Ũvuany’o 19:1-21
19 Ĩtina wa maũndũ asu neew’a wasya ũla weew’ĩkaa ta wasya mũtũlu wa andũ aingĩ me ĩtunĩ. Na masya: “Aleluya!* Ũtangĩĩo na ndaĩa na vinya nĩ sya Ngai waitũ,
2 nũndũ mosilĩlo make nĩ ma w’o na ma ũlũngalu. Nĩkwĩthĩwa nũsilĩle yĩla ĩlwaya ĩnene, yĩla yaanangie nthĩ na ũlaalai* wayo, na nũĩvanĩisye nthakame ya ngombo syake ĩla yĩ mokonĩ mayo.”
3 Na vau kwa vau maneena ĩngĩ ya kelĩ, masya: “Aleluya!* Na syũki yayo yambataa tene na tene.”
4 Na ala atumĩa 24 vamwe na ila syũmbe inya syĩ thayũ mavalũka nthĩ na mamũthaitha Ngai, ũla wĩkalĩte kĩvĩlanĩ kya ũsumbĩ, na masya: “Ameni! Aleluya!”*
5 O na ĩngĩ, wasya wauma kĩvĩlanĩ kya ũsumbĩ, na wasya: “Mũtaĩei Ngai, inyw’ĩ ngombo syake syonthe, ala mũmũkĩaa, anini na anene.”
6 Na neew’a wasya ũla weew’ĩkaa ta wasya mũtũlu wa andũ aingĩ na ta wasya wa kĩw’ũ kingĩ na ta wasya wa itundumo nene. Na masya: “Aleluya,* nũndũ Yeova Ngai waitũ, Mwene Vinya W’onthe, nĩwambĩĩie kũsumbĩka e mũsumbĩ!
7 Ekai tũtane na tũyĩthĩwa na mũyo na tũimũkumya, nĩkwĩthĩwa mũtwaano wa kala Kalondu nĩ mũviku na mũka wake nĩwĩyũmbanĩtye.
8 Ĩĩ, nũnengetwe mwanya wa kwĩkĩwa ngũa ya katane ĩkũtisatisa, ntheu na nzeo; ngũa ĩsu ya katane nzeo yĩonany’a meko ma ũlũngalu ma ala atheu.”
9 Na ambĩa, “Andĩka: Nĩ atanu ala mathoketw’e lĩunĩ wa wĩoo wa mũtwaano wa kala Kalondu.” O na ĩngĩ ambĩa: “Isu nĩ ndeto sya w’o sya Ngai.”
10 Yĩla neewie ũu, navalũka maaũnĩ make nĩmũthaithe. Ĩndĩ ambĩa: “Ĩsũvĩe! Ndũkeke ũu! Nyie nĩ ngombo o taku na ana-a-asa maku ala me na wĩa wa kumya ũkũsĩ ĩũlũ wa Yesũ. Mũthaithe Ngai! Nũndũ ũkũsĩ ĩũlũ wa Yesũ nĩw’o kĩeleelo kya wathani.”
11 Na noona ĩtu yĩ ĩvingũku, na sisya! vaĩ mbalasi nzaũ. Na ũla wekalĩte ĩũlũ wayo etawa Mũĩkĩĩku na W’o, na nũsilaa na kũkita kwa ũlũngalu.
12 Metho make mailye ũmũĩ wa mwaki na mũtwenĩ wake aĩ na ngovia mbingĩ sya ũsumbĩ. Aĩ na ĩsyĩtwa yĩandĩkĩtwe na vaiĩ mũndũ wayĩsĩ eka we mwene,
13 na eekĩĩte ngũa ya ĩũlũ ĩtalĩkangĩlwe nĩ nthakame, na etawa Ndeto ya Ngai.
14 O na ĩngĩ, ita sya ĩtunĩ nĩsyamũatĩĩe syĩ mbalasinĩ nzaũ na syeekĩĩte ngũa nzaũ sya katane, ntheu na nzeo.
15 Kanyw’anĩ wake vaumĩlĩte ũvyũ mũĩ mũasa wa kũtema mbaĩ, na akasiĩthya na ndata ya kyũma. O na ĩngĩ, nũkinyangaa kĩangĩo kya mbinyu kya ũthatu wa ũthilĩku wa Ngai Mwene Vinya W’onthe.
16 Ngũanĩ yake ya ĩũlũ, ĩĩ, nthũnũnĩ yake, vaandĩkĩtwe ĩsyĩtwa, Mũsumbĩ wa asumbĩ na Mwĩaĩi wa eaĩi.
17 Na noona mũlaĩka aũngamĩte syũanĩ, na aneena na wasya mũnene atavya nyũnyi ila iũlũkaa ĩtunĩ katĩ: “Ũkai vaa, ũmbanai vamwe lĩunĩ mũnene wa wĩoo wa Ngai,
18 nĩ kana mũye nyama sya asumbĩ na nyama sya anene ma ita na nyama sya aũme me vinya na nyama sya mbalasi na sya ala mekalĩte ĩũlũ wasyo, na nyama sya onthe, nyama sya ala athasye na ngombo na sya ala anini na anene.”
19 Na noona ĩla nyamũ ya kĩthekanĩ na asumbĩ ma nthĩ na ita syoo mombanĩte vamwe nĩ kana mokite na ũla wĩkalĩte ĩũlũ wa ĩla mbalasi na ita syake.
20 Na ĩla nyamũ ya kĩthekanĩ yakwatwa vamwe na ũla mwathani wa ũvũngũ, ũla weekie syama mbee wayo na aasya andũ ala mekĩĩtwe ũvano wa ĩla nyamũ ya kĩthekanĩ na ala mathaithaa mũvw’anano wayo. Na me o thayũ mekw’a ĩianĩ ya mwaki yĩla yakanaa na mũvĩlĩtĩ.
21 Ĩndĩ ala angĩ mooawa na ũla ũvyũ mũasa ũla waumĩlĩte kanyw’anĩ wa ũla wekalĩte ĩũlũ wa ĩla mbalasi. Na nyũnyi syonthe syaya nyama syoo syavũna.
Maelesyo ma kwongeleela
^ Ũalyũlo wa ndeto ĩno ya Kĩevelania nĩ, “Mũtaĩe Yeova!”
^ Kĩkiliki, por·neiʹa. Sisya Maelesyo ma Ndeto.
^ Ũalyũlo wa ndeto ĩno ya Kĩevelania nĩ, “Mũtaĩe Yeova!”
^ Ũalyũlo wa ndeto ĩno ya Kĩevelania nĩ, “Mũtaĩe Yeova!”
^ Ũalyũlo wa ndeto ĩno ya Kĩevelania nĩ, “Mũtaĩe Yeova!”
