Yesũ e o Yelusaleme kwondũ wa Mboka ya Ivanda (kana, Tũsũmba), nĩwaendeeie kũmanyĩsya ũw’o wa vata. Ayuti amwe ala maĩ mbokanĩ ĩsu maĩ manamwĩa Yesũ atĩĩ: “Ithyĩ twĩ ũsyao wa Avalaamu na tũyaaĩthĩwa nongi ngombo.” Yesũ ameie: “Nĩnĩsĩ kana mwĩ ũsyao wa Avalaamu. Ĩndĩ nĩmũkwenda kũmbũaa, nũndũ mũyĩtĩkĩlaa momanyĩsyo makwa. Nyie nĩneenaa maũndũ ala noonie yĩla naĩ na Asa wakwa, ĩndĩ inyw’ĩ mwĩkaa maũndũ ala mweewie kuma kwa ĩthe wenyu.”—Yoana 8:33, 37, 38.

Ũndũ ũla Yesũ woonanasya wĩ ũtheinĩ: Oonanasya kana Ĩthe wake e kĩvathũkany’o na ĩthe woo. Nĩkwĩthĩwa Ayuti mayaaelewa nĩ ndeto sya Yesũ, maendeeie kũmwĩa: “Ĩthe waitũ nĩ Avalaamu.” (Yoana 8:39; Isaia 41:8) Kwa w’o, mo maĩ nzyawa sya Avalaamu, na ũu watumaa masũanĩa kana me na mũĩkĩĩo ta Avalaamu ũla waĩ mũnyanyae wa Ngai.

Ĩndĩ Yesũ nĩwamatavisye ndeto sya kũmatelemya mũno. Ameie: “Ta kethĩwa mwĩ syana sya Avalaamu, mwĩthĩwa mũyĩka maũndũ ala Avalaamu weekaa.” Kwa w’o, mwana ekaa o ũndũ wonaa ĩthe ayĩka. Yesũ aendeeie kũmea: “Ĩndĩ yu mwĩenda kũmbũaa, nyie mũndũ ũla ũmũtavĩtye ũw’o ũla neewie kuma kwa Ngai. Avalaamu ndaaĩka ũu.” Na ĩndĩ Yesũ aweta ũndũ wamasaanĩsya. Ameie: “Inyw’ĩ mwĩĩka maũndũ ala ĩthe wenyu wĩkaa.”—Yoana 8:39-41.

O na ĩtina wa Yesũ kũtavya Ayuti maũndũ asu mayaaelewa aneenaa ĩũlũ waũ. Maasya kana kwa w’o ki mo nĩ ana ma Ngai. Maisye: “Ithyĩ tũyaasyawa kumana na ũlaalai; twĩ na Ĩthe o ũmwe, Ngai.” Ĩndĩ kwa w’o Ngai nĩwe Ĩthe woo? Yesũ ameie atĩĩ: “Ta kethĩwa Ngai nĩwe Ĩthe wenyu no mũmbende, nũndũ naumie kwa Ngai na nĩ vaa. Ndyaaũka kumana na ũtwi wakwa mwene, ĩndĩ Ũsu nĩwe wandũmie.” Yesũ nĩwakũlilye ĩkũlyo na ayĩsũngĩa we mwene. Akũlilye-ĩ: “Nĩkĩ mũte kũelewa kĩla ngũneena? Nũndũ mũitonya kwĩthukĩĩsya ndeto yakwa.”—Yoana 8:41-43.

Yesũ endaa kũmony’a kana malea kũmũĩkĩĩa meonany’a kana ĩthe woo nĩ Ndevili. Ĩndĩ yu ndeto ila wasyokie kũmatavya syoonanasya ũtheinĩ vyũ ĩthe woo nũũ. Ameie: “Inyw’ĩ mumĩte kwa ĩthe wenyu Ndevili na mwendaa kwĩka mawendi ma ĩthe wenyu.” Ĩthe woo ekaa maũndũ mailyĩ ata? Yesũ nĩwamaeleisye nesa ũndũ Ndevili ũilyĩ. Ameie: “Ũsu aĩ mũaani kuma mwambĩlĩlyonĩ na ndaaũngama alũmĩte nthĩnĩ wa ũla w’o.” Yesũ ongeleeile kũtavya Ayuti atĩĩ: “Ũla wumĩte kwa Ngai nĩwĩthukĩĩasya ndeto sya Ngai. Kĩu nĩkyo kĩtumi mũtekwĩthukĩĩsya, nũndũ mũyumĩte kwa Ngai.”—Yoana 8:44, 47.

Ayuti nĩmathatiw’e nĩ ndeto ila Yesũ wamatavisye na kwoou mamwĩa atĩĩ: “Yĩla tũkwasya, ‘We wĩ Mũsamalia na wĩ na ndaimoni,’ ithyĩ nĩtũvĩtĩtye?” Yĩla mamwĩtie Yesũ “Mũsamalia,” moonanasya ũndũ mamũvũthĩtye. Ĩndĩ Yesũ ndaatinda akwatĩĩe ndeto isu syoo sya kĩvũthya. Vandũ va ũu ameie: “Nyie ndi na ndaimoni, ĩndĩ nĩnĩmũtaĩaa Asa wakwa, na inyw’ĩ nĩmũmbũthasya.” Nĩ kana Yesũ amony’e ũndũ kũmũvũthya kwesaa kũtuma makwatwa nĩ mũisyo ũnenevete ameie: “Ethĩwa mũndũ o na wĩva nũkwataa ndeto yakwa, ndakona kĩkw’ũ nongi.” Yesũ ndoonanasya kana atũmwa na andũ angĩ ala makamũatĩĩa maikakw’a. Ĩndĩ oonanasya kana maikakwatwa nĩ “kĩkw’ũ kya kelĩ,” nakyo nĩ wanangĩko wa tene na tene.—Yoana 8:48-51; Ũvuan’yo 21:8.

Nũndũ Ayuti mayaeleawa nĩ kĩla Yesũ woonanasya yĩla waisye ve andũ matakona kĩkw’ũ nongi, mamwĩie: “Yu nĩtwamanya kana wĩ na ndaimoni. Avalaamu nĩwakwie na athani o namo nĩmakwie, ĩndĩ we wĩasya, ‘Ethĩwa mũndũ o na wĩva akakwata ndeto yakwa, ndakasama kĩkw’ũ nongi.’ We nue mũnene kwĩ ĩthe waitũ Avalaamu, ũla wakwie? . . . We wĩenda kwasya nue ũũ?”—Yoana 8:52, 53.

Vate nzika Yesũ endaa kũmaelesya kana nĩwe Masia. Ĩndĩ vandũ va kũmatavya ĩmwe kwa ĩmwe we nũũ, ameie: “Ethĩwa nĩngwĩkumya nyie mwene, nguma syakwa no sya mana. Asa wakwa nĩwe ũngumasya, o ũla mũkwasya nĩ Ngai wenyu. Inyw’ĩ mũimwĩsĩ, ĩndĩ nyie nĩnĩmwĩsĩ. Na ngasya ndimwĩsĩ, nĩthĩwa nĩ mũkengani o tenyu.”—Yoana 8:54, 55.

Yesũ nĩwamatavisye ũndũ ũngĩ wa vata ĩũlũ wa ũmae woo, Avalaamu ũla waĩ mũĩkĩĩku. Ameie: “Ĩthe wenyu Avalaamu nĩwatanĩie mũno wĩkwatyo wa kwona mũthenya wakwa, na nĩwawonie na atana.” Nũndũ Avalaamu nĩwaĩkĩĩe vyũ watho wa Ngai, nĩweeteele na mea kũka kwa Masia. Ayuti nĩmaseng’iw’e mũno nĩ ndeto isu sya Yesũ na mamũkũlya: “O na ndũvikĩtye ũkũũ wa myaka 50, na nĩwamwonie Avalaamu?” Nake Yesũ amea: “Nĩmũtavya w’o ki kana, mbee wa Avalaamu atanethĩwa, naĩ kw’o.” Yesũ awetaa ĩũlũ wa ĩvinda yĩla wekalaa ĩtunĩ e mũlaĩka wĩ vinya mũno.—Yoana 8:56-58.

Ayuti nĩmathatiw’e mũno nĩ ndeto isu sya Yesũ sya kana aĩ kw’o mbee wa Avalaamu, na kwoou moosa mavia mamũkimange. Ĩndĩ eevonokya na auma vau.