Ũvuany’o 2:1-29
2 “Kwa mũlaĩka wa kĩkundi kya Eveso andĩka atĩĩ: Aa nĩmo maũndũ ala meũwetwa nĩ ũla ũkwete ila ndata mũonza kw’okonĩ kwake kwa aũme, na ũendelaa katĩkatĩ wa ila syĩndũ mũonza sya thaavu sya kwilĩĩla taa:
2 ‘Nĩnĩsĩ meko maku, na wĩa waku mũmũ na wũmĩĩsyo, na kana ndũtonya kũmĩĩsya andũ athũku, na nũmatataa ala maasya nĩ atũmwa ĩndĩ mo ti atũmwa, na nĩwĩthĩĩte kana mo nĩ akengani.
3 O na ĩngĩ, nũendeee na kũmĩĩsya na kwĩlũlũmĩĩlya kwondũ wa ĩsyĩtwa yakwa na ndwaanoa.
4 Ĩndĩ nĩ na ũndũ ũũ ĩũlũ waku: nũtiĩte wendo ũla waĩ naw’o mbeenĩ.
5 “‘Kwondũ wa ũu lilikana ũvalũkĩte kuma va, na ũyĩlila na ũyĩka maũndũ ala weekaa mbeenĩ. Ethĩwa ndũkwĩka ũu, ngooka kwaku, na ngaveta kĩndũ kyaku kya kwilĩĩla taa kuma vandũ vakyo, walea kwĩlila.
6 Ĩndĩ ve ũndũ ũũ mũseo ũendeee na kwĩka: nũmenete meko ma kĩkundi kya ndĩni ya Nikolai, ala o nakwa nĩmamenete.
7 Ũla wĩ kũtũ nĩew’e ũndũ ũũ veva ũũtavya ikundi: Ũla wĩsinda ngamwĩtĩkĩlya kũya ũsyao wa mũtĩ wa thayũ, ũla wĩ mũũndanĩ wa Ngai.’*
8 “Na kwa mũlaĩka wa kĩkundi kya Simulina andĩka atĩĩ: Aa nĩmo maũndũ ala meũwetwa nĩ ‘ũla wa Mbee na ũla wa Mũthya,’ ũla wakwie na eethĩwa thayũ ĩngĩ:
9 ‘Nĩnĩsĩ thĩna waku na ũkya waku, ĩndĩ we wĩ mũthwii, na nĩnĩsĩ kũumana kwa ala meyĩtaa Ayuti ĩndĩ mo ti Ayuti, ĩndĩ mo nĩ ĩsinakoke ya Satani.
10 Ndũkakĩe maũndũ ala me vakuvĩ kũũkwata. Sisya! Ndevili nũkũendeea kwĩkya amwe menyu yela nĩ kana matatwe vyũ, na mũkeethĩwa na thĩna mĩthenya ĩkũmi. Endeea kwonany’a kana wĩ mũĩkĩĩku o na kũvika kĩkw’ũ, nakwa ngaũnenga ngovia ya thayũ.
11 Ũla wĩ kũtũ nĩew’e ũndũ ũũ veva ũũtavya ikundi: Ũla wĩsinda ndakakw’a kĩkw’ũ kya kelĩ nongi.’
12 “Na kwa mũlaĩka wa kĩkundi kya Velikamo andĩka atĩĩ: Aa nĩmo maũndũ ala meũwetwa nĩ ũla wĩ na ũvyũ mũĩ, mũasa, na ũtemaa na ngalĩ syelĩ:
13 ‘Nĩnĩsĩ vala wĩkalaa, navo nĩ vala ve kĩvĩla kya ũsumbĩ kya Satani; o na vailye ũu, nũendeee kũlũmya vyũ ĩsyĩtwa yakwa, na ndwaakaĩa mũĩkĩĩo waku nthĩnĩ wakwa o na mĩthenyanĩ ya Andiva, ngũsĩ yakwa ndĩkĩĩku, ũla wooaĩwe kwenyu, vala Satani ũtwĩe.
14 “‘Ĩndĩ nĩ na maũndũ aa manini ĩũlũ waku: vau ũĩ wĩ na ala maatĩĩaa momanyĩsyo ma Mbalaamu, ũla wamanyĩisye Mbalaki kwia kĩndũ kya kũlulutĩkya mbee wa ana ma Isilaeli, nĩ kana maye syĩndũ ithembewe mĩvw’anano na meke ũlaalai.*
15 O ta ũu, wĩ na ala maatĩĩaa momanyĩsyo ma kĩkundi kya ndĩni ya Nikolai.
16 Kwoou ĩlile. Walea kwĩka ũu, nĩnũkĩte kwaku mĩtũkĩ, na ngokita namo ngĩtũmĩa ũvyũ mũasa wa kanyw’a wakwa.
17 “‘Ũla wĩ kũtũ nĩew’e ũndũ ũũ veva ũũtavya ikundi: Ũla wĩsinda ngamũolela mana ĩla mbithe, na ngamũnenga kavila keũ, na ĩũlũ wako vaandĩkĩtwe ĩsyĩtwa yeũ, yĩla vate mũndũ o na ũmwe ũyĩsĩ eka o ũla wanengwa ĩsyĩtwa yĩu.’
18 “Na kwa mũlaĩka wa kĩkundi kya Thiatila andĩka atĩĩ: Aa nĩmo maũndũ ala meũwetwa nĩ Mwana wa Ngai, ũla wĩ na metho mailye ũmũĩ wa mwaki na maaũ make mailye ũthuku* mũseo:
19 ‘Nĩnĩsĩ meko maku, na wendo waku na mũĩkĩĩo, na ũthũkũmi na wũmĩĩsyo, na meko maku ala ma mĩtũkĩ nĩ maingĩ kwĩ ala ma mbee.
20 “‘O na ũu wĩ o vo, nĩ na ũndũ ũũ ĩũlũ waku: nĩwũmĩĩasya ũla mũndũ mũka Yeseveli, ũla wĩyĩtaa mwathani, na ũmanyĩasya na kũkenga ngombo syakwa syĩke ũlaalai* na kũya syĩndũ ithembewe mĩvw’anano.
21 Na nĩnamũnengie ĩvinda ya kwĩlila, ĩndĩ ndekwenda kwĩlila naĩ ya ũlaalai* ĩla wĩkĩte.
22 Sisya! Nĩ vakuvĩ kũmwĩkya ũkomonĩ wa mũwau, na kũmalikya ala mekaa ũlaalai nake thĩnanĩ mũnene, malea kwĩlila nũndũ wa maũndũ ala watumie meka.
23 Na ngooaa syana syake na ũwau mũthũku mũno, nĩ kana ikundi syonthe imanye kana ninyie nĩthianaa mosũanĩo ala ma nthĩnĩ vyũ na ngoo, na ngamũĩva kĩla ũmwe wenyu kwosana na mawĩa make.
24 “‘Ĩndĩ nĩmatavya ũũ ala angĩ menyu me Thiatila, onthe ala mataatĩĩaa ũmanyĩsyo ũsu, ala matesĩ kĩla kĩtawa “maũndũ maliku ma Satani”: Ndimwongeleela mũio ũngĩ o na ũmwe.
25 O na vailye ũu, kwata ũlũmĩtye kĩla wĩ nakyo nginya yĩla nĩũka.
26 Na ũla wĩsinda na kũendeea kwĩka nginya mũminũkĩlyo maũndũ ta ala neekie, ngamũnenga ũkũmũ ĩũlũ wa mbaĩ,
27 na akaĩthya andũ na ndata ya kyũma na kũmatilanga ilungu ta mĩio ya yũmba, o tondũ neeaĩwe nĩ Asa wakwa.
28 Na ngamũnenga ndata ya kwakya.
29 Ũla wĩ kũtũ nĩew’e kĩla veva ũũtavya ikundi.’
Maelesyo ma kwongeleela
^ Kana “valatisonĩ ya Ngai.”
^ Sisya Maelesyo ma Ndeto.
^ Kĩsũngũ, copper.
^ Sisya Maelesyo ma Ndeto.
^ Kĩkiliki, por·neiʹa. Sisya Maelesyo ma Ndeto.
