1 Yoana 5:1-21
5 Kĩla mũndũ ũĩkĩĩaa kana Yesũ nĩwe Klĩsto nũtw’ĩkĩte mwana wa Ngai, na kĩla mũndũ wendete Ngai nĩwendete syana sya Ngai.
2 Na nũndũ wa ũndũ ũũ, nĩtwĩsĩ kana nĩtwendete syana sya Ngai, ethĩwa nĩtũmwendete Ngai na nĩtũatĩĩaa mĩao yake.
3 Nũndũ kũũ nĩkw’o kũmwenda Ngai: tũkwatae mĩao yake; na mĩao yake ti mũio mũito,
4 nĩkwĩthĩwa kĩla mũndũ ũtw’ĩkĩte mwana wa Ngai nũkĩlĩtye nthĩ vinya. Na nũndũ wa mũĩkĩĩo witũ nĩtũkĩlĩtye nthĩ vinya.
5 Nũũ ũla ũtonya kũkĩlya nthĩ vinya? Tyo ũla ũĩkĩĩaa kana Yesũ nĩ Mwana wa Ngai?
6 Yesũ Klĩsto nĩwe wookie kwĩsĩla kĩw’ũ na nthakame; ndaaũka kwĩsĩla kĩw’ũ kyoka, ĩndĩ kwĩsĩla kĩw’ũ na nthakame. Na veva nũkũsĩĩaa, nĩkwĩthĩwa veva nĩw’o ũla w’o.
7 Nũndũ kwĩ syĩndũ itatũ syumasya ũkũsĩ, nasyo nĩ:
8 veva na kĩw’ũ na nthakame; na syonthe ikũsĩĩaa ũndũ ũmwe.
9 Ethĩwa nĩtũkwĩtĩkĩla ũkũsĩ wa andũ, ũkũsĩ ũla wumĩte kwa Ngai nĩ mũnene. Nĩkwĩthĩwa ũũ nĩw’o ũkũsĩ ũla Ngai wumasya, ĩĩ, ũkũsĩ ũla wumĩtye ĩũlũ wa Mwana wake.
10 Mũndũ ũla ũmũĩkĩĩaa Mwana wa Ngai e na ũkũsĩ nthĩnĩ wake. Mũndũ ũla ũtamũĩkĩĩaa Ngai, nũmũtw’ĩte Ngai mũkengani, nũndũ ndaĩkĩĩaa ũkũsĩ ũla wumĩtw’e nĩ Ngai ĩũlũ wa Mwana wake.
11 Na ũũ nĩw’o ũkũsĩ, kana Ngai nĩwatũnengie thayũ wa tene na tene, na thayũ ũsu wĩ nthĩnĩ wa Mwana wake.
12 Ũla wĩtĩkĩlĩtwe nĩ Mwana e na thayũ ũsu; na ũla ũtetĩkĩlĩtwe nĩ Mwana wa Ngai nde na thayũ ũsu.
13 Nĩmũandĩkĩa maũndũ aa nĩ kana mũmanye kana mwĩ na thayũ wa tene na tene, inyw’ĩ ala mwĩthĩawa na mũĩkĩĩo nthĩnĩ wa ĩsyĩtwa ya Mwana wa Ngai.
14 Na ũũ nĩw’o mũĩkĩĩo ũla twĩ naw’o nthĩnĩ wake, kana twavoya kĩndũ o na kĩva kwosana na kwenda kwake, nũtwĩthukĩĩasya.
15 Na ethĩwa nĩtwĩsĩ kana nũtwĩthukĩĩasya twavoya kĩndũ o na kĩva, nĩtwĩsĩ kana tũkakwata syĩndũ ila twavoya, nũndũ nĩwe tũmũvoyete syĩndũ isu.
16 Ethĩwa mũndũ o na wĩva nĩwoona mwana-a-asa wake ayĩka naĩ ĩtaetae kĩkw’ũ, navoye, na Ngai akamũnenga mwana-a-asa ũsu thayũ, ĩĩ, ala matekaa naĩ ĩetae kĩkw’ũ. Ve naĩ ĩetae kĩkw’ũ. Na nyie ndiũmwĩa avoye ĩũlũ wa naĩ ta ĩsu.
17 Maũndũ onthe mate malũngalu nĩ naĩ, ĩndĩ ve naĩ ĩtaetae kĩkw’ũ.
18 Nĩtwĩsĩ kana kĩla mũndũ ũtw’ĩkĩte mwana wa Ngai ndaendeea kwĩka naĩ, ĩndĩ Mwana wa Ngai nũmũsũvĩaa, na ũla mũthũku ndatonya kũmwĩka ũndũ.
19 Nĩtwĩsĩ kana tumanĩte na Ngai, ĩndĩ nthĩ yonthe yĩ ungu wa vinya wa ũla mũthũku.
20 Ĩndĩ nĩtwĩsĩ kana Mwana wa Ngai nĩwookie, na nũtũnengete ũĩ nĩ kana twĩthĩwe tũtonya kũkwata ũmanyi ĩũlũ wa ũla wa w’o. Na twĩ ngwatanĩo vamwe na ũla wa w’o, kwĩsĩla Mwana wake Yesũ Klĩsto. Ũsu nĩwe Ngai wa w’o na thayũ wa tene na tene.
21 Inyw’ĩ syana nini, ĩvathanei na mĩvw’anano.
