2 Yoana 1:1-13
1 Nyie mũtumĩa, kwa mũndũ mũka ũla mũnyuve na kwa syana syake, ila nĩsyendete mũno, na tinyie nĩ nyioka, ĩndĩ o na onthe ala mamanyĩte ũla w’o,
2 nũndũ wa ũw’o ũla wĩkalaa nthĩnĩ witũ, na wĩendeea kwĩthĩwa nthĩnĩ witũ tene na tene.
3 Na tũkeethĩwa na ũseo mwingĩ, na tei, na mũuo kuma kwa Ngai, ũla nĩwe Asa, na kuma kwa Yesũ Klĩsto, Mwana wa Asa, o vamwe na ũw’o na wendo.
4 Nĩ na ũtanu mwingĩ nũndũ nĩnĩmanyie kana syana imwe syaku niendaa nthĩnĩ wa ũla w’o, o tondũ Asa watwĩaĩe.
5 Kwoou nĩkũandĩkĩa, mũndũ mũka, ngĩkwĩsũva twendane ithyĩ kwa ithyĩ. (Ndiũkũandĩkĩa ĩũlũ wa mwĩao mweũ, ĩndĩ nĩkũandĩkĩa ĩũlũ wa mwĩao ũla twaĩ naw’o kuma mwambĩlĩlyonĩ.)
6 Na ũũ nĩw’o wendo, tũendae kwosana na mĩao yake. Na ũũ nĩw’o mwĩao, o tondũ mweewie kuma mwambĩlĩlyonĩ, kana mwaĩle kũendaa nthĩnĩ waw’o.
7 Nũndũ akengani aingĩ nĩmaumĩlĩte ĩũlũ wa nthĩ, ala matetĩkĩlaa kana Yesũ Klĩsto ookie e na mwĩĩ. Asu nĩmo mũkengani na nthũ ya Klĩsto.
8 Ĩsũvĩei ene nĩ kana mũikasye syĩndũ ila twatethisye wĩa nĩ kana syĩthĩwe vo, ĩndĩ mũkwate ĩtuvi yonthe.
9 Mũndũ o na wĩva ũla welelũkaa na ndekalaa momanyĩsyonĩ ma Klĩsto ndetĩkĩlawa nĩ Ngai. Mũndũ ũla wĩkalaa momanyĩsyonĩ aa nĩwe wĩtĩkĩlawa nĩ Asa na Mwana.
10 Ethĩwa mũndũ o na wĩva nũkũka kwenyu ate na momanyĩsyo aa, mũikamũthokye mĩsyĩ kwenyu o na mũikamũkethye.
11 Nũndũ mũndũ ũla ũmũkethasya e mũamba nake mekonĩ make mathũku.
12 O na kau nĩ na maũndũ maingĩ ma kũmũandĩkĩa, ndikwenda kũmaandĩka ĩthangũnĩ na ingi, ĩndĩ nĩ na wĩkwatyo wa kũka kwenyu na kũneena nenyu ũthyũ kwa ũthyũ nĩ kana ũtanu wenyu wĩthĩwe wĩ mwingĩ.
13 Syana sya mwĩĩtu-a-asa waku ũla mũnyuve nĩsyaũkethya.
