Yesũ amina kũvatiswa nĩ Yoana, atongoeiw’e nĩ veva mũtheu wa Ngai nginya weũnĩ wa Yutia. Yesũ aĩ na maũndũ maingĩ mũno ma kũsũanĩa. Aivatiswa, ‘matu nĩmavingũkie.’ (Mathayo 3:16) Nũndũ wa ũndũ ũsu weekĩkie, Yesũ aĩ atonya kũlilikana maũndũ amwe ala weemanyĩisye na ala weekaa e ĩtunĩ. Na vate nzika aĩ na maũndũ maingĩ mũno ma kũsũanĩa kwa ũliku!

Yesũ aminie mĩthenya 40, ũtukũ na mũthenya e weũnĩ. Ĩvinda yĩu yonthe, vai kĩndũ Yesũ waĩsaa. Na nũndũ nĩweew’aa nzaa mũno, Satani, ũla Ndevili nĩwookie kũmũtata. Amwĩie Yesũ atĩĩ: “Ethĩwa wĩ mwana wa Ngai, ĩaĩe mavia aa matw’ĩke mĩkate.” (Mathayo 4:3) Yesũ nĩwaleanile na ĩtatwa yĩu nũndũ nĩweesĩ kana Ngai ndamũnengete vinya aũtũmĩae kwĩanĩsya mawendi make.

Ndevili ndaaeka kũmũtata Yesũ ĩtina wa ĩtatwa yĩu. Nĩwamũtatie kwa nzĩa ĩngĩ. Amwĩie Yesũ eyĩkye kuma vandũ vala vatũlu vyũ va ĩkalũ. Ĩndĩ Yesũ nĩwaleanile na ĩtatwa yĩu kwa kũlea kwĩyonany’a. Atũmĩie Maandĩko kwonany’a kana nĩ ũthũku kũmũtata Ngai kwa nzĩa ĩsu.

Ĩtina, Ndevili nĩwamũtatie Yesũ ya katatũ kwa kũmwony’a “mosumbĩ onthe ma nthĩ na ũnene wamo.” Ĩtina wa kũmwony’a ũndũ ũsu, amwĩie Yesũ atĩĩ: “Nĩngũũnenga syĩndũ ii syonthe ethĩwa nũũtulya ndu na kũnthaitha.” Yesũ nĩwaleanile vyũ na ĩtatwa yĩu, aisye atĩĩ: “Thi, Satani!” (Mathayo 4:8-10) Ndaaĩtĩkĩla ĩtatwa yĩu yĩmũkĩlye vinya nũndũ nĩweesĩ kana no Yeova e weka waĩle kũnengwa ũthũkũmi mũtheu. Vate nzika, Yesũ anyuvie kũendeea kwĩthĩwa e mũĩkĩĩku kwa Ngai.

No twĩmanyĩsye maũndũ mana kumana na matatwa ala Yesũ wakomanie namo na ũndũ wamasindie. Matatwa ala mamũkwatie monanasya kana Ndevili e kw’o, ĩndĩ Ndevili ti ũthũku wĩ nthĩnĩ witũ kĩvathũkany’o na ũndũ andũ amwe masũanĩaa. O na ĩngĩ, matatwa asu ma Satani nĩmonanasya kana silikalĩ sya nthĩ nĩ malĩ ya Ndevili, na nĩwe ũitongoesye. Na ũu nĩw’o nũndũ kethĩwa silikalĩ sya nthĩ ti sya Ndevili, ndethĩwa aamũtata Klĩsto aitũmĩĩte.

Ũndũ ũngĩ nĩ kana Ndevili aisye nũkũmũnenga Yesũ ĩtuvi amũthaitha o ĩvinda yĩmwe. Na nĩweeyũmbanĩtye kũmũnenga Yesũ mosumbĩ onthe ma nthĩ eeka ũu. O na ũmũnthĩ, Ndevili no atũtate atũmĩĩte nzĩa o ta ĩsu watũmĩie kũmũtata Yesũ. Kwa ngelekany’o, no atũtate kwa kũtũmĩa maũndũ mekwoneka me maseo na matonya kũtũtetheesya tũkwate ũthwii wa nthĩ ĩno na ũkũmũ. Twonanasya kana twĩ oĩ yĩla twaatĩĩa ngelekany’o ya Yesũ kwa kũendeea kwĩthĩwa twĩ aĩkĩĩku kwa Ngai, o na twakwatwa nĩ matatwa mailyĩ ata! Ĩndĩ nĩ ũseo tũlilikane kana Ndevili ambie kũmũtia Yesũ “nginya ĩvinda yĩngĩ yaĩlĩte.” (Luka 4:13) O ta ũu, Ndevili no eteele mwanya ũngĩ umĩle nĩ kana atũtate. Kwoou no nginya tũendeee kwĩkala twĩ metho.