Ũvuany’o 11:1-19
11 Na nanengwa mũangi ũilye ta ndata,* na neewa: “Ũkĩla na ũithima vala vandũ vatheu va ĩkalũ ya Ngai na kĩthembeo na ala meũthaithĩa vo.
2 Ĩndĩ ndũkathime nza wa vala vandũ vatheu va ĩkalũ, ekana nayo, nũndũ nza ĩsu nĩnengetwe andũ ma mbaĩ ingĩ, na makakinyanga ĩla ndũa ntheu myei 42.
3 Ngatuma ngũsĩ syakwa ilĩ syathana mĩthenya 1,260, syĩkĩĩte ngũa sya makunia.”
4 Ngũsĩ isu ivw’ananĩtw’e na mĩtĩ ĩlĩ ya mĩthata na syĩndũ ilĩ sya kwilĩĩla taa, na iũngamĩte mbee wa Mwĩaĩi wa nthĩ.
5 Ethĩwa mũndũ o na wĩva nũkwenda kũiũmĩsya, mwaki nĩwumaa kanyw’anĩ wasyo na ũivĩvya amaitha masyo. Ethĩwa mũndũ o na wĩva akenda kũiũmĩsya, no nginya oawe ũu.
6 Ngũsĩ isu syĩ na ũkũmũ wa kũvinga yayaya nĩ kana mbua ndĩkaue mĩthenyanĩ ĩla iendeee kwathana, na syĩ na ũkũmũ ĩũlũ wa kĩw’ũ, wa kũkĩtw’ĩkĩthya nthakame, na ũkũmũ wa kũkũna nthĩ na kĩla mũthemba wa ũthĩny’o mavinda maingĩ ũndũ ikwenda.
7 Na syamina kumya ũkũsĩ wasyo, nyamũ ya kĩthekanĩ ĩla yambatie kuma ĩimanĩ yĩte kĩtulu* ĩkokita nasyo na ĩkaisinda na ĩkasyũaa.
8 Na simba syasyo ikeethĩwa nzĩanĩ nene ya ndũa nene, ĩla kwa nzĩa ya ngelekany’o yĩtawa Sotomo na Misili, vala Mwĩaĩi wasyo wooaĩwe mũtĩnĩ.
9 Na andũ me kĩvathũkany’o, na ngo, na ithyomo, na mbaĩ makasisya simba syasyo mĩthenya ĩtatũ na nusu, na maiketĩkĩlya mĩĩ yasyo ĩthikwe mbũanĩ.
10 Na ala matwĩe ĩũlũ wa nthĩ makatana na kwĩw’a mũyo nũndũ wa kĩkw’ũ kyasyo, na makanengane mĩthĩnzĩo ene kwa ene, nĩkwĩthĩwa ngũsĩ isu ilĩ nĩsyathĩnasya ala matwĩe ĩũlũ wa nthĩ.
11 Ĩtina wa ĩla mĩthenya ĩtatũ na nusu, mĩthũmũ ya thayũ kuma kwa Ngai yalika nthĩnĩ wasyo, na syaũngama na maaũ masyo, na ala masyonie makwatwa nĩ wia mwingĩ.
12 Na syeew’a wasya mũnene kuma ĩtunĩ ũisyĩa: “Ambatai kũũ.” Na syambata ĩtunĩ syĩ ĩthweonĩ, na amaitha masyo masyona.*
13 Na saanĩ ũsu kweethĩwa kĩthingitho kĩnene, na kĩlungu kya ĩkũmi kya ndũa kyavalũka; na andũ 7,000 mooawa nĩ kĩthingitho kĩu, na andũ ala angĩ matelema na mamũkumya Ngai wa ĩtunĩ.
14 Kyeva kya kelĩ nĩ kĩvĩtu. Sisya! Kyeva kya katatũ nĩkyũkĩte mĩtũkĩ.
15 Na mũlaĩka wa mũonza avuva soo wake. Na kwaĩ mawasya manene ĩtunĩ, makyasya: “Ũsumbĩ wa nthĩ nũtw’ĩkĩte Ũsumbĩ wa Mwĩaĩi waitũ na wa Klĩsto wake, nake akasumbĩka e mũsumbĩ tene na tene.”
16 Na ala atumĩa 24 mekalĩte ivĩlanĩ sya ũsumbĩ mbee wa Ngai, mavalũka nthĩ na mothyũ moo na mamũthaitha Ngai,
17 makyasya: “Nĩtũũkũtũngĩa mũvea Yeova Ngai, Mwene Vinya W’onthe, ũla wĩ kw’o na waĩ kw’o, nũndũ nĩwosete vinya waku mwingĩ na ũkambĩĩa kũsumbĩka wĩ mũsumbĩ.
18 Ĩndĩ mbaĩ syathilĩka, na ũthilĩku waku wooka, na ĩvinda yĩla yĩnyuvĩtwe yavika ya kũsilĩla ala akw’ũ na kũinenga ĩtuvi ngombo syaku athani na atheu na ala makĩaa ĩsyĩtwa yaku, anini na anene, na kũmananga ala manangaa nthĩ.”
19 Na vala vandũ vatheu va ĩkalũ ya Ngai vavingũka ĩtunĩ, na ĩsandũkũ ya ũtianĩo wake yooneka yĩ vala vandũ vatheu va ĩkalũ yake. Na kwaĩ ũtisi na mawasya na itundumo na ithingitho sya nthĩ na mbua nene ya mavia.
Maelesyo ma kwongeleela
^ Kana “mũtĩ wa kũthima.”
^ Kana “aviso.” Sisya Maelesyo ma Ndeto.
^ Kana “nĩmasyaĩtye.”
