1 Timotheo 6:1-21
6 Eka ngombo iendeee kũmanenga mavwana masyo ndaĩa yonthe nĩ kana ĩsyĩtwa ya Ngai yĩikese kũneenewa naĩ vamwe na ũla ũmanyĩsyo.
2 O na ĩngĩ, ngombo ila syĩ na mavwana etĩkĩli iikamavũthye nĩkwĩthĩwa nĩ ana-a-asa. Vandũ va ũu syaĩle kũmathũkũma na kĩthito nũndũ ala matethekaa kumana na ũthũkũmi ũsu wasyo mũseo nĩ etĩkĩli na endwa.
Endeea kũmanyĩsya maũndũ asu na kũnengane motao asu.
3 Ethĩwa mũndũ o na wĩva nũkũmanyĩsya momanyĩsyo angĩ na ndetĩkĩlanaa na momanyĩsyo ala maseo,* ala maumĩte kwa Mwĩaĩi waitũ Yesũ Klĩsto, o na ndetĩkĩlanaa na momanyĩsyo ala mosanĩte na kĩkĩo kya Ngai,
4 mũndũ ũsu e na mĩtũlyo na ndaeleawa nĩ kĩndũ. Endete mũno ngananĩo na ngusanĩsyo ĩũlũ wa ndeto. Maũndũ asu nĩmo maetae kĩwĩu, ĩteta, nzukũ, kwĩthĩwa na nzika nthũku ĩũlũ wa ala angĩ,
5 ngananĩo itathelaa sya tũmaũndũ tũnini twa andũ me na ilĩko mbuku na matesĩ ũla w’o, na masũanĩaa kana kĩkĩo kya Ngai nĩ nzĩa ya kwĩyĩuna.
6 Vate nzika, kũmũkĩa Ngai o vamwe na kwĩanĩwa nĩkũunaa mũno.
7 Nũndũ tũyaaete kĩndũ ĩũlũ wa nthĩ na tũitonya kuma na kĩndũ.
8 Kwoou, tweethĩwa na lĩu na ngũa tũkeanĩawa nĩ syĩndũ isu.
9 Ĩndĩ ala matw’ĩte kwĩthĩwa athwii nĩmavalũkaa ĩtatwanĩ na kĩteinĩ na mĩmeonĩ mĩthũku na ya ũtumanu ĩla ĩtumaa makwatwa nĩ wanangĩko na kĩkw’ũ.
10 Nũndũ wendi wa mbesa nĩ kĩtina kya maũndũ mathũku ma mĩthemba yonthe na nũndũ wa kwĩthĩwa na wendi ũsu, amwe nĩmelelũkĩte kuma mũĩkĩĩonĩ na maketonyanga kĩla vandũ na makakwatwa nĩ mawoo maingĩ.
11 Ĩndĩ we mũndũ wa Ngai, kĩa maũndũ asu na ũiatĩĩa ũlũngalu, kĩkĩo kya Ngai, mũĩkĩĩo, wendo, wũmĩĩsyo, na ũuu.
12 Ũkita kaũ ũla mũseo wa mũĩkĩĩo; lũmya vyũ thayũ wa tene na tene ũla weetĩiwe na waumya ũkũsĩ mũseo ũtheinĩ mbee wa ngũsĩ mbingĩ.
13 Nĩngũkwĩaĩa mbee wa Ngai, ũla wĩkalasya syĩndũ syonthe thayũ, na mbee wa Klĩsto Yesũ, ũla waumisye ũkũsĩ mũseo ũtheinĩ mbee wa Vondio Vilato,
14 ũkwate ũla mwĩao, ũte na ĩlanga na ũtaweteka ũthũku nginya kumĩla kwa Mwĩaĩi waitũ Yesũ Klĩsto,
15 kũla kũkonanw’a nĩ Mwĩaĩi wĩ Ũtonyi na mũtanu ĩvindanĩ yake yĩla yĩtw’ĩtwe. Nĩwe Mũsumbĩ wa asumbĩ na Mwĩaĩi wa eaĩi,
16 ũla e weka ũtatonya kũkw’a, wĩkalaa kyeninĩ kĩtathengeeka, na ũla vate mũndũ waamwona kana ũtonya kũmwona. Kwake vethĩwe na ndaĩa na ũnene wa tene na tene. Ameni.
17 Meaĩe ala me na ũthwii wa nthĩ ĩno* maikethĩwe na ngathĩĩo na maikekwatye ũthwii ũla wanangĩkaa, ĩndĩ mamwĩkwatye Ngai ũla ũtũnengete kwa wingĩ syĩndũ syonthe ila tũtanĩaa.
18 Matavye mekae ũseo, methĩwe athwii mekonĩ maseo, methĩwe me alau, na meyũmbanĩtye kũaĩa ala angĩ kĩla me nakyo,
19 na mayĩseũvĩsya mũsingi mũseo kwondũ wa ĩvinda yĩla yũkĩte, nĩ kana malũmye ũla thayũ wa w’o.
20 Naku Timotheo sũvĩa nesa kĩla wanengiwe, na ũyĩvathana na ndeto sya mana ila ivukasya kĩla kĩtheu na ũyĩsũvĩana na ngananĩo ila syumanaa na kĩla kĩtawa “ũmanyi” na ti w’o.
21 Na amwe nĩmetĩkĩlĩte ũmanyi ũsu na makelelũka kuma ũla mũĩkĩĩonĩ.
Ũseo mwingĩ nĩwĩthĩwe naku.
