1 Vetelo 4:1-19
4 Nĩkwĩthĩwa Klĩsto nĩwathĩniw’e nthĩnĩ wa mwĩĩ, o nenyu ĩyũmbany’ei kwĩthĩwa na kĩsũanĩo o ta kĩla waĩ nakyo; nũndũ mũndũ ũla ũthĩnĩtw’e nthĩnĩ wa mwĩĩ nũekanĩte na naĩ,
2 nĩ kana ekale ĩvinda yĩla yĩtiele e nthĩnĩ wa mwĩĩ, ti kwondũ wa mawendi ma andũ, ĩndĩ kwondũ wa kwenda kwa Ngai.
3 Nũndũ ĩvinda yĩla ĩvĩtu nĩyamwĩanĩtye kwĩka kwenda kwa andũ ma mbaĩ ingĩ, yĩla mwekaa maũndũ mavuku na ngũlũ,* mwaĩ na mawendi matasiĩĩka, mwanyusaa mũno, mweethĩawa na mboka itaĩle, mweethĩawa na syathĩ sya kũnyw’a, na mweelikĩtye ũthaithinĩ mũthũku mũno wa mĩvw’anano.
4 Nĩmaseng’aa moona mũteũsemba vamwe namo mũendelenĩ woo mũvuku, na nĩkyo kĩtumi mamũneeneaa naĩ.
5 Ĩndĩ andũ asu makaumya ũtalo kwa ũla wĩyũmbanĩtye kũsilĩla ala me thayũ na ala akw’ũ.
6 Nĩ w’o kana kĩu nĩkyo kĩtumi ũvoo mũseo watavaniw’e kwa ala akw’ũ namo, nĩ kana o na kũtw’ĩka nĩ asilĩle nthĩnĩ wa mwĩĩ kwosana na mawoni ma andũ, matonye kwĩkala thayũ kĩ-veva kwosana na woni wa Ngai.
7 Ĩndĩ mũthya wa maũndũ onthe nĩ mũthengeeu. Kwoou, ĩthĩwai na kĩlĩko kĩseo, na mwĩ metho mũte kũeka kũvoya.
8 Ĩndĩ mbee wa maũndũ onthe, ĩthĩwai na wendo mwingĩ katĩ wenyu, nũndũ wendo nũvw’ĩkaa naĩ mbingĩ.
9 Thokany’ai mũte kũnyungunyĩsya.
10 Kwĩanana na ũndũ kĩla ũmwe wakwatie mũthĩnzĩo, ũtũmĩei kũtetheanĩsya ta aũngamĩi aseo ma ũseo mwingĩ wa Ngai ũla wonanaw’a kwa nzĩa syĩ kĩvathũkany’o.
11 Ethĩwa mũndũ o na wĩva nũkũneena, nĩ aneene ta ũkũneena ndeto syumĩte kwa Ngai; ethĩwa mũndũ o na wĩva nũkũtetheesya angĩ, nĩ eke ũu ekwatĩtye vinya ũla Ngai ũnenganae; nĩ kana maũndũnĩ onthe Ngai akumw’e kwĩsĩla Yesũ Klĩsto. Nguma na vinya nĩ syake tene na tene. Ameni.
12 Endwa, mũikaseng’e nũndũ wa motato mailye ta mwaki ala mamũkwatĩte, ta mũkwatĩtwe nĩ maũndũ maeni.
13 Vandũ va ũu, endeeai kũtana yĩla mũendeee kũthĩnw’a o ũndũ Klĩsto wathĩniw’e, nĩ kana o nenyu mwĩtana na kwĩthĩwa na mũyo mwingĩ ĩvinda ya kũvuanw’a kwa ũtheu wake mũtisu.
14 Ethĩwa nĩmũũneenewa naĩ nũndũ wa ĩsyĩtwa ya Klĩsto, mwĩ atanu, nũndũ veva ũla mũseo, ĩĩ, veva wa Ngai, wĩ ĩũlũ wenyu.
15 Ĩndĩ vaikethĩwe ũmwe wenyu ũkũthĩnw’a nũndũ nĩ mũaani, kana kĩng’ei, kana mwĩki wa naĩ, kana mũndũ wĩlikasya maũndũnĩ ma andũ angĩ.
16 Ĩndĩ ethĩwa mũndũ o na wĩva nũkũthĩnw’a nũndũ nĩ Mũklĩsto, ndakew’e nthoni, ĩndĩ naendeee kũmũkumya Ngai kwa kwĩkala kwosana na ĩsyĩtwa yĩu.
17 Nĩkwĩthĩwa ĩvinda nĩ ĩviku ya ũsilĩlo kwambĩĩa na nyũmba ya Ngai. Na ethĩwa wĩambĩĩa naitũ, maũndũ makeethĩwa mailye ata kwa ala matethukĩĩasya ũvoo mũseo kuma kwa Ngai?
18 “Na ethĩwa mũndũ mũlũngalu etangĩĩwa na thĩna, maũndũ makeethĩwa mailye ata kwa mũndũ ũla ũtamũkĩaa Ngai na mwĩki wa naĩ?”
19 Kwoou, ekai ala meũthĩnw’a nũndũ wa kwĩka kwenda kwa Ngai maendeee kwĩka maũndũ maseo na kwĩnengane kwa Mũmbi woo mũĩkĩĩku.
Maelesyo ma kwongeleela
^ Kĩkiliki, a·selʹgei·a. Sisya Maelesyo ma Ndeto.
