Yesũ e Yutia, nĩwathokiw’e nĩ Mũvalisi ũmwe nĩ kana maĩsanĩe. Veonekana Mũvalisi ũsu athoketye Yesũ maĩsanĩe lĩu wa mũthenya, ĩndĩ ti lĩu wa wĩoo. (Luka 11:37, 38; sianĩsya na Luka 14:12.) Matanambĩĩa kũya, Avalisi ala maĩ vo nĩmathambie moko nginya kĩngokoanĩ kwosana na kĩthĩo kyoo. Ĩndĩ Yesũ ndaaĩka tamo. (Mathayo 15:1, 2) Mũndũ athamba moko nginya kĩngokoanĩ ndeethĩawa aitũla Mĩao ya Ngai, ĩndĩ Ngai ndaĩtye andũ mathambae moko kwa nzĩa ĩsu.

Mũvalisi ũsu wathoketye Yesũ nĩwaseng’ie mũno oona Yesũ ate kũatĩĩa kĩthĩo kĩu. Yesũ nĩwamanyie ũndũ ũsu na asya atĩĩ: “Inyw’ĩ Avalisi mũthambasya kĩkombe na ĩsaani nza, ĩndĩ nthĩnĩ musĩe ĩtomo na ũthũku. Inyw’ĩ andũ atumanu! Ũla waseũvisye nza nowe waseũvisye nthĩnĩ, kana ti w’o?”—Luka 11:39, 40.

Thĩna mũnene wa Avalisi nĩ kana mo maĩ angangany’a. Avalisi asu na andũ angĩ maatĩĩaa kĩthĩo kya kũthamba moko, ĩndĩ nĩmaemetwe nĩ kũthesya ngoo syoo kumana na ũthũku. Kwoou Yesũ amataie amea atĩĩ: “Nenganai mĩthĩnzĩo kwondũ wa ngya kuma nthĩnĩ wenyu, na sisya! maũndũ onthe ĩũlũ wenyu makeethĩwa me matheu.” (Luka 11:41) Ndeto isu sya Yesũ nĩ sya w’o vyũ! Mũndũ aĩle kũtethya andũ angĩ nũndũ nũmendete kuma ngoonĩ, ĩndĩ ndaĩle kwĩka ũu aĩ nũndũ eenda kwĩyonany’a nĩ mũlũngalu.

Ndeto isu sya Yesũ iyoonanasya kana aũme asu mayanenganae syĩndũ. Nĩkyo kĩtumi Yesũ wameie atĩĩ: “Nĩmumasya kĩlungu kya ĩkũmi kya mindi na laũ na kya mĩtĩ ĩla ĩngĩ yonthe ya mũũndanĩ, ĩndĩ nĩmũvũthĩĩasya ũsili wa katĩ na wendo wa Ngai! Nĩ w’o nĩmwaaĩle kwĩka maũndũ asu, ĩndĩ mũteũvũthĩĩsya maũndũ ala angĩ.” (Luka 11:42) Mĩao ya Ngai yoonanĩtye kana nĩmaĩle kumya kĩlungu kya ĩkũmi kya ũsyao wa mũũndanĩ. (Kũtũngĩlĩlwa Kwa Mĩao 14:22) Syĩndũ imwe maumasya nĩ ta mindi na laũ, na ĩsu yaĩ mĩtĩ yatũmĩawa kwongela lĩu mũsamo. Avalisi nĩmeekaa kyonthe kĩla matonya nĩ kana manengane kĩlungu kya ĩkũmi kya mĩtĩ ĩsu, ĩndĩ nata ĩũlũ wa maũndũ ala maĩ ma vata Mĩaonĩ, ta kũatĩĩa ũsili wa katĩ na kũendanasya na Ngai?—Mika 6:8.

Yesũ aendeeie kwasya: “Kyeva nĩ kwenyu Avalisi nũndũ mwendete ivĩla sya mbee masinakokenĩ na kũkethaw’a masokonĩ! Kyeva nĩ kwenyu nũndũ mũilye mbũa ila itonekaa nesa, ila andũ mesĩlaa ĩũlũ wasyo mate kũmanya!” (Luka 11:43, 44) Mũndũ aĩ atonya kũtulw’a esĩla ĩũlũ wa mbũa isu syeethĩawa itenekee na kwoou ayĩthĩwa ate mũtheu kwosana na Mĩao. Yesũ nĩwatũmĩie ngelekany’o ĩsu kwonany’a kana ũvuku wa Avalisi ndweethĩawa wenekee.—Mathayo 23:27.

Mũndũ ũmwe weesĩ Mĩao ya Ngai nesa aisye atĩĩ: “Mũmanyĩsya yĩla waweta maũndũ asu o naitũ nĩwatũuma.” Andũ asu maaĩle kũmanya kana mayatethasya andũ kĩ-veva. Yesũ ameie: “Kyeva nĩ kwenyu inyw’ĩ ala mwĩsĩ Mĩao nesa, nũndũ mũmaĩkasya andũ mĩio yĩ vinya kũkuĩka, ĩndĩ inyw’ĩ o na mũimĩkiitaa na kyaa! Kyeva nĩ kwenyu, nũndũ mwakaa mbũa sya athani ĩndĩ aa-ũmae menyu nĩmo mamoaie!”—Luka 11:45-47.

Mĩio mĩito ĩla Yesũ waneeneaa yaĩ syĩthĩo ila andũ meeseũvĩsye na ũndũ Avalisi maalyũlaa Mĩao yosane na kwenda kwoo. Nũndũ wa kwongeleela maũndũ maingĩ Mĩaonĩ  na kũlasimĩthya andũ maatĩĩe maũndũ asu, aũme asu nĩmatumĩte andũ mew’a me aitavĩe na matatanĩa kũmũthaitha Ngai. Aa-ũmae moo nĩmo mooaie athani ma Ngai, kuma Aveli. O namo Avalisi, ala moonekaa ta manengete athani ndaĩa kwa kũmakĩa mbũa, meethĩawa na mawoni na meko mailyĩ o ta ma aa-ũmae moo. O na nĩmendaa kũmũaa Mwathani ũla mũnene vyũ wa Ngai. Yesũ aisye kana Ngai ndalea kũsilĩla andũ asu. Ũndũ ũsu weanĩie ĩtina wa myaka ta 38, mwakanĩ wa 70.

Yesũ aendeeie kwasya: “Kyeva nĩ kwenyu inyw’ĩ ala mwĩsĩ Mĩao nesa, nũndũ nĩmwosete ũvungũo wa ũĩ. Inyw’ĩ ene mũyĩũlika, na nĩmũũsiĩĩa ala mekwenda kũlika!” (Luka 11:52) Vandũ va aũme asu kũmanyĩsya andũ Ndeto ya Ngai, meekaa kũmasiĩĩa maikamĩmanye na maikamĩelewe.

Aandĩki na Avalisi meekie ata ĩtina wa kwĩw’a ndeto isu sya Yesũ? Yĩla Yesũ waumaalile vau, nĩmambĩĩie kũmũvĩnga mathatĩte na kũmũkũlya makũlyo maingĩ. Mayakũlasya Yesũ makũlyo asu nĩkwĩthĩwa nĩmendaa kwĩmanyĩsya. Ĩndĩ vandũ va ũu, mendaa kũmũtea Yesũ nĩ kana makwate kaũndũ katonya kũtuma akwatwa na ayovwa.