1 Akolintho 14:1-40
14 Atĩĩai wendo, na mũiendeea kwĩkĩa kĩthito nĩ kana mũkwate mĩthĩnzĩo ya veva, ĩndĩ wĩthĩwa wĩ ũseo mũkathana.
2 Nũndũ ũla ũneenaa na kĩthyomo ndethĩawa aineena na andũ, ĩndĩ ethĩawa aineena na Ngai, nĩkwĩthĩwa vaiĩ ũmwe wĩthukĩĩasya, ĩndĩ aneenaa syĩmbithĩ ntheu kwĩsĩla veva.
3 Ĩndĩ ũla wathanaa ethĩawa ayaka andũ, aimathangaasya, na kũmakiakisya kwĩsĩla ũneeni wake.
4 Ũla ũneenaa na kĩthyomo ethĩawa ayĩyaka we mwene, ĩndĩ ũla wathanaa ethĩawa ayaka kĩkundi.
5 Yu nyie nenda inyw’onthe mũneene na ithyomo, ĩndĩ nĩ kavaa mũkathana. Kwa w’o, ũla wathanaa nĩ mũnene kwĩ ũla ũneenaa na ithyomo, ethĩwa ndekũalyũla ithyomo isu, nĩ kana kĩkundi kĩtonye kwakwa.
6 Ĩndĩ ethĩwa ĩvindanĩ yĩĩ ana-a-asa, nĩũka kwenyu ngĩneena na ithyomo, nĩthĩwa ngĩmwĩka ũseo mwaũ ethĩwa ndiũneena nenyu ngĩtũmĩa ũvuany’o, kana ũmanyi, kana wathani, kana ũmanyĩsyo?
7 No ũndũ ũmwe na syĩndũ ite thayũ ila syumasya wasya, syĩthĩwe nĩ syĩndũ ta mũtũlilũ kana mbeve. Syalea kumya mawasya me kĩvathũkany’o, wasya wa mũtũlilũ ũla ũkũvuvwa kana wa mbeve ĩla ĩkũingwa ũkamanyĩka ata?
8 Nũndũ ethĩwa soo wĩumya wasya ũte kũeleeka nesa, nũũ ũtonya kwĩyũmbany’a kwondũ wa kaũ?
9 O ta ũu, mwalea kũneena ndeto syĩ kũeleeka laisi, mũndũ atonya kũmanya ata kĩla kĩũneenwa? Vate nzika mwĩthĩwa mũineena na kĩseve.
10 Nĩkũtonya kwĩthĩwa ithyomo sya mĩthemba mingĩ ĩũlũ wa nthĩ, ĩndĩ vaiĩ kĩmwe kĩthĩawa kĩte ũndũ kĩũweta.
11 Nũndũ ethĩwa ndikũelewa kĩthyomo kya ũla ũkũneena, ngeethĩwa nĩ mũeni kwa ũla ũkũneena, nake ũla ũkũneena akeethĩwa e mũeni kwakwa.
12 O ta ũu o nenyu, nũndũ nĩmũkwenda mũno mĩthĩnzĩo ya veva, manthai kwĩthĩwa na mĩthĩnzĩo mingĩ ĩla ĩtonya kwaka kĩkundi.
13 Kwoou, ekai ũla ũkũneena na kĩthyomo avoye nĩ kana ethĩwe atonya kũalyũla.
14 Nũndũ ethĩwa nĩvoya na kĩthyomo kĩeni, mũthĩnzĩo wakwa wa veva nĩw’o ũũvoya, ĩndĩ kĩlĩko kyakwa kĩi wĩanĩ.
15 Yu nata waĩle kwĩkwa? Nĩngũvoya ngĩtũmĩa mũthĩnzĩo wa veva na ngĩsyoka nĩvoye ngĩtũmĩa kĩlĩko kyakwa. Nĩngwina mbathi sya kũmũkumya Ngai ngĩtũmĩa mũthĩnzĩo wa veva, na ngĩsyoka nine mbathi sya kũmũkumya Ngai ngĩtũmĩa kĩlĩko kyakwa.
16 Nũndũ ethĩwa wĩmũkumya Ngai ũitũmĩa mũthĩnzĩo wa veva, we mũndũ ũla ũte mũmanyĩsye wĩ vau katĩ wenyu atonya ata kwasya “Ameni” yĩla watũnga mũvea, na ndesĩ ũndũ ũkwasya?
17 Kwa w’o, we nũũtũnga mũvea nesa ĩndĩ mũndũ ũla ũngĩ ndekwakwa.
18 Nĩngũtũngĩa Ngai mũvea nĩkwĩthĩwa nĩneenaa na ithyomo mbingĩ kwĩ inyw’ĩ inyw’onthe.
19 Ĩndĩ kĩkundinĩ, nĩ kavaa nganeena ndeto itano ngĩtũmĩa kĩlĩko kyakwa nĩ kana nĩthĩwe ndonya kũmanyĩsya ala angĩ, kwĩ kũneena ndeto ngili ĩkũmi na kĩthyomo.
20 Ana-a-asa, mũikethĩwe ta syana nini nthĩnĩ wa kũelewa kwenyu, ĩndĩ ĩthĩwai ta syana nini maũndũnĩ ala mathũku; na mũyĩthĩwa mwĩ andũ aima nthĩnĩ wa kũelewa kwenyu.
21 Mĩaonĩ kũandĩkĩtwe atĩĩ: “‘Ngatũmĩa andũ meũneena ithyomo syĩ kĩvathũkany’o na andũ aeni kũneena na andũ aa, ĩndĩ o na neeka ũu maikambĩthukĩĩsya,’ easya ũu Yeova.”
22 Kwoou, kũneena na ithyomo nĩ wonany’o kwondũ wa ala mate etĩkĩli ĩndĩ ti kwondũ wa ala etĩkĩli, naw’o wathani nĩ kwondũ wa ala etĩkĩli ĩndĩ ti kwondũ wa ala mate etĩkĩli.
23 Kwondũ wa ũu ethĩwa kĩkundi kyonthe nĩkyoombana vandũ vamwe na onthe maineena na ithyomo, ĩndĩ andũ mate amanyĩsye kana mate etĩkĩli mayũka vo, mo tyo masye mwĩ na ndũũka?
24 Ĩndĩ ethĩwa inyw’onthe nĩmũkwathana na mũndũ ũte mwĩtĩkĩli kana ũte mũmanyĩsye ayũka vala mũĩ, akakanw’a na kũthianwa nĩ onthe.
25 Na nũndũ wa ũu kĩmbithĩ kya ngoo yake kĩimanyĩka, na ũu ũituma avalũka nthĩ na ũthyũ na kũmũthaitha Ngai, akyasya: “Vate nzika, Ngai e vamwe nenyu.”
26 Yu nata waĩle kwĩkwa ana-a-asa? Yĩla mwoombana vamwe na ũmwe e na savuli, na ũngĩ e na ũmanyĩsyo, na ũngĩ e na ũvuany’o, na ũngĩ e na kĩthyomo, na ũngĩ nũkũalyũla, ekai maũndũ onthe mekwe kwondũ wa kwakana.
27 Na ethĩwa mũndũ nũkũneena na kĩthyomo, nĩvethĩwe elĩ kana mayingĩva atatũ, na maineena ũmwe ĩtina wa ũla ũngĩ, na no nginya vethĩwe mũndũ wa kũalyũla.
28 Ĩndĩ ethĩwa vaiĩ mũndũ wa kũalyũla, ũla ũkũneena no nginya avindye kĩkundinĩ na aineena na Ngai ngoonĩ yake.
29 Eka athani elĩ kana atatũ maneene, na andũ ala angĩ maitata maelewe nesa kĩla asu meũneena.
30 Ĩndĩ ethĩwa mũndũ ũngĩ ũilyĩ vau nĩwavuanĩw’a ũndũ, mũneeni ũla wa mbee navindye.
31 Nũndũ inyw’onthe no mwathane ũmwe ĩtina wa ũla ũngĩ, nĩ kana onthe matonye kwĩmanyĩsya na onthe matonye kũthangaaw’a.
32 Na mĩthĩnzĩo ya veva ya athani yaĩle kũtongoew’a nĩ athani.
33 Nũndũ Ngai ti Ngai wa kĩthokoany’o ĩndĩ nĩ Ngai wa mũuo.
O tondũ kũilye ikundinĩ syonthe sya ala atheu,
34 aka nĩmekale mavindĩtye ikundinĩ, nũndũ mayĩtĩkĩlĩtw’e kũneena. Vandũ va ũu, nĩmethĩwe menyivĩtye, o tondũ Mĩao o nayo ĩkwasya.
35 Ethĩwa nĩmekwenda kwĩmanyĩsya ũndũ, nĩmakũlye aũme moo ene me mũsyĩ, nũndũ nĩ ũndũ wĩ nthoni kwa mũndũ mũka kũneena kĩkundinĩ.
36 Yo ndeto ya Ngai yaumie kwenyu, kana yavikie o kwenyu mwĩ inyw’oka?
37 Ethĩwa mũndũ o na wĩva esũanĩa kana we nĩ mwathani kana e na mũthĩnzĩo wa veva, no nginya etĩkĩle kana maũndũ ala ngũmũandĩkĩa nĩ mwĩao wa Mwĩaĩi.
38 Ĩndĩ ethĩwa mũndũ o na wĩva ndekwĩtĩkĩlana na maũndũ asu, o nake ndaketĩkĩlwa.*
39 Kwoou ana-a-asa, endeeai kwĩkĩa kĩthito nthĩnĩ wa kwathana, o na ũu wĩ o vo, mũikavate angĩ kũneena na ithyomo.
40 Ĩndĩ ekai maũndũ onthe mekĩke kwa nzĩa nzeo na kwa mũvango.*
Maelesyo ma kwongeleela
^ Kana nĩvatonyeka, “ethĩwa mũndũ o na wĩva ndekwenda kũmanya, eendeea kwĩthĩwa atesĩ.”
^ Kana “maatĩanĩe.”
