Ĩvinda yĩmwe Yesũ e kyalonĩ esĩle kĩsionĩ kya Velea elekele Yelusaleme, mwanake ũmwe mũthwii nĩwookie vala ũĩ asembete. Yĩla wavikie vala ũĩ nĩwatulilye ndu mbee wake. Mwanake ũsu aĩ “mũtongoi.” Nũtonya kwĩthĩwa aĩ mũũngamĩi wa ĩsinakoke kana mũsami wa Nzama ya Ayuti. Amũkũlilye Yesũ atĩĩ: “Mũmanyĩsya mũseo, naĩle kwĩka ata nĩ kana nĩkwata thayũ wa tene na tene?”—Luka 8:41; 18:18; 24:20.

Yesũ amũsũngĩie amwĩa: “Nĩkĩ ũũmbĩta mũseo? Vaiĩ mũndũ mũseo eka o ũmwe, nake nĩ Ngai.” (Luka 18:19) Nĩvatonyeka ũkethĩa mwanake ũsu atũmĩie ndeto “mũseo” ta ĩsyĩtwa ya ũnene o tondũ alavai meekaa. O na kau Yesũ aĩ mũmanyĩsya wamanyĩasya nesa, nĩwatetheeisye mũndũ ũsu amanye kana ĩsyĩtwa “Mũseo” no ya Ngai e weka.

Yesũ asyokie amwĩa atĩĩ: “Ethĩwa nũkwenda wĩkwata thayũ, kwataa mĩao.” Nake mwanake ũsu amũkũlya: “Yĩva?” Yesũ nĩwaneeneie mĩao ĩtano katĩ wa ĩla Mĩao Ĩkũmi. Aneeneie mĩao ĩla ĩkonetye kũya (kũng’ea), kũlaalaa, kumya ũkũsĩ wa ũvũngũ, na kũnenga asyai ndaĩa. Na ĩndĩ ongela mwĩao ũngĩ wa vata, naw’o nĩ: “No nginya ũmwende mũtũi waku o ũndũ wĩyendete.”—Mathayo 19:17-19.

Mũndũ ũsu amũsũngĩie, amwĩa: “Nĩnĩatĩĩte maũndũ asu onthe, nĩ kyaũ yu ndialĩtye?” (Mathayo 19:20) No kwĩthĩwa asũanĩaa ta ve ũndũ mũnene wa mwanya waaĩlĩte kwĩka nĩ kana akwate thayũ wa tene na tene. Yesũ ‘nĩwamwendie’ yĩla woonie akũlya ũu e na ngoo nthalĩku. (Maliko 10:21) Ĩndĩ ve kĩndũ kyamũsiĩĩaa.

Mũndũ ũsu endete syĩndũ syake mũno. Kwoou Yesũ amwĩie: “Ve ũndũ ũtialĩtye: Enda ũkathoosye syĩndũ ila wĩ nasyo na ũinenga ngya, na ũkeethĩwa na ũthwii ĩtunĩ; na ĩndĩ ũyũka ũtw’ĩke mũatĩĩi wakwa.” Mũndũ ũsu aaĩlĩte kũnenga ngya mbesa syake nũndũ ngya iitonya kũmũĩva, na ĩndĩ aitw’ĩka mũmanyĩw’a wa Yesũ. Yesũ nũtonya kwĩthĩwa amwĩw’ĩie tei mũno yĩla woonie ookĩla na athi athatĩte.  Nũndũ mũndũ ũsu nĩwendete ũthwii wake, kana kwa ndeto ingĩ “syĩndũ mbingĩ” ila waĩ nasyo, nĩwaemiwe nĩ kwona ũthwii wa w’o ũla waĩ mbee wake. (Maliko 10:21, 22) Ĩtina wa ũu Yesũ aisye: “Ũkeethĩwa wĩ ũndũ wĩ vinya ta kĩ kwa ala me mbesa kũlika Ũsumbĩnĩ wa Ngai!”—Luka 18:24.

Amanyĩw’a nĩmaseng’iw’e nĩ ndeto isu, na ila Yesũ waneenie ĩtina wa vau. Aisye: “Nĩ ũndũ wĩ laisi kwa ngamĩle kũlikĩla kalimanĩ ka singano wa kũtuma, kwĩ mũndũ mũthwii kũlika Ũsumbĩnĩ wa Ngai.” Ndeto isu syatumie amanyĩw’a makũlya atĩĩ: “Nũũ ũtonya kũtangĩĩwa?” Ĩkũlyo nĩ: Yo kũtangĩĩwa nĩ ũndũ wĩ vinya ũkethĩa mũndũ ndesa kũũvikĩĩa? Yesũ amaketeeie na amea:“Maũndũ ala matatonyeka kwa andũ nĩmatonyeka kwa Ngai.”—Luka 18:25-27.

Vetelo nake aisye kana mo meekie ũtwi wĩ kĩvathũkany’o na ũla mũndũ mũthwii. Aisye: “Sisya! Ithyĩ nĩtwatiie syĩndũ syonthe na twakũatĩĩa; tũkakwata kyaũ?” Yesũ nĩwawetie kĩla mekwata nũndũ wa ũtwi woo. Aisye: “Ĩvinda yĩla syĩndũ syonthe ikethĩwa iitw’ĩkĩthw’a nzaũ, yĩla Mwana wa mũndũ ũkekalĩla kĩvĩla kyake kya ũsumbĩ kya ũtheu mũtisu, inyw’ĩ ala mwangatĩĩie mũkekalĩla ivĩla sya ũsumbĩ 12 mũkĩsilĩla mbaĩ 12 sya Isilaeli.”—Mathayo 19:27, 28.

Vate nzika Yesũ awetaa ĩvinda yĩla syĩndũ syonthe ikethĩwa iitw’ĩkĩthw’a nzaũ syĩkale ta ũndũ mũũnda wa Eteni wailye. Vetelo na amanyĩw’a ala angĩ makatuvwa kwa kũsumbĩka na Yesũ ĩũlũ wa Nthĩ Nzaũ, na yĩu nĩ ĩtuvi ĩnene kwĩ kĩndũ o na kĩva kĩla mũndũ ũtonya kwĩyĩima nĩ kana ayĩkwate.

Ĩndĩ ti atĩ maĩ makwate ĩtuvi ya ĩvinda yũkĩte yĩ yoka. Amanyĩw’a ma Yesũ maĩ na maũndũ ala matanĩaa ĩvinda yĩu. Yesũ aisye: “Vaiĩ mũndũ waatia nyũmba kana kĩveti kana ana-a-inyia kana asyai kana syana kwondũ wa Ũsumbĩ wa Ngai ũtakakwata syĩndũ mbingĩ ĩvindanĩ yĩĩ, na ĩvinda yĩla yũkĩte, thayũ wa tene na tene.”—Luka 18:29, 30.

Ndeto isu syĩonany’a kana amanyĩw’a ma Yesũ maĩ matonya kũtanĩa ũnyanya vamwe na athaithi ala angĩ. Ũnyanya ũsu wĩthĩawa wĩ wa mwanya mũno kwĩ ũla ũtonya kũtanĩwa nĩ andũ masyaanĩw’e kana ma mũsyĩ ũmwe. Ũndũ wa kyeva nĩ kana mwanake ũsu waĩ mũthwii nĩwaaisye moathimo asu o vamwe na ũathimo wa kũkwata thayũ Ũsumbĩnĩ wa Ngai ĩtunĩ.

Yesũ ongelile kwasya ũũ: “Ĩndĩ aingĩ ala me mbee makeethĩwa ĩtina, na ala me ĩtina makeethĩwa me mbee.” (Mathayo 19:30) We oonanasya ata?

Mwanake ũsu aĩ ũmwe katĩ wa ala maĩ “mbee” nũndũ aĩ ũmwe wa atongoi ma Ayuti. Na nũndũ nĩwakwataa mĩao ya Ngai, oonekaa atonya kwĩanĩsya maũndũ maingĩ, na kwoou endekaa eke ũu. Ĩndĩ endete ũthwii na syĩndũ syake mbee wa kĩndũ o na kĩva thayũnĩ. Kĩvathũkany’o nake, andũ ala ma kĩlasi kya nthĩ nĩmeesĩ kana Yesũ amanyĩasya ũla w’o vamwe na nzĩa ya kũkwata thayũ. Mo maĩ ma “ĩtina,” ĩndĩ maĩ methĩwe ma “mbee.” Maĩ na wĩkwatyo wa kwĩkalĩla ivĩla sya Ũsumbĩ ĩtunĩ me na Yesũ masumbĩkĩte ĩũlũ wa Nthĩ Nzaũ.