Alomi 12:1-21
12 Kwoou, ana-a-asa nĩmwĩsũva nũndũ wa ĩnee ya Ngai, mũnengane mĩĩ yenyu yĩthĩwe nthembo yĩ thayũ, ntheu na yĩtĩkĩlĩka kwa Ngai, naw’o nĩ ũthũkũmi mũtheu vamwe na ũtonyi wenyu wa kũsũanĩa.
2 Na ekai kwĩthĩwa mũilye ta nthĩ ĩno, ĩndĩ mũalyũke kwa kwĩthĩwa na kĩlĩko kyeũ, nĩ kana mwĩyĩĩkĩĩthye inyw’ĩ ene kwenda kwa Ngai kũla kũseo na kwĩtĩkĩlĩka na kwĩanĩu.
3 Nũndũ kwĩsĩla ũseo mwingĩ ũla nĩnengetwe, nĩmwĩa kĩla ũmwe katĩ wenyu ndakesũanĩe mũno kũvĩtũka ũndũ waĩle kwĩsũanĩa, ĩndĩ asũanĩe nĩ kana ethĩwe na kĩlĩko, kĩla ũmwe o ũndũ Ngai ũmũnengete* kĩthimo kĩana kya mũĩkĩĩo.
4 Nũndũ o tondũ twĩthĩawa na mwĩĩ ũmwe wĩ na mamutha maingĩ, ĩndĩ mamutha asu onthe maitethasya wĩa ũmwe,
5 o ta ũu, o na kau twĩ aingĩ, twĩ mwĩĩ ũmwe twĩ ngwatanĩo vamwe na Klĩsto, ĩndĩ kĩla ũmwe waitũ nĩ ĩmutha ya ũla ũngĩ.
6 Kwoou nũndũ twĩ na mĩthĩnzĩo yĩ kĩvathũkany’o kwosana na ũseo mwingĩ ũla tũnengetwe, ethĩwa nĩ wathani, ekai twathane kwosana na ũndũ mũĩkĩĩo witũ wĩana;
7 kana ethĩwa nĩ ũthũkũmi, ekai tũendeee kwĩthĩwa ũthũkũminĩ ũsu; kana ethĩwa nĩ ũla ũmanyĩasya, ekai aendeee kũmanyĩsya;
8 kana ũla ũthangaasya,* nathangaasye;* na ũla ũnenganae* ekai anengane na ũlau, na ũla ũũngamĩaa* ekai eke ũu na kĩthito;* nake ũla wĩw’ĩaa tei nĩeke ũu na ũtanu.
9 Ekai wendo wenyu wĩthĩwe ũte na wangangany’a. Menai vyũ ũla ũthũku; lũmany’ai na ũla ũseo.
10 Wendonĩ wa ana-a-asa ĩthĩwai na wendo mũuu kĩla ũmwe na ũla ũngĩ. Na nthĩnĩ wa kũnengane ndaĩa, ĩthĩwai mũtongoetye.*
11 Ĩthĩwai mwĩ athangaau,* ti atulu. Akanai vevanĩ. Mũthũkũmei Yeova.
12 Tanai wĩkwatyonĩ. Ũmĩĩsyai yĩla mwĩ thĩnanĩ. Voyai na kĩthing’ĩĩsyo.
13 Aanai na ala atheu kwosana na mavata moo. Endeeai kũthokasya aeni na ũlau.
14 Endeeai kũmaathima ala mamũthĩnasya; athimai na mũikaumanĩe.
15 Tanai na ala meũtana; ĩai na ala mekũĩa.
16 Monei andũ ala angĩ o ũndũ mwĩyonaa ene; mũikasũanĩe maũndũ ma mĩtũlyo,* ĩndĩ mũtongoew’e nĩ maũndũ ma wĩnyivyo. Mũikethĩwe oĩ methonĩ menyu ene.
17 Mũikeyĩĩvanĩsye ũthũku kwa ũthũku kwa mũndũ o na wĩva. Tatai kwĩka kĩla kyonekaa kĩ kĩseo nĩ andũ onthe.
18 Na ethĩwa nĩvatonyeka, ngalĩ ĩ yenyu, ĩthĩwai na mũuo na andũ onthe.
19 Mũikeyĩĩvanĩsye, endwa, nengai ũthilĩku* mwanya; nũndũ nĩkũandĩkĩtwe, “‘Ũĩvanĩsyo nĩ wakwa; ngaĩvanĩsya,’ easya ũu Yeova.”
20 Ĩndĩ “ethĩwa mũmaitha waku e na nzaa, mũnenge lĩu aye; ethĩwa e na waũni, mũnenge kĩndũ anyw’e; nũndũ kwa kwĩka ũu ũkoombĩĩa makaa me mwaki mũtwenĩ wake.”*
21 Mũiketĩkĩle mũkĩlw’e vinya nĩ ũthũku, ĩndĩ endeeai kũkĩlya ũthũku vinya kwa kwĩka ũseo.
Maelesyo ma kwongeleela
^ Kana “ũmũtw’ĩlĩte; ũmũaĩe.”
^ Kana “ũthuthasya.”
^ Kana “nathuthye.”
^ Kana “umasya.”
^ Kana “ũtongoeasya.”
^ Kana “na kĩthing’ĩĩsyo.”
^ Kana “ma mbee.”
^ Kana “na kĩthito.”
^ Kana “mũikamanthe maũndũ matũlu.”
^ Ũu nĩ kwasya, ũthilĩku wa Ngai.
^ Ũu nĩ kwasya, nĩ kana ũmwololosye, na wũmũ wake ũtweke.
