Ũvuany’o 16:1-21
16 Na neew’a wasya mũnene kuma vala vandũ vatheu ũitavya ala alaĩka mũonza atĩĩ: “Endai mũtulũle ĩũlũ wa nthĩ ila mbakũli mũonza sya ũthatu wa Ngai.”
2 Na wa mbee athi na atulũla mbakũli yake ĩũlũ wa nthĩ. Na andũ ala maĩ na ũvano wa ĩla nyamũ ya kĩthekanĩ, na ala mathaithaa mũvw’anano wayo, makwatwa nĩ kĩtau kĩthũku na kĩ woo.
3 Na wa kelĩ atulũla mbakũli yake ũkanganĩ. Naw’o weethĩwa ta nthakame ya mũndũ mũkw’ũ, na syũmbe syonthe ila syaĩ thayũ syakw’a, ĩĩ, syĩndũ ila syaĩ ũkanganĩ.
4 Na wa katatũ atulũla mbakũli yake mbũsĩnĩ na nthongonĩ* sya kĩw’ũ. Na syatw’ĩka nthakame.
5 Na neew’a mũlaĩka ũla wĩ na ũkũmũ ĩũlũ wa kĩw’ũ, akyasya: “We, Ũla wĩ kw’o na waĩ kw’o, we Ũla mũĩkĩĩku, wĩ mũlũngalu, nĩkwĩthĩwa nĩwumĩtye mosilĩlo asu,
6 nũndũ nĩmetĩkisye nthakame ya atheu na ya athani, na nũmanengete nthakame manyw’e; na ũu nĩw’o ũmaĩlĩte.”
7 Na neew’a wasya kuma kĩthembeonĩ ũyasya: “Ĩĩ, Yeova Ngai, Mwene Vinya W’onthe, mosilĩlo maku nĩ ma w’o na nĩ malũngalu.”
8 Na wa kana atulũla mbakũli yake ĩũlũ wa syũa, na syũa yanengwa ũkũmũ wa kũvĩvya andũ na mwaki.
9 Na andũ mavĩvw’a nĩ ũvyũvu mwingĩ, na mayĩuma ĩsyĩtwa ya Ngai, ũla wĩ na ũkũmũ ĩũlũ wa mothĩny’o asu, na mayaaĩlila na kũmũkumya.
10 Na wa katano atulũla mbakũli yake kĩvĩlanĩ kya ũsumbĩ kya ĩla nyamũ ya kĩthekanĩ. Na ũsumbĩ wayo wamesya kĩvindu, na mambĩĩa kũũmanga nĩmĩ syoo nũndũ wa woo,
11 na mamũuma Ngai wa ĩtunĩ nũndũ wa woo na itau syoo, na mayaaĩlila kumana na meko moo.
12 Na wa thanthatũ atulũla mbakũli yake ũsĩnĩ mũnene wa Euvalati, na kĩw’ũ kyaw’o kyang’ala nĩ kana nzĩa ĩseũvw’e kwondũ wa asumbĩ kuma ngalĩko ya wumĩlonĩ wa syũa.
13 Na noona moneeni atatũ mavuku na maveveee, ala moonekaa mailye ta syoa, mayuma kanyw’anĩ wa ũla mũkũnga na kanyw’anĩ wa ĩla nyamũ ya kĩthekanĩ na kanyw’anĩ wa ũla mwathani wa ũvũngũ.
14 Vate nzika asu nĩ moneeni maveveewe nĩ ndaimoni na nĩmekaa syama, na nĩmaendaa kwa asumbĩ ma nthĩ yonthe, kũmombany’a vamwe kwondũ wa kaũ wa ũla mũthenya mũnene wa Ngai Mwene Vinya W’onthe.
15 “Sisya! Nũkĩte ta kĩng’ei. Nĩ mũtanu mũndũ ũla wĩkalaa e metho na ũsũvĩaa ngũa syake sya ĩũlũ, nĩ kana ndakese kũthi e mũthei na andũ maimwona na ayĩw’a nthoni.”
16 Na mamombany’a vamwe vandũ vetawa kwa Kĩevelania Alimaketoni.*
17 Na wa mũonza atulũla mbakũli yake nzevenĩ. Na ĩtina wa ũu wasya mũnene wauma vala vandũ vatheu, kuma kĩvĩlanĩ kya ũsumbĩ, ũkyasya: “Ũu nĩwathela!”
18 Na kweethĩwa ũtisi na mawasya na itundumo, na kwaĩ kĩthingitho kĩnene kya nthĩ kĩtaaĩthĩwa kuma andũ moombwa, kĩthingitho kĩu kyaĩ kĩnene na kyaĩ vinya mũno.
19 Na ĩla ndũa nene yaatũkana ilungu itatũ, na ndũa sya andũ ma mbaĩ ingĩ syavalũka; na Mbaviloni Ĩla Nene yalilikanwa mbee wa Ngai, nĩ kana ĩnengwe kĩkombe kya mbinyu ya ũthatu wa ũthilĩku wake.
20 Na ithama syonthe syakĩa, na iĩma iyaaoneka.
21 Na mbua nene ya mavia, kĩla yĩmwe yĩ na ũito ta wa talendi ĩmwe* yamatheeea andũ kuma ĩtunĩ, na andũ mamũuma Ngai nũndũ wa ũthĩny’o wa mbua ĩsu ya mavia, nĩkwĩthĩwa ũthĩny’o ũsu waĩ mũnene mũno.
Maelesyo ma kwongeleela
^ Kana “mbulutinĩ.”
^ Kĩkiliki, Har Ma·ge·donʹ, kumana na ndeto ya Kĩevelania ĩla ũalyũlo wayo nĩ, “Kĩĩma kya Mekito.”
^ Talendi ĩmwe ya Akiliki yaĩ kĩlo 20.4.
