Meko ma Atũmwa 17:1-34
17 Na mesĩla Amimbivoli na Avolonia na mavika Thesalonika, vala vaĩ na ĩsinakoke ya Ayuti.
2 Kwoou o tondũ Vaulo weekaa nĩwalikile vala maĩ, na kwa ĩvinda ya savato itatũ nĩwasũanĩie namo aitũmĩa Maandĩko,
3 na nĩwaeleisye na aĩkĩĩthya kwĩsĩla maandĩko kana waĩ ũndũ wa vata Klĩsto athĩne na aithayũũkw’a. Aisye atĩĩ: “Ũsu nĩwe Klĩsto, na nĩwe Yesũ ũla ngũmũtavya ĩũlũ wake.”
4 Kwondũ wa ũu, amwe moo matw’ĩka etĩkĩli na mambĩĩa kũendany’a na Vaulo na Sila, na ũu now’o ĩkomano ĩnene ya Akiliki ala mathaithaa Ngai vamwe na aka aingĩ me nguma meekie.
5 Ĩndĩ Ayuti nĩmakwatiwe nĩ kĩwĩu na moombany’a aũme amwe athũku ala molũũlaa sokonĩ, na maseũvya nguthu na maete ithokoo ndũanĩ. Nĩmavithũkĩie nyũmba ya Yasoni mayenda kũmaumaalya Vaulo na Sila mamatwae nguthunĩ ĩsu.
6 Na malea kũmethĩa, mamũkusũlany’a Yasoni na ana-a-asa amwe na mamatwaa kũla kwĩ anene ma ndũa, na maneenaa na wasya mũnene, makyasya: “Ala andũ maetete ithokoo mbingĩ ĩũlũ wa nthĩ yonthe me kũũ o nakw’o,
7 na Yasoni amathokya kwake. Andũ aa onthe nĩmaleanaa na mĩao ya Kaisali, makyasya kana kwĩ mũsumbĩ ũngĩ wĩtawa Yesũ.”
8 Yĩla ĩkomano na anene ma ndũa meewie maũndũ asu, nĩmatelemile;
9 na ĩtina wa kwosa mbesa ila syendekaa kuma kwa Yasoni na ala angĩ nĩ kana mathaw’e, mamaeka mathi.
10 Na kwatuka oou, ana-a-asa meea Vaulo na Sila mathi Velia. Yĩla mavikie kũu, malika ĩsinakokenĩ ya Ayuti.
11 Na andũ ma kũu nĩmendaa kwĩmanyĩsya mũno kwĩ ala ma Thesalonika, nũndũ nĩmeetĩkĩlile ĩla ndeto na mea maingĩ, na nĩmakunĩkĩlaa Maandĩko kĩla mũthenya nĩ kana mamanye kana ũu nĩw’o maũndũ asu mailye.
12 Na kwoou, aingĩ moo matw’ĩka etĩkĩli, na ũu now’o aka aingĩ Akiliki me nguma vamwe na aũme amwe meekie.
13 Ĩndĩ yĩla Ayuti kuma Thesalonika mamanyie kana ndeto ya Ngai nĩyatavanaw’a Velia nĩ Vaulo, nĩmookie kw’o mookĩlya ithokoo na mathatya ĩkomano.
14 Na vau kwa vau ana-a-asa mamwĩa Vaulo athi ũkanganĩ, ĩndĩ Sila na Timotheo matiwa.
15 Ĩndĩ ala mamumaaĩtye Vaulo mathi nake nginya Athene, na mauma kũu ĩtina wa Vaulo kũmeaĩa kana Sila na Timotheo maĩle kũka kũla ũĩ mĩtũkĩ ũndũ vatonyeka.
16 Na aendeee kũmeteela kũu Athene, Vaulo nĩwathatie yĩla woonie kana ndũa ĩsu yausũĩte mĩvw’anano.
17 Kwoou nĩwambĩĩie kũsũanĩa na Ayuti ĩsinakokenĩ vamwe na andũ angĩ ala mamũthaithaa Ngai, o na kĩla mũthenya sokonĩ nĩwasũanĩaa na ala weethĩa.
18 Ĩndĩ andũ amwe oĩ ma kĩkundi kya Aevikulio na Asitoiko mambĩĩa kũkananĩa nake, na amwe maasya: “Mũndũ ũũ wa kũvũa mũnuka eenda kũtwĩa ata?” Namo angĩ makyasya: “Eoneka nĩ mũtavany’a wa ngai ngeni.” Maasya ũu nũndũ atavanasya ũvoo mũseo ĩũlũ wa Yesũ na ĩũlũ wa ũthayũũkyo.
19 Kwoou mamũkwata na mamũtwaa Aleovako, makyasya: “Nũtonya kũtũtavya ũmanyĩsyo ũũ mweũ ũũneena ĩũlũ waw’o nĩ mwaũ?
20 Nĩkwĩthĩwa wĩtũtavya maũndũ tũtaamew’a, na nĩtũkwenda kũmaelewa nesa.”
21 Kwa w’o, Aathene onthe na aeni ala mekalaa kw’o mayatũmĩaa ĩvinda yoo ya kũthũmũa ũndũnĩ ũngĩ eka kũneenea kana kwĩthukĩĩsya maũndũ meũ.
22 Kwoou Vaulo nĩwaũngamie katĩkatĩ wa Aleovako, na asya:
“Andũ ma Athene, nĩngwona maũndũnĩ onthe mwĩthĩawa na kĩkĩo kingĩ kwa ngai* kwĩ andũ ala angĩ.
23 Kwa ngelekany’o, yĩla nĩĩvĩtĩte nĩsyaĩtye syĩndũ syenyu sya ũthaithi, nĩnonie kĩthembeo kĩandĩkĩtwe ‘Kwa Ngai Ũtesĩkĩe.’ Kwoou, kĩla mũthaithaa mũtesĩ, kĩu nĩkyo ngũmũtavya.
24 Ngai ũla woombie nthĩ na syĩndũ syonthe ila syĩ nthĩnĩ wayo, ũla nĩwe Mwĩaĩi wa matu na nthĩ, ndekalaa makalũnĩ maseũvĩtw’e na moko;
25 o na ndathũkũmawa na moko ta wĩ na vata wa kĩndũ, nũndũ we mwene nĩwe ũnengae andũ onthe thayũ na mĩthũmũ na syĩndũ syonthe.
26 Na nĩwe woombie mbaĩ syonthe sya andũ kuma mũndũnĩ ũmwe nĩ kana syĩkale ĩũlũ wa nthĩ yonthe, na atw’a nĩ mavinda meva ala manyuvĩtwe, o na eekĩa mĩvaka ya kũla andũ makekalaa,
27 nĩ kana mamũmanthe Ngai, o na ethĩwa meĩka kũvavata mamwone, nũndũ nde vaasa na kĩla ũmwe witũ.
28 Nĩkwĩthĩwa twĩ na thayũ nũndũ wake, na nĩtũendaa na twĩ kw’o, o tondũ atili amwe menyu ma mbathi maĩtye, ‘Nũndũ o naitũ twĩ syana syake.’*
29 “Kwoou nũndũ twĩ syana sya* Ngai, tũyaĩle kũsũanĩa kana Ngai avw’anene na thaavu kana vetha kana ĩvia, ta kĩndũ andũ masũanĩie na maseũvya.
30 Kwa w’o, ĩvinda yĩla andũ matamwĩsĩ Ngai nĩwekalile ta ũtene; ĩndĩ yu etavya andũ onthe kĩla vandũ kana nĩmaĩle kwĩlila.
31 Nũndũ nũtw’ĩte mũthenya ũla ũkasilĩla nthĩ yonthe na ũlũngalu kwĩsĩla mũndũ ũla ũnyuvĩte, na nũnenganĩte ũĩkĩĩthyo kwa andũ onthe kwa kũmũthayũũkya.”
32 Na yĩla meewie ĩũlũ wa ũthayũũkyo wa akw’ũ, amwe moo mambĩĩa kũvũthĩĩsya, namo angĩ masya: “Tũkakwĩthukĩĩsya ĩngĩ ũndũnĩ ũsu.”
33 Kwoou Vaulo amatia,
34 ĩndĩ aũme amwe mamũatĩĩa na matw’ĩka etĩkĩli. Katĩ woo vaĩ Ndionisio, ũla waĩ mũsili wa koti wa Aleovako, na mũndũ mũka weetawa Ndamali, na andũ angĩ.
