1 Akolintho 15:1-58
15 Yu, ana-a-asa, nĩngũmũlilikany’a ũvoo mũseo ũla namũtavisye, na ũla mweetĩkĩlile, na ũla kwondũ waw’o mũũngamĩte mwĩ alũmu.
2 Na nũndũ waw’o nĩmũũtangĩĩwa mwaendeea kwĩthĩwa mũlũmanĩtye na ũvoo mũseo ũla namũtavisye, ethĩwa kwĩtĩkĩla kwenyu kũyaĩ kwa mana.
3 Nũndũ katĩ wa maũndũ ma mbee ala namũmanyĩisye nomo o nakwa namanyĩĩtw’e, kana Klĩsto nĩwakwie kwondũ wa naĩ sitũ kwosana na Maandĩko;
4 na kana nĩwathikiwe, ĩĩ, na kana nĩwathayũũkiw’e mũthenya wa katatũ kwosana na Maandĩko;
5 na kana nĩwamumĩlĩĩile Keva,* na asyoka amaumĩlĩĩla ala Ĩkũmi na Elĩ.
6 Ĩtina wa vau nĩwamaumĩlĩĩile ana-a-asa angĩ mbee wa 500 ĩvinda yĩmwe, na aingĩ moo me o vamwe naitũ, ĩndĩ amwe nĩmakwie.
7 Na ĩtina wa vau nĩwamumĩlĩĩile Yakovo, na ĩndĩ amaumĩlĩĩla atũmwa onthe.
8 Ĩtina wa onthe nĩwambumĩlĩĩile nyie, ta ũmwe ũsyaĩtwe ĩvinda yĩte ĩviku.
9 Nĩkwĩthĩwa ninyie mũnini katĩ wa atũmwa, na ndyaĩle kwĩtwa mũtũmwa, nũndũ nĩnathĩnasya kĩkundi kya Ngai.
10 Ĩndĩ nyie nĩilye ũndũ nĩilye ũmũnthĩ nũndũ wa ũseo mwingĩ wa Ngai. Na ũseo wake mwingĩ kwakwa ndwaĩ wa mana, nũndũ nĩnatethisye wĩa mwingĩ kũmavĩtũka onthe; o na kau ti kwa ũtonyi wakwa, ĩndĩ nĩ kwĩsĩla ũseo mwingĩ wa Ngai ũla naĩ naw’o.
11 Kwoou, o na ethĩwa ninyie kana nĩmo, ũu nĩw’o tũtavanasya, na ũu nĩw’o mwatw’ĩkie etĩkĩli.
12 Yu ethĩwa nĩkũũtavanw’a kana Klĩsto nĩwathayũũkiw’e, nĩkĩ amwe katĩ wenyu mekwasya kana kũiĩ ũthayũũkyo?
13 Ethĩwa kũiĩ ũthayũũkyo, o nake Klĩsto ndaathayũũkw’a.
14 Na ethĩwa Klĩsto ndaathayũũkw’a, kũtavany’a kwitũ no kwa mana, na mũĩkĩĩo wenyu o naw’o nĩ wa mana.
15 O na ĩngĩ, ithyĩ twĩ ngũsĩ sya ũvũngũ sya Ngai, nũndũ nĩtumĩtye ũkũsĩ ĩũlũ wa Ngai tũkasya kana nĩwamũthayũũkisye Klĩsto, nake ndethĩwa aamũthayũũkya ethĩwa kwa w’o akw’ũ maikathayũũkw’a.
16 Nũndũ ethĩwa akw’ũ maikathayũũkw’a, o nake Klĩsto ndaathayũũkw’a.
17 O na ĩngĩ, ethĩwa Klĩsto ndaathayũũkw’a, mũĩkĩĩo wenyu nĩ wa mana; mwĩ o naĩnĩ syenyu.
18 O na ala makwie me nthĩnĩ wa Klĩsto nĩmaaie vyũ.
19 Ethĩwa tũmwĩkwatĩtye Klĩsto nthĩnĩ wa thayũ ũũ w’oka, nithyĩ ma kwĩw’ĩwa tei vyũ kwĩ andũ onthe.
20 Ĩndĩ yu Klĩsto nĩwathayũũkiw’e, nake nĩwe ũsyao wa mbee wa ala makwie.
21 Nũndũ ethĩwa kĩkw’ũ kyookie nũndũ wa mũndũ ũmwe, ũthayũũkyo o naw’o ũkooka nũndũ wa mũndũ ũmwe.
22 Nũndũ o tondũ andũ onthe makusaa nũndũ wa Atamu, o ta ũu onthe makeethĩwa thayũ nũndũ wa Klĩsto.
23 Ĩndĩ kĩla ũmwe akathayũũkw’a ĩvinda yake mwene: Klĩsto ũsyao wa mbee, na ĩtina ala ma Klĩsto ĩvinda ya kwĩthĩwa vo kwake.
24 Na mũthya, akanengane Ũsumbĩ kwa Ngai wake nake nĩwe Ĩthe, yĩla ũkethĩwa aminĩte silikalĩ syonthe na ũkũmũ w’onthe na vinya.
25 Nũndũ no nginya asumbĩke e mũsumbĩ nginya yĩla Ngai ũkaia amaitha make ungu wa nyaaĩ syake.
26 Na mũmaitha wa mũthya ũla ũkaminwa nĩ kĩkw’ũ.
27 Nũndũ Ngai “nĩwaiie syĩndũ syonthe ungu wa nyaaĩ syake.” Ĩndĩ yĩla ũkwasya kana ‘syĩndũ syonthe nĩsyaiiwe ungu wa nyaaĩ syake,’ nĩ ũndũ wĩ ũtheinĩ kana Ũla waiie syĩndũ syonthe ungu wake ndatalĩtwe vo.
28 Ĩndĩ yĩla syĩndũ syonthe ikaiwa ungu wake, nĩvo ĩndĩ ũ Mwana mwene ũkeyia ungu wa Ũla waiie syĩndũ syonthe ungu wake, nĩ kana Ngai ethĩwe syĩndũ syonthe kwa onthe.
29 Ethĩwa ũu tiw’o vailye, matonya kwĩka ata andũ ala meũvatiswa nĩ kana methĩwe akw’ũ? Nĩkĩ mavatisawa nĩ kana methĩwe akw’ũ, ethĩwa ala akw’ũ maikathayũũkw’a nongi?
30 O na ĩngĩ, nĩkĩ twĩthĩawa mũisyonĩ kĩla ĩvinda?
31 Kĩla mũthenya nĩthĩawa mũisyonĩ wa kũawa, o tondũ vate nzika nĩthĩawa na ũtanu nũndũ wenyu nthĩnĩ wa Klĩsto Yesũ, Mwĩaĩi waitũ.
32 Ethĩwa o ta andũ ala angĩ,* nĩnokitie na nyamũ sya kĩthekanĩ nĩ Eveso, ũu ũndethya na kyaũ? Ethĩwa akw’ũ maikathayũũkw’a, “ekai tũye na tũinyw’a, nũndũ ũnĩ tũkakw’a.”
33 Mũikakengeke. Itindo nthũku nĩsyanangaa mwĩkalĩle mũseo.
34 Amũkai na mũyĩka ũla ũlũngalu na mũikaendeee kwĩka naĩ, nũndũ amwe maimwĩsĩ Ngai. Nĩneena ũu nĩ kana mwĩw’e nthoni.
35 Ĩndĩ mũndũ no asye: “Akw’ũ makathayũũkw’a ata? Ĩĩ, makathayũũkw’a na mwĩĩ wa mũthemba mwaũ?”
36 We mũndũ mũtumanu! Kĩla wavanda kĩitonya kwĩthĩwa thayũ ate o kyambie kũkw’a.
37 Na ĩũlũ wa kĩla ũũvanda, ndũvandaa mwĩĩ ũla ũkethĩwa vo, ĩndĩ o mbeũ, yĩthĩwe nĩ ya nganũ kana nĩ ya mũthemba ũngĩ;
38 ĩndĩ Ngai nũmĩnengae mwĩĩ o ũndũ we mwene ũkwenda, na nũnengae kĩla mbeũ mwĩĩ wayo.
39 Mĩĩ yonthe ndĩthĩawa ĩvw’anene, ĩndĩ ve mwĩĩ wa mũndũ, na ve mwĩĩ wa indo, ũngĩ wa nyũnyi, na ũngĩ wa makũyũ.
40 Na kwĩ mĩĩ ya ĩtunĩ na mĩĩ ya kũũ nthĩ; ĩndĩ wanake wa mĩĩ ya ĩtunĩ wĩ kĩvathũkany’o na wanake wa mĩĩ ya kũũ nthĩ.
41 Syũa yĩ wanake wa mũthemba mũna, na mwei wĩ wanake wa mũthemba ũngĩ; naw’o wanake wa ndata nĩ wa mũthemba ũngĩ; o na eka ũu, wanake wa ndata ĩmwe wĩ kĩvathũkany’o na wa ndata ĩla ĩngĩ.
42 Na ũu now’o ũthayũũkyo ũilye. Mwĩĩ nũvandawa ũla wanangĩkaa ĩndĩ nũthayũũkaw’a ũla ũtanangĩkaa.
43 Nũvandawa ũte na ndaĩa ĩndĩ nũthayũũkaw’a wĩ na ndaĩa. Nũvandawa wĩ na wonzu ĩndĩ nũthayũũkaw’a wĩ na vinya.
44 Ũvandawa mwĩĩ wa nyama ĩndĩ nũthayũũkaw’a mwĩĩ wa veva. Ethĩwa kwĩ mwĩĩ wa nyama, kwĩ mwĩĩ wa veva o naw’o.
45 Nĩkũandĩkĩtwe: “Atamu, mũndũ wa mbee, nĩwatw’ĩkie kyũmbe kĩ thayũ.” Atamu wa mũthya nĩwatw’ĩkie veva ũla ũnenganae thayũ.
46 Ĩndĩ ũla wa veva tiw’o wa mbee. Ũla wa nyama nĩw’o wa mbee, na ĩtina ũla wa veva.
47 Mũndũ wa mbee aumie kũũ nthĩ na oombĩtwe na kĩtoo, ĩndĩ mũndũ wa kelĩ aumie ĩtunĩ.
48 O tondũ ũla wũmbĩtwe na kĩtoo ũilye, now’o ala mombĩtwe na kĩtoo mailye; na o tondũ ũla wa ĩtunĩ ũilye, now’o ala ma ĩtunĩ mailye.
49 Na o tondũ twĩ na mũvw’ano wa ũla woombiwe na kĩtoo, o ta ũu tũkeethĩwa na mũvw’ano wa ũla wa ĩtunĩ.
50 Ĩndĩ nĩmũtavya ũũ, ana-a-asa, mwĩĩ na nthakame iitonya kũtiĩwa Ũsumbĩ wa Ngai, o na kĩla kyanangĩkaa kĩitonya kũtiĩwa kĩla kĩtanangĩkaa.
51 Sisyai! nĩngũmũtavya kĩmbithĩ kĩtheu: “Ti ithyonthe tũkakoma too kĩkw’ũnĩ, ĩndĩ ithyonthe tũkaalyũlwa,
52 kwa mĩtũkĩ vyũ, kũveny’a na kũsalukya, ĩvinda ya soo wa mũthya. Nũndũ soo ũkavuvwa, na akw’ũ maithayũũkw’a matatonya kwanangĩka, na tũkaalyũlwa.
53 Nũndũ ũũ wanangĩkaa no nginya wĩvw’ĩke ũla ũtanangĩkaa, na ũũ ũkusaa no nginya wĩvw’ĩke ũla ũtakusaa.
54 Ĩndĩ yĩla ũũ wanangĩkaa wĩĩvw’ĩka ũla ũtanangĩkaa na yĩla ũũ ũkusaa wĩĩvw’ĩka ũla ũtakusaa, nĩvo ĩndĩ ndeto ii syaandĩkiwe ikeanĩa: “Kĩkw’ũ nĩkĩmeletw’e tene na tene.”
55 “Kĩkw’ũ, ũsindi waku ũĩ va? Kĩkw’ũ, ũmoa waku ũĩ va?”
56 Naĩ nĩyo ũmoa ũla ũetae kĩkw’ũ, na vinya wa naĩ nĩ Mĩao.*
57 Ĩndĩ twĩmũtũngĩa Ngai mũvea, nũndũ nũtũnengae ũsindi kwĩsĩla Yesũ Klĩsto, Mwĩaĩi waitũ!
58 Kwoou, ana-a-asa endwa, ĩthĩwai mwĩ alũmu, mũtathingithĩka, na mavinda onthe mũyĩthĩwa na maũndũ maingĩ ma kwĩka wĩanĩ wa Mwĩaĩi, mũimanya kana wĩa wenyu ti wa mana nthĩnĩ wa Mwĩaĩi.
Maelesyo ma kwongeleela
^ Ũla wĩtawa Vetelo.
^ Kana nĩvatonyeka, “kwosana na ũndũ andũ monaa maũndũ.”
^ Kana “na Mĩao nĩyo ĩnengae naĩ vinya.”
