Luka 23:1-56
23 Na ĩkomano yonthe yookĩla na yamũtwaa kwa Vilato.
2 Na mambĩĩa kũmũsikata, makyasya: “Twĩthĩie mũndũ ũũ aimasya andũ kwa kũmavata kũĩva Kaisali koti, na akyasya we mwene nĩ Klĩsto mũsumbĩ.”
3 Nĩvo ĩndĩ Vilato wamũkũlilye ĩkũlyo yĩĩ: “We nue Mũsumbĩ wa Ayuti?” Nake amũsũngĩa: “We mwene nĩwaneena.”
4 Na ĩndĩ Vilato amea anene ma athembi na ĩkomano atĩĩ: “Ndikwona ĩvĩtyo mũndũnĩ ũũ.”
5 Ĩndĩ mathetheesya kwasya: “Nĩwũkĩlĩasya ithokoo andũnĩ kwa kũmanyĩsya Yutia yonthe, kwambĩĩa Kalilii nginya vaa.”
6 Yĩla Vilato weewie ũu akũlya kana mũndũ ũsu nĩ Mũkalilii.
7 Na yĩla waminie kũĩkĩĩthya kana aumĩte kĩsio kĩla kyasumbĩkĩtwe nĩ Elote, amũtũma asyoke kũla kwĩ Elote, nũndũ aĩ Yelusaleme mĩthenyanĩ ĩsu.
8 Yĩla Elote woonie Yesũ nĩwatanie mũno. Nũndũ kwa ĩvinda yĩasa nĩwendaa kũmwona Yesũ, nĩkwĩthĩwa nĩweew’ĩte maũndũ maingĩ ĩũlũ wake na eekwatasya nũkwona ayĩka kyama.
9 Kwoou ambĩĩa kũmũkũlya makũlyo maingĩ, ĩndĩ ndaamũsũngĩa.
10 Ĩndĩ anene ma athembi na aandĩki nĩmaũngamaa na kũmũsikata mathatĩte mũno.
11 Na ĩndĩ Elote vamwe na asikalĩ make mamũvũthĩĩsya, na Elote amũthekeea kwa kũmwĩkĩa ngũa mbanake na ĩndĩ amũtũma asyoke kũla kwĩ Vilato.
12 Elote na Vilato nĩmatumie ndũũ o mũthenyanĩ ũsu, nũndũ mbeenĩ maĩ amaitha.
13 Nĩvo ĩndĩ Vilato woombanisye vamwe anene ma athembi, atongoi, na andũ,
14 na amea: “Mũetie mũndũ ũũ kũla nĩĩ mũkyasya kana nũkũtuma andũ maleana na ũsumbĩ. Yu sisyai! nĩnamũkũlya makũlyo mbee wenyu, ĩndĩ katĩ wa maũndũ ala mũũweta ĩũlũ wake ndinona ũndũ ũtonya kũtuma asikatwa.
15 Vate nzika, o nake Elote ndanona ũndũ, nũndũ nĩwamũtũnga kũla tũĩ, na sisyai! vaiĩ ũndũ wĩkĩte ũtonya kũtuma oawa.
16 Kwoou nĩĩka kũmũvũa na ngĩmũthasya.”
17 *——
18 Ĩndĩ ĩkomano yonthe yaneena na wasya mũnene, na yasya: “Mina mũndũ ũũ,* na ũitũthaĩsya Valava!”
19 (Mũndũ ũsu ekĩtw’e yela nũndũ wa maũndũ ma kũleana na ũsumbĩ ala meekĩkĩte ndũanĩ, o vamwe na kũaana.)
20 Na Vilato aneena namo ĩngĩ, nũndũ nĩwendaa kũmũthasya Yesũ.
21 Na ĩndĩ mambĩĩa kũneena na wasya mũnene, makyasya: “Akoaĩwe mũtĩnĩ! Akoaĩwe mũtĩnĩ!”
22 Na aneena namo ya katatũ amea: “Nĩkĩ? Nĩ ĩvĩtyo yaũ mũndũ ũũ wĩkĩte? Ndinona ũndũ wĩkĩte ũtonya kũtuma oawa; kwoou nĩĩka kũmũvũa na ngĩmũthasya.”
23 Nĩvo ĩndĩ mathetheeisye mũno kũneena na wasya mũnene mayenda oawe,* nginya meethukĩĩw’a.
24 Kwoou Vilato aumya ũtwi asya ũndũ mekwenda nĩwĩkwe.
25 Na athasya mũndũ ũla mendaa athaw’e, ũla wekĩtw’e yela nũndũ wa kũleana na ũsumbĩ na kũaana, ĩndĩ amanenga Yesũ o tondũ mendaa.
26 Na mamũtwaĩte, nĩmakwatie mũndũ ũmwe weetawa Simoni kuma Kulene, aumĩte mĩũndanĩ, na mamwilĩĩla mũtĩ wa mathĩna* nĩ kana aũkue e ĩtina wa Yesũ.
27 Na andũ aingĩ nĩmamũatĩĩe, o vamwe na aka ala maendeee kwĩkũnanga nũndũ wa kyeva na kũĩa nũndũ wake.
28 Yesũ nĩwamethyũũĩe aka asu, na amea: “Eĩtu ma Yelusaleme, ekai kũĩa nũndũ wakwa. Vandũ va ũu ĩai kwondũ wenyu na kwondũ wa syana syenyu;
29 nũndũ sisyai! mĩthenya nĩyũkĩte yĩla andũ makasya, ‘Nĩ atanu aka ala ngũngũ, na ala mavu moo mataasyaa na ala nondo syoo itaaongwa!’
30 Na ĩndĩ makambĩĩa kwĩa iĩma, ‘Tũvalũkĩlei!’ na mayĩa tũlĩma, ‘Tũvw’ĩkei!’
31 Ethĩwa nĩmekwĩka maũndũ asu mũtĩ wĩ mwĩũ, kũkeethĩwa kũilye ata yĩla wĩũma?”
32 Na vaĩ aũme angĩ elĩ, atũli ma mĩao, ala matwaĩtwe makoawe vamwe nake.
33 Na yĩla mavikie vandũ vetawa Kĩng’ala, mamũathĩĩa mũtĩnĩ katĩ wa ala atũli ma mĩao, ũmwe kw’okonĩ kwake kwa aũme na ũla ũngĩ kw’okonĩ kwake kwa aka.
34 Ĩndĩ Yesũ aasya: “Asa maekee, nũndũ mayĩsĩ ũndũ mekwĩka.” O na nĩmakũnie kula nĩ kana maany’e ngũa syake.
35 Na andũ nĩmaũngamie masyaĩĩsye. Ĩndĩ atongoi mamũvũthĩĩsya, makyasya: “Nĩwatangĩĩe angĩ, eka etangĩĩe ethĩwa nĩwe Klĩsto wa Ngai, Ũla Ũnyuvĩtwe.”
36 O na asikalĩ nĩmamũthekeeie, na mathi vala ũĩ na mamũnenga mbinyu ngaatu,
37 makyasya: “Ethĩwa wĩ Mũsumbĩ wa Ayuti, ĩtangĩĩe.”
38 O na vaĩ kĩvwaũ ĩũlũ wake kĩla kyaandĩkĩtwe: “Ũũ nĩwe Mũsumbĩ wa Ayuti.”
39 Na ũmwe wa ala atũli ma mĩao ambĩĩa kũmũumanga, akĩmwĩa: “We nue Klĩsto, kana ti w’o? Ĩtangĩĩe na ũitũtangĩĩa o naitũ!”
40 Nake ũla ũngĩ amũkany’a, akĩmwĩa: “We ndũũkĩa Ngai o na vanini, nũndũ wasilĩlwa ũndũ ũmwe nake?
41 Na ũu nĩw’o vaĩlĩte kwĩthĩwa ĩũlũ witũ, nĩkwĩthĩwa twĩĩvanĩw’a ũndũ vaĩle nũndũ wa maũndũ ala tweekie; ĩndĩ mũndũ ũũ ndekĩte ũndũ o na ũmwe ũtaĩlĩte.”
42 Na ĩndĩ asya: “Yesũ, wĩndilikana yĩla wĩlika Ũsumbĩnĩ waku.”
43 Nake amwĩa: “Nĩ w’o ũmũnthĩ nĩngũkwĩa, ũkeethĩwa vamwe nakwa Ũseonĩ.”*
44 Na kwaĩ ta saa sita,* ĩndĩ kweethĩwa kĩvindu nthĩ ĩsu yonthe nginya ta saa kenda,*
45 nũndũ kũyaĩ kyeni kya syũa; na ĩndĩ vasia wa vala vandũ vatheu watembũkanĩla katĩ.
46 Na Yesũ aneena na wasya mũnene, asya: “Asa, nĩngũnengane veva wakwa mokonĩ maku.” Amina kwasya ũu, akw’a.*
47 Na yĩla mũnene wa asikalĩ woonie kĩla kyeekĩka, ambĩĩa kũmũkumya Ngai, akyasya: “Nĩ w’o, mũndũ ũũ eĩ mũlũngalu.”
48 Na ĩkomano yonthe yĩla yoombanĩte vau nĩ kana yĩsyaĩĩsye ũndũ ũsu, yenũka yĩkũnangĩte ithũi yoona maũndũ ala meekĩka.
49 Na onthe ala mamwĩsĩ maũngamĩte vaasa. O na aka ala mamũatĩĩte kuma Kalilii maĩ vau na nĩmoonie maũndũ asu.
50 Na sisya! vaĩ mũndũ ũmwe weetawa Yosevu, ũmwe wa ĩla Nzama ya Ayuti, na aĩ mũndũ mũseo na mũlũngalu.
51 (Mũndũ ũsu ndakũnĩte kula kũkwata mbau mũvango ũsu woo na kĩko kyoo.) Aĩ wa kuma Alimathia, ndũa ya Yutia, na nĩweeteele Ũsumbĩ wa Ngai.
52 Mũndũ ũsu nĩwaendie mbee wa Vilato na amwĩtya mwĩĩ wa Yesũ.
53 Na aũtheesya na aũlinga na kĩtambaa kĩseo kya katane, na awia mbũanĩ yasĩtwe ĩvianĩ, ĩla ĩtaĩ yaaiwa mũndũ.
54 Na kwaĩ mũthenya wa Kwĩyũmbany’a, na Savato yaĩ vakuvĩ kwambĩĩa.
55 Ĩndĩ aka ala mookĩte nake kuma Kalilii o namo mathi na masisya mbũa na moona ũndũ mwĩĩ wake waiĩtwe,
56 na masyoka makaseũvye mĩtĩ yĩ mũuke mũseo na mauta me mũuke mũseo. Na mathũmũa mũthenya wa Savato kwosana na mĩao.
Maelesyo ma kwongeleela
^ Mũsoa ũũ wĩ Mbivilianĩ imwe, ĩndĩ ũyonekaa nthĩnĩ wa mavuku amwe ma tene ma Mbivilia.
^ Ndeto kwa ndeto, “Mũvete mũndũ ũũ.”
^ Kana “oaĩwe mũtĩnĩ.”
^ Sisya Maelesyo ma Ndeto.
^ Kana “Valatiso.”
^ Ndeto kwa ndeto, “ta ĩsaa ya thanthatũ.”
^ Ndeto kwa ndeto, “ĩsaa ya kenda.”
^ Kana “aveva ya mũthya.”
