1 Timotheo 4:1-16
4 Ĩndĩ ndeto ila mbeveee niwetete nesa kana ĩvinda yũkĩte amwe makatia ũla mũĩkĩĩo, na makeethukĩĩsya ũneeni wa ũvũngũ ũveveewe nĩ maveva mavuku na momanyĩsyo ma ndaimoni,
2 kwĩsĩla wangangany’a wa andũ ala maneenaa ũvũngũ, ala wasya woo wa ngoo ũthelete nthithi ta ũvĩvĩtw’e na kyũma kĩvyũ.
3 Nĩmavataa andũ kũtwaana kana kũtwawa, na kwĩaĩa andũ mevathane na malĩu ala Ngai woombie nĩ kana ala me na mũĩkĩĩo na mesĩ nesa ũla w’o mamaĩsae me na mũvea.
4 Nũndũ kyonthe kĩla Ngai woombie nĩ kĩseo, na vaiĩ kĩndũ kyaĩlĩte kũlewa ethĩwa ala meũkĩya meĩka ũu me na mũvea,
5 nĩkwĩthĩwa nĩkĩtheetw’e kwĩsĩla ndeto ya Ngai na mboya.
6 Wamanenga ana-a-asa ũtao ũsu ũkeethĩwa mũthũkũmi mũseo wa Klĩsto Yesũ, ũla ũĩthĩtw’e ndeto sya ũla mũĩkĩĩo na ũmanyĩsyo mũseo ũla wĩthĩĩtwe ũiũatĩĩa nesa.
7 Ĩndĩ lea ngewa itamũeteae Ngai ndaĩa, ta ila ieawa nĩ iveti ngũũ. Ĩndĩ we ĩmanyĩsye wĩ na kĩeleelo kya kwĩthĩwa na kĩkĩo kya Ngai.
8 Maũndũ ala mũndũ wĩkaa kwondũ wa kwaka mwĩĩ* matethasya o vanini, ĩndĩ kĩkĩo kya Ngai kĩtethasya maũndũnĩ onthe, na kĩ na watho wa thayũ wa yu na wa ĩvinda yĩla yũkĩte.
9 Ndeto isu nĩ sya kũĩkĩĩka na syaĩlĩte kwĩtĩkĩlwa vyũ.
10 Kĩu nĩkyo kĩtumi tũtethasya wĩa na kĩthito tũte kũnoa, nũndũ tũmwĩkwatasya Ngai ũla wĩ thayũ, nake nĩ Mũtangĩĩi wa andũ ma mĩthemba yonthe, na mũno mũno ala aĩkĩĩku.
11 Endeea kũnengane mĩao ĩsu na kũmanyĩsya maũndũ asu.
12 Ndũketĩkĩlye mũndũ o na wĩva aũvũthye nũndũ wĩ mũndũ wa mũika. Vandũ va ũu, ĩthĩwa wĩ ngelekany’o kwa ala aĩkĩĩku nthĩnĩ wa ũneeni, mwĩkalĩle, wendo, mũĩkĩĩo, na ũtheu.
13 Endeea kwĩkĩa kĩthito kya kũsoma mbee wa andũ, kũtaa,* na kũmanyĩsya nginya yĩla nĩũka.
14 Na ndũkaeke kũsũvĩa mũthĩnzĩo ũla wĩ nthĩnĩ waku, ũla wanengiwe kwĩsĩla wathani yĩla nzama ya atumĩa yakwilĩĩile moko.
15 Sũanĩa mũno* maũndũ asu; ĩnengane vyũ kwamo, nĩ kana maendeeo maku moneke ũtheinĩ nĩ andũ onthe.
16 Ĩsũvĩe we mwene vamwe na kũmanyĩsya kwaku. Ĩkala maũndũnĩ asu, nũndũ weeka ũu ũkeetangĩĩa we mwene na ala makwĩthukĩĩasya.
