Ũvuany’o 17:1-18
17 Na mũlaĩka ũmwe katĩ wa alaĩka mũonza ala maĩ na mbakũli mũonza ambĩa: “Ũka na nĩngũkwony’a ũsilĩlo wa yĩla ĩlwaya ĩnene yĩkalĩte ĩũlũ wa kĩw’ũ kingĩ,
2 yĩla asumbĩ ma nthĩ meekie ũlaalai* nayo, na ala matwĩe ĩũlũ wa nthĩ mamilwa nĩ mbinyu ya ũlaalai* wayo.”
3 Nake angua kwĩsĩla vinya wa veva andwaa weũnĩ. Na noona mũndũ mũka ekalĩle nyamũ ya kĩthekanĩ ndune mũno ĩla yausũĩte masyĩtwa ma kũumana, na yaĩ na mĩtwe mũonza na mbya ĩkũmi.
4 Mũndũ mũka ũsu eekĩĩte ngũa ya langi wa nzambalaũ na ngũa ndune mũno, na eeyanakavĩtye na thaavu na mavia ma thooa mũnene na lũlũ, na kw’okonĩ kwake aĩ na kĩkombe kya thaavu kyausũĩte maũndũ ma kũthatya na syĩndũ mbuku sya ũlaalai* wake.
5 Na kĩtulyanĩ kyake vaandĩkĩtwe ĩsyĩtwa ya kĩmbithĩ: “Mbaviloni Ĩla Nene, inyia wa malwaya na wa maũndũ ma kũthatya ma nthĩ.”
6 Na noona kana mũndũ mũka ũsu nĩwamilĩtwe nĩ nthakame ya atheu na nthakame ya ngũsĩ sya Yesũ.
Yĩla namwonie nĩnaseng’ie mũno.
7 Kwoou mũlaĩka ũsu ambĩa: “Nĩkĩ waseng’a? Nĩngũũtavya kĩmbithĩ kya mũndũ mũka ũsu na kya nyamũ ya kĩthekanĩ ĩla ĩmũkuĩte na yĩ na mĩtwe mũonza na mbya ĩkũmi:
8 Nyamũ ya kĩthekanĩ ĩla wonie, yaĩ vo, ĩndĩ yu ndĩ vo, na yĩ vakuvĩ kwambata kuma yĩla ĩimanĩ yĩte kĩtulu,* na ĩkaanangwa. Na ala matwĩe ĩũlũ wa nthĩ, ala masyĩtwa moo mataandĩkwa ĩvukunĩ ya kũkũnzwa ya thayũ kuma mwambĩlĩlyonĩ wa nthĩ, makaseng’a nũndũ wa ĩla nyamũ ya kĩthekanĩ, nĩkwĩthĩwa yaĩ vo, yu ndĩ vo, na ĩkeethĩwa vo ĩngĩ.
9 “Vaa nĩ vo vekwendeka kĩlĩko na ũĩ: Ĩla mĩtwe mũonza nĩ iĩma mũonza, ila ũla mũndũ mũka wĩkalĩle.
10 Na ve asumbĩ mũonza: Atano nĩ avalũku, ũmwe yu e vo, na ũla ũngĩ ndanamba kũvika; ĩndĩ yĩla wĩvika, akekala ĩvinda ĩkuvĩ.
11 Na nyamũ ya kĩthekanĩ ĩla yaĩ vo, ĩndĩ yu ndĩ vo, nyamũ ĩsu nĩ mũsumbĩ wa nyanya, ĩndĩ yumanĩte na ala asumbĩ mũonza, na ĩkaanangwa.
12 “Mbya ĩkũmi ila wonie nĩ asumbĩ ĩkũmi ala matanamba kũkwata ũsumbĩ, ĩndĩ makakwata ũkũmũ wa kwĩthĩwa me asumbĩ vamwe na nyamũ ya kĩthekanĩ vandũ va ĩsaa yĩmwe.
13 Asu me na kĩsũanĩo kĩmwe, na kwoou makanenga ĩla nyamũ ya kĩthekanĩ vinya na ũkũmũ woo.
14 Na makokita na kala Kalondu, ĩndĩ nũndũ we nĩ Mwĩaĩi wa eaĩi na Mũsumbĩ wa asumbĩ, akamasinda. O na ala me nake, ala metĩtwe, na anyuve, na aĩkĩĩku, makeeka oou.”
15 Na ambĩa: “Kĩw’ũ kingĩ kĩla wonie vala yĩla ĩlwaya yĩkalĩte, nĩ andũ na nguthu sya andũ na mbaĩ na ithyomo.
16 Na mbya ĩkũmi ila wonie vamwe na ĩla nyamũ ya kĩthekanĩ, ikamena yĩla ĩlwaya na kũyĩvena syĩndũ syayo syonthe na kũyĩtia yĩ ĩthei, na ikaya nyama syayo na kũyĩvĩvya vyũ na mwaki.
17 Nĩkwĩthĩwa Ngai nĩwĩkĩĩte ngoonĩ syoo mũvango wa kwĩka kĩla ũsũanĩĩte, ĩĩ, syĩke kwosana na kĩsũanĩo kyoo kĩmwe kwa kũnenga ĩla nyamũ ya kĩthekanĩ ũsumbĩ wasyo, nginya ndeto sya Ngai ianĩe.
18 Na mũndũ mũka ũla wonie nĩ ndũa nene ĩla ĩsumbĩkĩte asumbĩ ma nthĩ.”
Maelesyo ma kwongeleela
^ Sisya Maelesyo ma Ndeto.
^ Kĩkiliki, por·neiʹa. Sisya Maelesyo ma Ndeto.
^ Kĩkiliki, por·neiʹa. Sisya Maelesyo ma Ndeto.
^ Kana “aviso.” Sisya Maelesyo ma Ndeto.
