Ũvuany’o 21:1-27
21 Na noona ĩtu yeũ na nthĩ nzaũ; nũndũ ĩtu ya mbee nĩ ĩvĩtu na nthĩ ya mbee nĩ mbĩtu, na ũkanga ndwĩ vo ĩngĩ.
2 O na ĩngĩ, noona ndũa ntheu, Yelusaleme Nzaũ, ĩtheeete kuma ĩtunĩ kwa Ngai, yũmbanĩtw’e ta mũtwawa wanakavĩw’e mũũme.
3 Na neew’a wasya mũnene kuma kĩvĩlanĩ kya ũsumbĩ ũyasya: “Sisya! Ĩeema ya Ngai yĩ vamwe na andũ, na akekalaa vamwe namo, na makeethĩwa andũ make. Na Ngai mwene akeethĩwa vamwe namo.
4 Na akavangũla methoi onthe methonĩ moo, na kĩkw’ũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”
5 Na Ũla wĩkalĩte kĩvĩlanĩ kya ũsumbĩ asya: “Sisya! Nĩngũtw’ĩkĩthya maũndũ onthe meũ.” O na ĩngĩ asya: “Andĩka, nũndũ ndeto ii nĩ sya kũĩkĩĩka na nĩ sya w’o.”
6 Na ambĩa: “Nĩsyeanĩa! Ninyie Aliva na Omeka,* mwambĩlĩlyo na mũminũkĩlyo. Mũndũ o na wĩva ũla wĩ na waũni ngamũnenga kĩw’ũ mana* kĩla kyumĩte nthongonĩ* ya kĩw’ũ kya thayũ.
7 Ũla wĩsinda akatiĩwa syĩndũ isu, na ngeethĩwa Ngai wake nake akeethĩwa mwana wakwa.
8 Ĩndĩ ala me wia, na ala mate mũĩkĩĩo, na ala mekaa maũndũ mavuku ma kũthatya, na oaani, na ilaalai,* na ala mekaa maũndũ makonetye kũneenany’a na maveva, na athaithi ma mĩvw’anano, na ala makenganaa, makekw’a ĩianĩ yĩla yakanaa mwaki na mũvĩlĩtĩ. Kĩu nĩkyo kĩkw’ũ kya kelĩ.”
9 Na ũmwe wa ala alaĩka mũonza ala maĩ na mbakũli mũonza ila syaĩ na mothĩny’o mũonza ooka, na ambĩa: “Ũka na nĩngũkwony’a mũtwawa, mũka wa kala Kalondu.”
10 Na angua kwĩsĩla vinya wa veva andwaa kĩĩmanĩ kĩnene kĩtũlu, na ambony’a ĩla ndũa ntheu Yelusaleme ĩtheeete kuma ĩtunĩ kwa Ngai
11 na yaĩ na ũtheu mũtisu wa Ngai. Ũtisu wayo wailye ta ĩvia yĩla ya thooa mũnene vyũ, ta ĩvia ya yasivi ĩtheu vyũ.
12 Yaĩ na ũkũta mũnene mũtũlu na yaĩ na mĩvĩa 12 ĩla yaĩ na alaĩka 12, na mĩvĩanĩ ĩsu vaandĩkĩtwe masyĩtwa ma ila mbaĩ 12 sya ana ma Isilaeli.
13 Ngalĩko ya wumĩlonĩ wa syũa vaĩ mĩvĩa ĩtatũ, na ngalĩko ya ĩũlũ vaĩ mĩvĩa ĩtatũ, na ngalĩko ya ĩtheo vaĩ mĩvĩa ĩtatũ, na ngalĩko ya ũthũĩlonĩ wa syũa vaĩ mĩvĩa ĩtatũ.
14 Na ũkũta wa ndũa ĩsu waĩ na mavia ma mũsingi 12, na ĩũlũ wamo vaandĩkĩtwe masyĩtwa 12 ma ala atũmwa 12 ma kala Kalondu.
15 Na ũla waneenaa nakwa aĩ na mũangi wa kũthima wa thaavu nĩ kana athime ndũa ĩsu na mĩvĩa yayo vamwe na ũkũta wayo.
16 Na ndũa ĩsu yeanene ngalĩko syonthe, ũasa wayo weanene na ũthanthau wayo. Na athima ndũa ĩsu na mũangi, na kĩthimo kyayo kyaĩ maili 1,500;* ũasa wayo, na ũthanthau wayo, na ũtũlu wayo nĩsyeanene.
17 O na nĩwathimie ũkũta wayo, na waĩ mĩkono 144* kwosana na kĩthimo kya mũndũ, na kĩthimo kya mũlaĩka.
18 Na ũkũta wayo waakĩtwe na yasivi, na ndũa ĩsu yaĩ ya thaavu mũtheu na yaĩ ntheu ta kĩoo.
19 Na mĩsingi ya ndũa ĩsu yaanakavĩtw’e na kĩla ĩvia ya thooa mũnene: mũsingi wa mbee waĩ wa yasivi, wa kelĩ savili, wa katatũ kasitoni, wa kana sumalatai,
20 wa katano salitonyi, wa thanthatũ salitũ, wa mũonza savaliyati, wa nyanya mbelili, wa kenda tovasi, wa ĩkũmi kilisovilise, wa ĩkũmi na ĩmwe ayasinthi, wa ĩkũmi na ilĩ amethusito.
21 O na mĩvĩa yayo 12 yaseũvĩtw’e na lũlũ 12; na kĩla mũvĩa waakĩtwe na lũlũ waw’o. Na nzĩa nene ya ndũa ĩsu yaĩ thaavu mũtheu ũilye ta kĩoo kĩtheu.
22 Na ndyaaona ĩkalũ nthĩnĩ wayo nũndũ Yeova Mwene Vinya W’onthe nĩwe ĩkalũ ya ndũa ĩsu, vamwe na kala Kalondu.
23 Na ndũa ĩsu ndyaĩ na vata wa kyeni kya syũa kana mwei, nũndũ ũtheu mũtisu wa Ngai nĩw’o wamĩmulĩkaa, na taa wayo waĩ kala Kalondu.
24 Na mbaĩ ikaendaa imulĩkĩlwe nĩ kyeni kyayo, na asumbĩ ma nthĩ makaete ũtheu woo mũtisu ndũanĩ ĩsu.
25 Na mĩvĩa yayo ndĩkavingwa mũthenya nongi, nũndũ kũikethĩwa ũtukũ.
26 Na makaete ũtheu mũtisu na ndaĩa ya mbaĩ nthĩnĩ wayo.
27 Ĩndĩ kĩndũ o na kĩva kĩvuku, na mũndũ o na wĩva ũla wĩkaa maũndũ ma kũthatya, na ũkenganaa, ndakalika nthĩnĩ wayo; ĩndĩ ala makalika no ala maandĩkĩtwe yĩla ĩvukunĩ ya kũkũnzwa ya thayũ ya kala Kalondu.
Maelesyo ma kwongeleela
^ Kana “A na Z.” Aliva nĩyo nthoo ya mbee, nayo Omeka nĩyo nthoo ya mũthya, nthoonĩ sya Kĩkiliki.
^ Kana “vate kũĩva.”
^ Kana “mbulutinĩ.”
^ Sisya Maelesyo ma Ndeto, “Ũlaalai.”
^ Ta kĩlomita 2,220. Ndeto kwa ndeto, “iwanza 12,000.” Kĩwanza kĩmwe kyeethĩawa na ũasa wa mita 185 (vuti 606.95).
^ Ta mita 64 (vuti 210).
