasya, ‘Ame Ngai, mbĩw’ĩe tei, nyie nĩ mwene naĩ.’” Mumĩthya ũsu wa koti nĩweetĩkĩlaa vyũ kana we nĩ mwene naĩ. Yesũ aisye: “Nĩngũmũtavya, mũndũ ũsu enũkie mũsyĩ kwake na atalĩlwa ũlũngalu kũte Mũvalisi ũsu. Nũndũ kĩla mũndũ wĩnenevasya akanyivw’a, ĩndĩ mũndũ o na wĩva ũla wĩnyivasya akanenevw’a.”—Luka 18:13, 14.

Ngelekany’o ĩsu ya Yesũ nĩyoonanisye nesa kana wĩnyivyo nĩ wa vata. Yĩu yaĩ ĩsomo ya vata mũno kwa amanyĩw’a make nũndũ kuma me anini nĩmoonaa Avalisi mayonany’a ũndũ methĩawa me alũngalu na maituma andũ masũanĩa mũno ĩũlũ wa ũkũmũ na ivĩla sya monene. Na nengĩ ĩsomo yĩu nĩ ya vata o na kwa aatĩĩi ma Yesũ onthe.