Ũvuany’o 13:1-18
13 Na ũla mũkũnga waũngama kĩthangathĩnĩ kya ũkanga.
Na noona nyamũ ya kĩthekanĩ yambatĩte kuma ũkanganĩ, yĩ na mbya ĩkũmi na mĩtwe mũonza, na mbyanĩ syayo yaĩ na ngovia ĩkũmi sya ũsumbĩ, ĩndĩ mĩtwenĩ yayo vaĩ masyĩtwa ma kũumana.
2 Nyamũ ya kĩthekanĩ ĩla noonie yailye kĩkoyo,* ĩndĩ maaũ mayo mailye ma nduva, na kanyw’a wayo wailye wa mũnyambũ. Na ũla mũkũnga wanenga nyamũ ĩsu ya kĩthekanĩ vinya na kĩvĩla kya ũsumbĩ na ũkũmũ mũnene.
3 Na noona mũtwe wayo ũmwe ũilye ta ũnaĩ na ũũmĩsye wa kũmyũaa, ĩndĩ kĩtau kĩu kyayo kĩla kyaĩ vakuvĩ kũmyũaa kyaĩ kĩnavoa, na andũ onthe ma nthĩ maatĩĩa nyamũ ĩsu ya kĩthekanĩ maseng’ete.
4 Na mathaitha mũkũnga ũsu nũndũ nĩwamĩnengie ĩla nyamũ ya kĩthekanĩ ũkũmũ, na mathaitha nyamũ ĩsu ya kĩthekanĩ, makyasya: “Nũũ ũla ũilye ta nyamũ ĩno ya kĩthekanĩ, na nũũ ũla ũtonya kũkita nayo?”
5 Na yanengwa kanyw’a waneenaa maũndũ manene na kũumana, na yanengwa ũkũmũ wa kwĩka ũndũ ĩkwenda kwa myei 42.
6 Na yaathamya kanyw’a wayo kwelekela Ngai nĩ kana ĩumange ĩsyĩtwa yake na wĩkalo wake, ĩĩ, ala mekalaa ĩtunĩ.
7 Nyamũ ĩsu nĩyeetĩkĩlilw’e kũkita na ala atheu na kũmasinda, na yanengwa ũkũmũ ĩũlũ wa ngo syonthe na andũ na ithyomo na mbaĩ.
8 Na onthe ala matwĩe ĩũlũ wa nthĩ makamĩthaitha. Na kuma mwambĩlĩlyo wa nthĩ, vaiĩ ĩsyĩtwa ya o na ũmwe woo yĩandĩkĩtwe ĩvukunĩ ya kũkũnzwa ya thayũ ya kala Kalondu kooaiwe.
9 Ũla wĩ kũtũ nĩew’e.
10 Ethĩwa mũndũ o na wĩva nĩ wa kũtavwa, ũsu akatavwa. Na ethĩwa mũndũ o na wĩva akooaa na ũvyũ,* no nginya oawe na ũvyũ. Vaa nĩvo atheu mendekaa kwĩthĩwa na wũmĩĩsyo na mũĩkĩĩo.
11 Na noona nyamũ ĩngĩ ya kĩthekanĩ yambatĩte kuma nthĩ, na yaĩ na mbya ilĩ iilye sya kalondu, ĩndĩ yambĩĩa kũneena ta mũkũnga.
12 Na nĩtũmĩaa ũkũmũ wa ĩla nyamũ ya kĩthekanĩ ya mbee, nyamũ ĩsu yene. Na nĩtumaa nthĩ na ekali mayo mathaitha ĩla nyamũ ya mbee ya kĩthekanĩ, ĩla yaĩ na kĩtau kyaĩ vakuvĩ kũmyũaa na kyavoa.
13 Na nĩyĩkaa syama nene mbee wa andũ, o na nĩtumaa mwaki ũtheea nthĩ kuma ĩtunĩ.
14 Nĩkengaa ala matwĩe ĩũlũ wa nthĩ nũndũ wa syama ila yeetĩkĩlilw’e kwĩka, ĩla nyamũ ya kĩthekanĩ yene, na nĩtavasya andũ ala matwĩe ĩũlũ wa nthĩ maseũvye mũvw’anano wa ĩla nyamũ ya kĩthekanĩ, ĩla yatemetwe na ũvyũ ĩndĩ ĩkavoa.
15 Na nĩyeetĩkĩlilw’e kũũnenga mĩthũmũ ya thayũ ũla mũvw’anano wa nyamũ ya kĩthekanĩ, nĩ kana mũvw’anano ũsu wa nyamũ ya kĩthekanĩ wĩthĩwe ũtonya kũneena na kũtuma andũ onthe ala meũlea kũthaitha mũvw’anano wayo moawa.
16 Na nĩlasimĩthasya andũ onthe, anini na anene, athwii na ngya, ngombo na ala athasye, mekĩwe ũvano kw’okonĩ kwoo kwa aũme na itulyanĩ syoo,
17 nĩ kana mũndũ o na wĩva ndakethĩwe atonya kũthooa kana kũthoosya ate o ũla wĩ na ũvano ũsu, naw’o nĩ ĩsyĩtwa ya nyamũ ĩsu ya kĩthekanĩ kana namba ya ĩsyĩtwa yayo.
18 Vaa nĩ vo vekwendeka ũĩ: Eka ũla wĩ na ũmanyi eke ĩsavu ya namba ya ĩla nyamũ ya kĩthekanĩ, nũndũ nĩ namba ya mũndũ, na namba yayo nĩ 666.
Maelesyo ma kwongeleela
^ Kana “ngo.”
^ Kana nĩvatonyeka, “Na ethĩwa mũndũ o na wĩva nĩ wa kũawa na ũvyũ.”
