Meko ma Atũmwa 4:1-37
4 Na Vetelo na Yoana maendeee kũneena na andũ, athembi, kavuteni wa ĩkalũ, na Asatukai mooka vala maĩ.
2 Na nĩmathatĩte mũno nũndũ atũmwa nĩmamanyĩasya andũ, na nĩmatavanasya ũtheinĩ ĩũlũ wa kũthayũũka kwa Yesũ.
3 Kwoou mamakwata na mamavingĩa nginya ũnĩ wake, nũndũ kwaĩ kũnatuka.
4 Ĩndĩ aingĩ katĩ wa ala methukĩĩisye ndeto syoo maĩkĩĩa, na ũtalo wa aũme wavika ta 5,000.
5 Na ũnĩ wake atongoi, atumĩa, na aandĩki moombana vamwe Yelusaleme,
6 me vamwe na Anasi mũnene wa athembi, Kaiava, Yoana, Alekisanda, na andũ onthe ma mũsyĩ wa mũnene wa athembi.
7 Na mamaũngamya Vetelo na Yoana katĩ woo na mambĩĩa kũmakũlya, makyasya: “Mwĩkie ũndũ ũũ na vinya wĩva kana ĩsyĩtwanĩ yaũ?”
8 Nĩvo ĩndĩ Vetelo ausũĩtwe nĩ veva mũtheu, wameie:
“Atongoi ma andũ, na atumĩa,
9 ethĩwa ũmũnthĩ twĩkũlw’a ĩũlũ wa ũndũ mũseo ũla ũneekiwe mũndũ kyonze, na mwĩenda kũmanya ũla ũnamũvoisye mũndũ ũũ,
10 ekai inyw’onthe o vamwe na andũ onthe ma Isilaeli mamanye kana ĩsyĩtwanĩ ya Yesũ Klĩsto Mũnasaleti, ũla mũnamũaĩe mũtĩnĩ ĩndĩ Ngai amũthayũũkya, mũndũ ũũ nũũngamĩte vaa mbee wenyu e mũima.
11 Ũsu nĩwe ‘ĩvia yĩla yavũthiw’e nĩ inyw’ĩ aki, ĩndĩ nĩyo yĩtw’ĩkĩte ĩvia ĩnene ya kĩkotonĩ.’
12 O na ĩngĩ, kũi ũtangĩĩo kwĩsĩla ũngĩ o na wĩva, nũndũ vai ĩsyĩtwa yĩngĩ yĩnengetwe andũ ĩtheo wa ĩtu yĩla no nginya tũtangĩĩwe kwĩsĩla kwayo.”
13 Na yĩla moonie ũkũmbaũ wa Vetelo na Yoana, na mamanya kana maĩ andũ mate asomu na mate nguma, nĩmaseng’ie. Na mambĩĩa kũelewa kana maneethĩawa vamwe na Yesũ.
14 Na nũndũ nĩmamwene mũndũ ũla waĩ anavow’a aũngamĩte vamwe namo, vai ũndũ maĩ matonya kwasya.
15 Kwoou mameaĩa maumaale nza wa nyũmba ĩla yoombanĩawa nĩ Nzama ya Ayuti, na mambĩĩa kũsamana,
16 makyasya: “Twĩĩkana ata na andũ aa? Nũndũ kwa w’o nĩmekĩte kyama kĩnene, na ekali onthe ma Yelusaleme nĩmakĩsĩ, na tũitonya kũkĩkaĩa.
17 Na nĩ kana ũndũ ũũ ndũkaendeee kũnyaĩĩka andũnĩ, ekai tũmatĩsye na tũimea maikaneene na mũndũ o na ũmwe ĩngĩ ĩsyĩtwanĩ yĩu.”
18 Na nĩ kana mamatĩsye, mameta na mameaĩa maikaneene ũndũ o na ũmwe kana kũmanyĩsya ĩsyĩtwanĩ ya Yesũ.
19 Ĩndĩ Vetelo na Yoana mamasũngĩa, mamea: “Ethĩwa nĩ ũndũ waĩlĩte methonĩ ma Ngai kũmwĩthukĩĩsya inyw’ĩ vandũ va kũmwĩthukĩĩsya Ngai, tw’ai inyw’ĩ ene.
20 Ĩndĩ ithyĩ, tũitonya kũeka kũneena ĩũlũ wa maũndũ ala twonete na kwĩw’a.”
21 Kwoou ĩtina wa kũmatĩsya ĩngĩ, mamathasya, nũndũ mayaaona kĩtumi kya kũmasilĩla. O na ĩngĩ, nĩmakĩaa andũ, nĩkwĩthĩwa onthe nĩmamũtaĩaa Ngai nũndũ wa maũndũ ala meekĩkĩte.
22 Nũndũ mũndũ ũla wavoetw’e kwa nzĩa ya kyama aĩ na myaka mbee wa 40.
23 Ĩtina wa kũthaw’a, nĩmaendie kũla kwĩ amanyĩw’a ala angĩ na mamatavya maũndũ ala maĩ manatavw’a nĩ anene ma athembi na atumĩa.
24 Yĩla meewie maũndũ asu mamũkĩlĩlya Ngai mawasya moo na ngoo ĩmwe, makyasya:
“Mwĩaĩi Mũsumbĩ Mũnene, we nue woombie ĩtu na nthĩ na ũkanga na syĩndũ syonthe ila syĩ nthĩnĩ wasyo,
25 na nue waneenie kwa nzĩa ya veva mũtheu kwĩsĩla kanyw’a wa ũmae waitũ Ndaviti, mũthũkũmi waku, ũkyasya: ‘Nĩkĩ mbaĩ syĩ na kĩthokoo, na nĩkĩ andũ meũsũanĩa maũndũ ma mana?
26 Asumbĩ ma nthĩ nĩmaũngamie, na atongoi nĩmoombanie vamwe mamũkĩlĩla Yeova na mwĩtĩkĩw’a mauta wake.’*
27 Nũndũ kwa w’o, Elote na Vondio Vilato na andũ ma mbaĩ ingĩ vamwe na andũ ma Isilaeli nĩmoombanie vamwe ndũanĩ ĩno mamũkĩlĩla mũthũkũmi waku mũtheu Yesũ, ũla wamwĩtĩkĩsye mauta,
28 nĩ kana meke ũndũ ũla kwĩsĩla kw’oko kwaku na ũtw’ĩo waku wavangie kuma tene kana ũkeethĩwa.
29 Na yu, Yeova, sisya motĩsyo moo, na ũinenga ngombo syaku ũtonyi wa kũendeea kũneena ndeto yaku na ũkũmbaũ w’onthe,
30 na ũitambũũkya kw’oko kwaku kwondũ wa kũvosya na kwĩka syama na maũndũ ma ũsengy’o kwĩsĩla ĩsyĩtwa ya mũthũkũmi waku mũtheu, Yesũ.”
31 Na ĩtina wa kũvoya na kĩthing’ĩĩsyo,* vala moombanĩe vathingithw’a, na onthe mausũwa nĩ veva mũtheu na maneena ndeto ya Ngai me na ũkũmbaũ.
32 O na ĩngĩ, ĩkomano ya andũ ala matw’ĩkĩte etĩkĩli yaĩ na ngoo ĩmwe, na vai ũmwe woo waĩ atonya kwasya kĩndũ o na kĩva katĩ wa ila wĩ nasyo nĩ kyake mwene, ĩndĩ syĩndũ ila maĩ nasyo syaĩ syoo me onthe.
33 Na atũmwa nĩmaendeeie kumya ũkũsĩ ĩũlũ wa ũthayũũkyo wa Mwĩaĩi Yesũ me na vinya mwingĩ, na ũseo mwingĩ waĩ ĩũlũ woo onthe kwa nzĩa nene.
34 Na vaiĩ ũmwe woo waanyivĩwa, nũndũ onthe ala maĩ na mĩũnda na nyũmba nĩmaithooasya na kũete kĩla makwata,
35 na maikĩia maaũnĩ ma atũmwa. Na ĩndĩ onthe mainengwa, kĩla ũmwe kwosana na vata ũla wĩ naw’o.
36 Na Yosevu, ũla atũmwa mamwĩtaa Valanava (ũalyũlo wayo nĩ, “Mwana wa Ũkiakisyo”), Mũlivai wasyaĩwe Kuvolo,
37 aĩ na kĩsio kya mũũnda, na nĩwakĩthooisye na aete mbesa ila wakwatie asiia maaũnĩ ma atũmwa.
