Luka 2:1-52
2 Na mĩthenyanĩ ĩsu mwĩao nĩwaumie kwa Kaisali Aukusito nĩ kana andũ nthĩ yonthe maandĩkĩthw’e.
2 (Kũandĩkĩthw’a kũu kwa mbee kweethĩiwe yĩla Kwilinio waĩ ngavana wa Silia.)
3 Na andũ onthe mathi kũandĩkĩthw’a, kĩla ũmwe ndũanĩ yake.
4 Yosevu o nake nĩwaumie Kalilii, ndũanĩ ya Nasaleti, athi Yutia ndũanĩ ya Ndaviti ĩla yĩtawa Mbetheleemu, nũndũ aĩ wa mũsyĩ wa Ndaviti.
5 Na athi kũandĩkĩthw’a vamwe na Meli, ũla waĩ anamũtwaa nũndũ nĩmeevaanĩtye, nake aĩ vakuvĩ kũsyaa.
6 Na kweethĩwa yĩla maĩ kũu, ĩvinda yake yavika ya kũsyaa.
7 Na asyaa kana kake ka mbee kavĩsĩ na akavw’ĩka ngũa na akakomya mũvalatĩnĩ,* nũndũ nyũmbanĩ ya aeni vayaĩ mwanya woo.
8 O na kĩsionĩ kĩu kwaĩ aĩthi mekalaa nza maisyaĩĩsya indo syoo ũtukũ.
9 Na o mĩtũkĩ mũlaĩka wa Yeova amaumĩlĩĩla na aũngama mbee woo, na kyeni kya ũtheu mũtisu wa Yeova kyamamulĩka na makwatwa nĩ wia mwingĩ.
10 Ĩndĩ mũlaĩka amea: “Mũikakĩe, nũndũ sisyai! nĩmũtavya ũvoo mũseo ũla ũkaetee andũ onthe ũtanu mũnene.
11 Nũndũ ũmũnthĩ ndũanĩ ya Ndaviti nĩkũsyaiwe mũtangĩĩi, nake nĩ Klĩsto ũla Mwĩaĩi.
12 Na ũũ nĩw’o wonany’o kwenyu: Nĩmũkwĩthĩa kana kavw’ĩkĩtwe ngũa na kakomete mũvalatĩnĩ.”
13 Na o mĩtũkĩ nguthu nene ya ita sya ĩtunĩ yeethĩwa vamwe na ũla mũlaĩka, ĩkĩmũtaĩa Ngai na kwasya:
14 “Ngai nataĩwe kũu ĩũlũ mũno, na mũuo wĩthĩwe ĩũlũ wa nthĩ andũnĩ ala mamwendeeasya.”*
15 Kwoou yĩla alaĩka mamatiie na masyoka ĩtunĩ, aĩthi maneenany’a ene kwa ene, makyasya: “No nginya tũthi Mbetheleemu tũkone ũndũ ũla weekĩka, ũla Yeova watũmanyĩthya.”
16 Na mathi na mĩtũkĩ na meethĩa Meli vamwe na Yosevu, na kala kana kakomete mũvalatĩnĩ.
17 Yĩla moonie ũu, matavany’a ũvoo ũla matavĩtw’e ĩũlũ wa kana kau.
18 Na onthe ala meewie maseng’a nũndũ wa maũndũ ala mataviw’e nĩ aĩthi,
19 ĩndĩ Meli ambĩĩa kwia maũndũ asu kĩlĩkonĩ, na kũmasũanĩa ngoonĩ yake.
20 Na ĩndĩ aĩthi masyoka maimũkumya Ngai na kũmũtaĩa nũndũ wa maũndũ onthe ala meewie na kwona, o tondũ matavĩtw’e.
21 Na ĩtina wa mĩthenya nyanya, ĩvinda yavika ya kwaĩka kana kau, nako keetwa Yesũ, ĩsyĩtwa yĩla yanenganĩtwe nĩ mũlaĩka o na mbee wa katanaitavwa.
22 Na ĩngĩ, yĩla ĩvinda yavikie ya kũthew’a kwoo kwosana na Mĩao ya Mose, mambata na Yesũ Yelusaleme makamũnengane kwa Yeova,
23 o tondũ kũandĩkĩtwe Mĩaonĩ ya Yeova: “Kĩla mũsyawa wa mbee mũndũũme* aĩle kwĩtwa mũtheu wa Yeova.”
24 Na maumya nthembo kwosana na ũndũ Mĩao ya Yeova yaĩtye: “ndumbũ ilĩ kana maswii elĩ ma ĩvũĩ.”
25 Na sisya! Yelusaleme kwaĩ mũndũ weetawa Simeoni; mũndũ ũsu aĩ mũlũngalu na nĩwamũkĩaa Ngai, na nĩweeteele kũkiakiw’a kwa Isilaeli, na veva mũtheu waĩ ĩũlũ wake.
26 O na ĩngĩ, nĩwavuanĩw’e nĩ Ngai kwĩsĩla veva mũtheu kana ndakona kĩkw’ũ atonete Klĩsto wa Yeova.
27 Na atongoew’e nĩ veva mũtheu, ooka ĩkalũnĩ, na yĩla asyai ma Yesũ maetie kana kau nĩ kana mekane nako o tondũ kweekawa kwosana na Mĩao,
28 akosa kana kau mokonĩ make na amũtaĩa Ngai na asya:
29 “Yu, Mwĩaĩi Mũsumbĩ Mũnene, eka ngombo yaku ĩthi na mũuo kwosana na ũndũ waneenie,
30 nũndũ metho makwa nĩmoona nzĩa yaku ya ũtangĩĩo
31 ĩla ũseũvĩtye mbee wa metho ma andũ onthe,
32 kyeni kya kũveta kĩndũ kĩla kĩvw’ĩkĩte metho ma andũ ma mbaĩ ingĩ, na ũtheu mũtisu kwa andũ maku Isilaeli.”
33 Na ĩthe wa kana kau na inyia wako maendeea kũseng’a nũndũ wa maũndũ ala maneenawa ĩũlũ wako.
34 O na ĩngĩ, Simeoni amaathima na amwĩa Meli inyia wa kana kau atĩĩ: “Sisya! Kana kaa nĩkanyuvĩtwe kwondũ wa kũvalũka na kũkĩla ĩngĩ kwa andũ aingĩ ma Isilaeli na kwondũ wa wonany’o ũla ũkaneenewa naĩ
35 (ĩĩ, ũvyũ mũasa ũkaũtonya), nĩ kana mosũanĩo ma ngoo mbingĩ matonye kũvuanw’a.”
36 Na kwaĩ mwathani mũndũ mũka weetawa Ana, mwĩĩtu wa Vanueli wa mbaĩ ya Aseli. Mũndũ mũka ũsu aĩ mũkũũ na ekalile na mũũme wake myaka mũonza kuma matwaana,*
37 nake aĩ ndiwa na aĩ na myaka 84. Ndatĩaa kũthi ĩkalũnĩ, aithũkũma ũthũkũmi mũtheu ũtukũ na mũthenya vamwe na kũtĩĩa kũya na kũvoya na kĩthing’ĩĩsyo.
38 Na saa o ũsu athengeea na ambĩĩa kũmũtũngĩa Ngai mũvea na kũneena ĩũlũ wa kala kana, aitavya onthe ala meeteele wovosyo wa Yelusaleme.
39 Kwoou ĩtina wa kwĩka maũndũ onthe kwosana na Mĩao ya Yeova, masyoka Kalilii ndũanĩ yoo ya Nasaleti.
40 Na kana kau kaendeea kwĩana na kwĩthĩwa na vinya, kausũĩtwe nĩ ũĩ, na Ngai nĩwaendeeie kũkony’a ũseo.
41 Na asyai mako nĩmaendaa Yelusaleme kĩla mwaka ĩvinda ya mboka ya Vasaka.
42 Na yĩla waĩ na myaka 12, mambata Yelusaleme, kwosana na ũndũ kweekawa ĩvinda ya mboka.
43 Na yĩla mĩthenya ya mboka yathelile masyoka, na kavĩsĩ Yesũ katiwa Yelusaleme, na asyai mako mayaamanya.
44 Na nũndũ moonaa Yesũ ta waĩ andũnĩ ala maendanĩtye namo, mathi kyalo kya mũthenya mũima, na ĩndĩ mambĩĩa kũmũmantha andũnĩ moo ma mũsyĩ na andũnĩ ala meesene namo.
45 Ĩndĩ malea kũmwona, masyoka Yelusaleme na mamũmantha na kĩthito.
46 Na ĩtina wa mĩthenya ĩtatũ mamwĩthĩa ĩkalũnĩ, ekalĩte katĩ wa amanyĩsya aimethukĩĩsya na kũmakũlya makũlyo.
47 Ĩndĩ onthe ala mamwĩthukĩĩsye nĩmaseng’aa mũno nũndũ wa ũmanyi wake na mosũngĩo make.
48 Na yĩla asyai make mamwonie nĩmaseng’ie, na inyia wake amũkũlya: “Mwana wakwa, ũtwĩkie ũu nĩkĩ? Nyie na ĩthe waku tũthĩnĩkie mũno tũikũmantha.”
49 Ĩndĩ amakũlya: “Nĩkĩ mũũmanthaa? No mwĩĩsĩ kana no nginya nĩthĩwe nyũmbanĩ ya Asa wakwa?”
50 Ĩndĩ mayaaelewa nĩ kĩla wamatavasya.
51 Na ĩndĩ atheea namo na masyoka Nasaleti, na aendeea kũmenyivĩsya.* Na inyia wake aia nesa ndeto isu syonthe ngoonĩ yake.
52 Na Yesũ aendeea kwĩthĩwa na ũĩ na kwĩana na kwonw’a ũseo nĩ Ngai na andũ.
Maelesyo ma kwongeleela
^ Vala indo syĩkĩĩawa lĩu.
^ Kana “andũnĩ ala wendeeaw’a nĩmo.”
^ Ndeto kwa ndeto, “Kĩla mũndũũme wa mbee kũsyawa.”
^ Ndeto kwa ndeto, “kuma e mwĩĩtu ũtaakoma na mũndũũme.”
^ Kana “aendeea kwĩthĩwa e mwĩwi.”
