1 Timotheo 1:1-20
1 Nyie Vaulo, mũtũmwa wa Klĩsto Yesũ, kwosana na mwĩao wa Ngai Mũtangĩĩi waitũ na Klĩsto Yesũ, wĩkwatyo witũ,
2 kwa Timotheo,* mwana wakwa wa w’o nthĩnĩ wa mũĩkĩĩo:
Ĩthĩwa na ũseo mwingĩ na tei na mũuo kuma kwa Ngai, ũla nĩwe Asa, na kuma kwa Klĩsto Yesũ Mwĩaĩi waitũ.
3 O tondũ nakũthangaaisye wĩkale Eveso yĩla naĩ vakuvĩ kũthi Masetonia, o ta ũu yu nĩngũũthangaasya, nĩ kana ũmeaĩe andũ amwe maeke kũmanyĩsya momanyĩsyo me kĩvathũkany’o,
4 na maeke kwĩthukĩĩsya ngewa sya ũvũngũ na kwĩka ũkunĩkĩli ĩũlũ wa mosyaanĩo. Maũndũ asu maitethya ĩndĩ maetae makũlyo na mayĩthĩawa na kĩndũ o na kĩmwe kuma kwa Ngai kĩkonetye mũĩkĩĩo.
5 Vate nzika, kĩeleelo kya maũndũ aa nĩ wendo ũla wumanaa na ngoo ntheu na wasya mũtheu wa ngoo na mũĩkĩĩo ũte na wangangany’a.
6 Na amwe nĩmatiĩte maũndũ asu na makelelũkw’a maatĩĩe ndeto sya mana.
7 Andũ asu mendaa kwĩthĩwa amanyĩsya ma mĩao, ĩndĩ mayĩsĩ maũndũ ala meũneena, o na mayĩsĩ maũndũ ala mamanyĩasya na kĩthing’ĩĩsyo.
8 Nĩtwĩsĩ kana Mĩao nĩ mĩseo ethĩwa mũndũ amĩatĩĩaa ũndũ vaĩle,
9 na nĩtwĩsĩ kana mĩao ndyaaseũvw’a kwondũ wa mũndũ mũlũngalu ĩndĩ kwondũ wa ala matũlaa mĩao na ala mate ewi, ala matamũkĩaa Ngai na eki ma naĩ, ala mate aĩkĩĩku na avuku, ala moaaa aa-ĩthe na ala moaaa aa-inyia, oaani,
10 ilaalai,* aũme ala makomaa na aũme,* ala moyaa andũ, akengani, ala mateanĩasya wĩvĩto,* na ala mekaa ũndũ o na wĩva ũla ũleanĩte na momanyĩsyo ala maseo*
11 kwosana na ũvoo mũseo wa kũkumw’a ũla wumaa kwa Ngai mũtanu, ũla nyie nanengiwe.
12 Nĩmũtũngĩa mũvea Klĩsto Yesũ Mwĩaĩi waitũ, ũla wambĩkĩie vinya, nũndũ nĩwoonie nĩ mũĩkĩĩku na anenga ũthũkũmi,
13 o na kau mbeenĩ naĩ mũumi wa Ngai na mũthĩny’a wa andũ make na naĩ mũng’endu. Ĩndĩ nĩneew’ĩiwe tei nũndũ neekaa ũu ndesĩ na ndyaĩ na mũĩkĩĩo.
14 Ĩndĩ ũseo mwingĩ wa Mwĩaĩi nĩwongelekile mũno vamwe na mũĩkĩĩo na wendo kuma kwa Klĩsto Yesũ.
15 Ndeto ii nĩ sya kũĩkĩĩka na nĩsyaĩle kwĩtĩkĩlwa vyũ: Klĩsto Yesũ ookie ĩũlũ wa nthĩ kũtangĩĩa eki ma naĩ. Na ninyie wa mbee vyũ katĩ wa asu.
16 Ĩndĩ nĩneew’ĩwe tei nĩ kana kwĩsĩla nyie, nĩ mwĩki wa naĩ ũla wa mbee vyũ, Klĩsto Yesũ onany’e wũmĩĩsyo wake w’onthe, na aindw’ĩkĩthya ngelekany’o kwa ala makamũĩkĩĩa nĩ kana makwate thayũ wa tene na tene.
17 Yu Mũsumbĩ wa tene na tene, ũla ũtatonya kwanangĩka, ũtonekaa, ũla nowe Ngai e weka, nataĩwe na kũkumw’a tene na tene. Ameni.
18 Maũndũ aa namanengane kwaku, mwana wakwa Timotheo, kwosana na mawathani ala maumiw’e ĩũlũ waku, nĩ kana kwĩsĩla maũndũ asu ũendeee kũkita kaũ ũla mũseo,
19 ũlũmĩtye mũĩkĩĩo na wasya mũseo wa ngoo, ũla amwe mekĩtye ũtee, na makatuma mũĩkĩĩo woo wanangĩka o tondũ meli yanangĩkaa.
20 Aimenaio na Alekisanda nĩ amwe katĩ wa asu, na nĩnamanenganie kwa Satani nĩ kana mamanyĩw’e kwa nzĩa ya ũkany’o kana mayaĩle kũmũuma Ngai.
Maelesyo ma kwongeleela
^ Ũalyũlo wayo nĩ, “Ũla Ũmũnengae Ngai Ndaĩa.”
^ Sisya Maelesyo ma Ndeto, “Ũlaalai.”
^ Kana “aũme ala mamanyanaa kĩ-mwĩĩ na aũme.”
^ Kana “ala mevĩtaa wĩvĩto wa ũvũngũ.”
^ Kana “matethya.”
